Plattdeutsche Nachrichten Plattdüütsche Narichten vun'n 14. September 2023

Överall in Düütschland: Test för Wohrschau-Anlagen

Bremerhaven: In Düütschland gifft dat den drütten Wohrschau-Dag. Millionen Minschen kriegt glieks, wenn dat Klock 11 is, en Wohrschau-Naricht. So wüllt se rutfinnen, wat allens för den Nootfall un för Katastrophen instellt is. Test-Narichten gaht rut över Radio, Feernsehn, Handy-Apps – as Nina un Katwarn – un ok över SMS un digitale Tafeln. Bavento huult in ganz Düütschland 38.000 Sirenen. In enige Gemeenden, as in Bremerhaven, beiert ok de Karkenklocken.

Bremen: Natschonale Maritime Kunferenz löppt

Bremen: Hüüt Vörmiddag is in Bremen de 13. Natschonale Maritime Kunferenz losgahn. Twee Daag lang wüllt sowat 800 Fachlüüd mit’nanner snacken, ok över de Energiewenn. Mit dorbi sünd ok Bunnskanzler Scholz un Wirtschapsminister Habeck. De Bunnslänner an de Küst luert dor op, dat de Bunnsregerung jem Geld toseggt. Se meent: Wenn in de düütschen Havens nich veel Geld rinsteken warrt, verleert de an Gewicht. Bet nu gifft de Bund 40 Millionen Euro an de Havens. De Küstenlänner verlangt nu teihnmal so veel.

Dood in Deefholt: Polizei kriggt Mann faat, de dat woll maakt hett

Swarmstedt: Wo en junge Fro vun 17 Johr to Dode kamen un en anner Fro in den Kreis Deefholt mit en Metz angrepen worrn weer, hett de Polizei güstern Avend en Mann fastsett, vun den se meent: He hett dat maakt. De Schandarms harrn dat Auto vun den Mann vun 42 Johr an de A7 in den Heidekreis funnen. Nich veel later hebbt se den Mann fastnahmen. Wehrt hett he sik nich. De Polizei geiht fast dorvun ut: He is dat ween, de an’n Sünndag en Schölerin dootstaken un twee Nachten later en anner Fro mit en Metz groff verletzt hett.

Bremerhaven gifft Stipendien ut för Lüüd, de op Sozialpädagoog studeert

Bremerhaven: De Magistrat hett en Stipendienprogramm opsett för Lüüd, de Sozialpädagoog warrn wüllt. So will de Stadt dor gegen an, dat Fachlüüd fehlt. 15 Lüüd, de in den Studiengang „Soziale Arbeit“ studeert, kriegt 600 Euro in’n Maand. Dorför seggt se to: Wenn se jemehr Studium trecht hebbt, warrt se fief Johr lang för den Magistrat arbeiten, to’n Bispeel bi’t Jugendamt.

Dat eerste Sport-Internat in Bremen

Bremen: Jüst nu bringt se dat eerste Sport-Internat in de Stadt op’n Weg. Bet teihn Schölerinnen un Schöler, de na de Oberschool an de Ronzelenstraten in Horn-Lehe gaht, köönt dor unnerkamen. In de School steiht Sport sounso baven mit an, mit veel Leichtathletik, Swömmen, Volleyball, Radfohren un Hockey. Ok an’n Vörmiddag hebbt de jungen Lüüd faste Trainingstieden. So will Bremen allerbeste Sportlers mehr Stütt geven.

Dat Weer

Un woans süht dat mit dat Weer umto ut? Opstunns hebbt wi in Möppen 10 Graad, in Rotenborg sünd dat 11, in Bremerhaven 13 un in Bremen 16 Graad. Vundaag: An de See dichte Wulken, de Sunn waagt sik hier nu af un an mal rut. In’t Binnenland kriegt wi aver mehr Sunnschien. Un dröög blifft dat ok. Dat Thermometer krabbelt op 18 bet 20 Graad. De Wind dorto weiht flau, mal vun hier, mal vun dor, an de See vör allen vun de süüdwesten Kant. Tokamen Nacht: En ganz poor oder gor kene Wulken. Blots an de See noch en poor Wulken, man ok hier blifft dat dröög. Bi 14 bet 11 Graad op de Inseln, anners 10 bet 6 Graad. Morgen: Sunnschien satt, mit blots en Handvull fisselige Wulken. Dröög bi 21 bet 23 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.