Plattdeutsche Nachrichten Plattdüütsche Narichten vun'n 11. Mai 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 11. Mai 2023

  • Chinesen dröfft bi’n Hamborger Container-Terminal instiegen
  • BSAG enigt sik in’n Tarifstriet
  • Mehr Platz för Solaaranlagen op Bremer Dacken
Bild: Radio Bremen

Informationen zum Audio

Gemeenden kritiseert Ergebnisse vun’t Flüchtlings-Top-Drapen

Berlin: Dat, wat bi dat Flüchtlings-Top-Drapen vun Bund un Länner rutsuert is, ward vun de Gemeenden düchtig kritiseert. De Präsident vun'n Städerdag Lewe beduert besünners, datt dat Finanzeern vun de Flüchtlingsquarteren över lang eerst in’n November fastleggt warrn schall. Meist jüst so süht dat de Hauptgeschäftsföhrer vun’n Düütschen Städer- un Gemeendebund Landsberg. In’t ARD-Morgenmagazin hett he Sekerheit bi’t Planen verlangt. Na dat Verhanneln hett Bunnskanzler Scholz künnigmaakt, datt Länner un Gemeenden in dütt Johr pauschal mit een Milliarde Euro bavento Stöhn kriegen schüllt.      

Chinesen dröfft bi’n Hamborger Container-Terminal instiegen

Hamborg: De chinees’sche Staatsreederee Cosco draff bi’n Hamborger Haben instiegen. De Bunnsregeern hett dat an’n Avend een för allemal afnickt. So ward en Minnerheitsandeel vun weniger as 25 Perzent an’n Container-Terminal Tollerort in Hamborg verlöövt. Cosco wull egentlich 35 Perzent an Tollerort övernehmen. In de Bunnsregeern geev dat aver en düchtigen politschen Striet doröver, wat en chinees’schen Andeel överhaupt verlöövt warrn schall. 

BSAG enigt sik in’n Tarifstriet

Bremen: Wietere Streiks bi de BSAG sünd nu vun’n Disch. As dat Bremer Verkehrsünnernehmen an’n Morgen to „buten un binnen“ säe, hett dat in’n Tarifstriet en Enigung geven. So schüllt de Mitarbeiders vun tokamen März an mehr as 10 Perzent mehr Geld kriegen. Bavento gifft dat en Inflatschoonsprämie vun 3.000 Euro. Eerst in de verleden Week hett de Gewarkschaft Verdi de üm un bi 2.400 BSAG-Mitarbeiders to en Warnstreik över twee Daag opropen. Verdi hett tominnst 600 Euro mehr Geld per Maand verlangt.

Mehr Platz för Solaaranlagen op Bremer Dacken

Bremen: Op de Dacken vun Bremen un Bremerhaben is vun nu an mehr Platz för Solaaranlagen. Ümweltsenatersche Schaefer hett en Erlass in Kraft sett, in de de Regeln vun de Afstännen vun Photovoltaik- un Solaarthermieanlagen to Brandmuern daalsett sünd. Dormit is na Menen vun de grönen Senatersche mehr Geld mit de Anlagen to verdenen, un ok de Bidrag to’n Schutz vun dat Klima ward grötter.       

Jümmer weniger Hüüs kaamt in Neddersassen mit Dwang ünner den Hamer

Hannover: In Neddersassen kaamt jümmer weniger Hüüs mit Dwang ünner den Hamer. Na Angaven ut dat Justizministerium geev dat in’t verleden Johr in’t heele Land 2.084 Verfohren dorför. Dat weern 17 Perzent weniger as in’t Vörjohr. In’t Johr 2016 weern dat mit üm un bi 3.800 Verfohren meist dubbelt so veel. Dat liggt an de groden Nafraag na Wahnegentum in de verleden Johren. Op den free’en Markt hebbt de Schüldners högere Priesen kriegen kunnt.  

Dat Weer

Un nu en Blick op dat Weer: In Emmen un Nordholt 9, in Bremerhaben un Cuxhaben 10, in Leer 11, in Bremen un Dörveern 12 un in Möppen sünd dat opstünns 13 Graad. Hüüt gifft dat veele Wulken, blots wenig Sünn, un ut de süüdlichen Flachen treckt Regenschuers op. An de Küst blifft dat noch för längere Tiet meisttiets dröög. De Temperaturen liggt bi 12 bet 17 Graad. In de Nacht treckt de Schuers bilütten na Westen över dat Emsland un Oostfreesland af, un vun de Elv her lockert dat hier un dor op. Verenkelt kann dat för en Tiet ok Daak geven. Dat köhlt sik af op 11 bet 9 Graad. Morgen is meisttiets de Sünn to sehn. Westen de Werser is dat eerst faken noch wulkig, dorbi aver ok dröög. Later lockert de Wulken op un de Sünn is fakener to sehn. Dorbi ward dat warmer as toletzt bi 17 bet 23 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.

Bremen Eins Livestream & aktuelle Sendung.

Der Nachmittag mit Roland Kloos

Der Nachmittag

Jetzt läuft:

Dion Runaround Sue
  • Jetzt läuft:

    Dion Runaround Sue