Plattdeutsche Nachrichten Plattdüütsche Narichten vun'n 13. März 2025

Extra-Sitten vun den Bunnsdag

Berlin: De ole Bunnsdag kummt an’n Middag noch mal wedder tohoop. Snacken wüllt se över den Plaan vun Union un SPD, Schulden to maken. An de Schuldenbrems vörbi schall Geld för Verteidigung ansett warrn un ok en Extra-Posten vun 500-Milliarden för Infrastruktur. Dat geiht aver blots, wenn se dat Grundgesetz mit twee Drüddel vun de Stimmen afännert. Union un SPD meent, de Grönen warrt jem Stütt geven. Bet nu hebbt de aver kloormaakt: So köönt wi dor nich ja to seggen.

Union un SPD verhannelt över en Koalitschoon

Berlin: Union un SPD snackt vunnamiddag dat eerste Mal över en Koalitschoon för de ne’e Bunnsregerung. Tohoop kaamt 256 Politikers ut den Bund, de Länner un dat Europaparlament. In 16 Arbeitskoppels schüllt se den Kurs vun de Regerung fastleggen. In de Koppel för Wirtschap un Industrie sitt för de SPD ok Bremens Börgermester Andreas Bovenschulte. De stellvertreden CDU-Baas Wiebke Winter is bi dat Thema Europa mit bi. Ut Neddersassen sünd ok Wirtschaftsminister Olaf Lies un Sozialministersch Daniela Behrens in een vun de Arbeitskoppels.

Nich mehr scheten: Seggt Putin vundaag dor wat to?

Moskau: Kreml-Spreker Dmitri Peskow hett dörblicken laten: Wladimir Putin kunn vundaag wat seggen to den US-Vörslag, dat 30 Daag lang nüms scheten schall. Eerst warrt Putin mit Alexander Lukaschenko ut Belarus snacken, achteran geiht he an de Medien. De Ukraine is inverstahn, dat dat Scheten dor ophöört. Middewiel hett US-Präsident Trump anseggt, siene Verhandlers sünd op den Weg na Moskau.

Warnstreiks in Bremen un Bremerhaven

Bremen: De Gewarkschap verdi hett vundaag noch mal wedder to Warnstreiks in den öffentlichen Deenst opropen. In Bremerhaven blievt de Börgerkontoren un to’n Deel ok de Kitas dicht. In Bremen mag de een oder anner Bus oder Bahn vun de BSAG nich fohren. In Ollenborg gifft dat vundaag in’t Klinikum, in de Verwaltung vun de Stadt un in Kitas blots en Nootdeenst. In de Landkreisen Wersermasch, Ammerland, Freesland un Wittmund loopt Warnstreiks bi de Reddungsdeensten.

BVB ünner de letzten Acht

Düörpm: Eerst weer Bayern München dörkamen, nu steiht ok Borussia Düörpm ünner de letzten Acht vun de Football-Champions League. Bi den OSC Lille in Frankriek hebbt se mit 2:1 de Bavenhand hatt. Nu mööt se gegen den FC Barcelona ran. In de Europa-League will Eintracht Frankfort vunavend ok ünner de letzen Acht. Bi Ajax Amsterdam harrn se wunnen, un nu mööt se to Huus blots oppassen, dat se nich verleert.

Dat Weer

Un woans süht dat mit dat Weer umto ut? Opstunns hebbt wi in Möppen 3 Graad, in Bremen, Bremerhaven un Cuxhaven sünd dat 4 Graad. Vundaag: Wenn sik de letzte Daak oplööst hett: Mal Sunnschien, mal Wulken, un ok mal en Schuer, de Regen oder Grisselgrussel daalsmitt. Dat Thermometer krabbelt op 5 bet 8 Graad. De Wind dorto weiht flau, an de See ok wat mehr un in deegte Böen. He dreiht vun Süüdwest över West na Noordwest bet Noord. Tokamen Nacht: Mal mehr, mal weniger Wulken, hier oder dor ok mit Regen, Sneeregen un Grisselgrussel. In’t Binnenland warrt dat na Middernacht dröger. Denn: kloren Heven, un bet to’n Morgen köönt sik Placken mit Daak oder hogen Daak utbillen. Bi 1 bet 3 Graad unner 0. Dat kann glatt warrn. Morgen: Wulken, hier oder dor ok dakig-gries mit den een oder annern Schuer. Achteran: Mal Sunnschien, man mehr pladdern kann dat ok, tohoop mit Snee oder Grisselgrussel. Dat Ganze bi 4 bet 6 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Birgit Sagemann.