Plattdeutsche Nachrichten Plattdüütsche Narichten vun'n 13. September 2023

UNO bringt Hölp för Hoochwatergegenden in Libyen in Gang

Bengasi: Wo in Libyen veel Land ünner Water steiht, bringt de Vereenten Natschonen Hölpsakschonen in Gang. En Spreker vun UN-Generalsekretär Guterres sä: Se arbeit mit vele Koppels tohoop, dat de Hölp na de Minschen dor henkummt. En UN-Kru is al in de Gegend. Eerst harr dat böös regent, dorvun weern twee Staudammen tweibraken. Opstunns heet dat: Sowat 5.200 Minschen sünd dor to Dode kamen. Vun Dusende weet se nich, woneem de afbleven sünd. Vunwegen dat vele Water gifft dat in vele Gegenden keen Kuntakt na buten.

Noordkoreas Kim kummt mit Putin in Russland tohoop

Moskau: Kim, de in Noordkorea dat Leit hett, un de russsche Präsident Putin sünd in den Oosten vun Russland tohoopkamen. Op en Video, dat de Kreml rutgeven hett, schüddelt de beiden sik de Hannen. Dat weer op den neen Weltruumbahnhoff Wostotschny. Putin hett seggt: Russland will Noordkorea hölpen, wenn de Satelliten boot. Vele rekent dormit, dat Putin un Kim ok över dat Anlevern vun Waffen snacken warrt. De USA meent: Russland bruukt woll en Barg mehr Munitschoon för sien Krieg gegen de Ukraine.

Venedig sett Gebühren fast för Besöker, de blots een Dag blievt

Venedig: Besöker, de in de italiensche Havenstadt rin wüllt, mööt dor bald Geld för betahlen. De Gemeenderaat hett fastleggt: Fief Euro mööt de betahlen, de blots en poor Stunnen un nich över Nacht blievt. Tokamen Johr schall dat an 30 Daag gellen. Wannehr genau dat ween schall, steiht noch nich fast. In Venedig wahnt 50.000 Minschen. In de Hauptferientiet sünd an enkelte Daag mehr as duppelt so vele Lüüd in de Stadt. Un dat bringt mehr un mehr Kummer un Arger.

Ok Bremer Wirtschap will: De Binnenstadt schall sekerer warrn

Bremen: De Bremer Wirtschap will de Politik Stütt geven, wenn dat dorum geiht, dat de Binnenstadt sekerer un reiner warrt. De Hannelskamer hett mit Lüüd ut den Bremer Senat dor al över snackt. En Arbeitskoppel schall nu vörslaan, woans de Laag in de Binnenstadt, in de Neestadt un in’t Viddel beter warrn kann. Binnensenater Mäurer finnt den Vörslag vun de Hannelskamer goot: De Staat alleen kunn dat nich raken.

Dode junge Fro: Polizei kickt sik Henwiesen an

Borenborg: Wo en jungen Fro vun 17 Johr dör Gewalt to Dode kamen is, kickt sik de Polizei nu de Henwiesen vun Tügen an. Bet nu harrn sik 20 Lüüd mellt, sä een vun de Polizei. De Schandarms wüllt vundaag ok dor wieder na Sporen söken, woneem se de Fro funnen hebbt. Sünndag weer se doot in en Graven an en Straat in Borenborg funnen worrn. As se de Liek ünnersöcht hebbt, hebbt se rutfunnen: De Fro is umbrocht worrn. De Schandarms seggt: Dat is keen Verkehrsunfall ween un ok keen Sexual-Verbreken.

Dat Weer

Un woans süht dat mit dat Weer umto ut? Opstunns hebbt wi in Emm 14 Graad, in Bremen, Bremerhaven un Bassen sünd dat 16 Graad. Vundaag: Eerst dichte Wulken, de ok Regen mitbringt, vör allen in Bremen un süüdlich un ööstlich dorvun. Mag ween ok mit Blitz un Dunnerslag. In de Middagstiet lockert dat vun de Noordsee her pö a pö op, af un an schient de Sünn, un dat höört ok op to pladdern. Dat Thermometer krabbelt blots noch op 18 bet 20 Graad. De Wind dorto weiht in Maten vun de noorden bet noordwesten Kant, mit deegte Böen, op de Inseln ok störmsche Böen. Tokamen Nacht: An de See blots en poor Wulken, in’t Binnenland funkelt de Steerns, un dat blifft dröög. Bi 14 bet 11 Graad op de Inseln, anners 10 bet 5 Graad. Morgen: Veel Sunnschien, blots an de Küst ballt sik noch de Wulken. Dröög bi 18 bet 20 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.