Plattdeutsche Nachrichten Plattdüütsche Narichten vun'n 28. Mai 2024

Macron kriggt westfäl`schen Pries för Freden

Münster: Präsident vun Frankriek Emmanuel Macron warrt hütt mit den Westfäl`schen Pries för Freden uttekent. Dat is hütt de drütte un letzte Dag vun sien Staatsbesöök. He kriggt den Pries, wiel he sik so dull för Europa insett. Bunnspräsident Frank-Walter Steinmeier hollt de Loffreed. Achteran is Macron bi eenen düütsch- franzöösch Ministerraad in Slott Meseberg dorbi. Bi dat Drepen geiht dat ok üm de Tosamenarbeit in den Verdeffenderberiek.

UN-Sekerheitsrat besnackt sik över israel`sche Luftattack

New York: Na de Luftattack vun Israel op een Lager för Minschen, de op de Flucht sünd in´t Gazastriepen, kummt hütt de UN-Sekerheitsrat to een Extra-Sitten tosamen. Algerien hett dat Drepen inberopen un kriggt Stütt vun Slowenien. Bi de Attack sünd tominnst 45 Minschen to Dode kamen, luut palästinens`sche Angaven. De meisten dorvun sünd  Froenslüüd, Kinner un ole Minschen wesen. De Ministerpräsident vun Israel Netanjahu seggt, dat dat een tragische Fehler wesen is. Den Fall will man nu ünnersöken.

Spanien, Irland un Norwegen willt Palästinenserstaat gellen laten

Madrid: Spanien un Irland willt hütt vun Amts wegen Palästina as egenen Staat gellen laten. In Norwegen gellt dat all siet Middernacht. Den Schritt harrn de Länner all in de verleden Week ankünnigt. Se hofft, dat dordör mehr Bewegung in de Tweestaatenlösung kummt. Israel is vergrellt doröver un hett de Botschafter, vun de dree Länner, inbestellt. Düütschland plaant upstünds nich, Palästina as Staat antoerkennen.

Opsichtsrat bringt Ümbo vun Stadthalle Bremerhaben vöran

Bremerhaben: De Opsichtsrat vun de Stadthalle Bremerhaben hett wietere Schreed för dat op Schick bringen vun den rott Bo besloten. Nu schüllt Planer fastleggen, woveel Kosten un Tied man för dat Projekt bruukt. De Fachlüüd rekent mit 20 bit 40 Millionen Euro Kosten. In´t Sommer vun´t kamen Jahr loppt de Verlöff för Veranstalten in de Stadthalle ut. Dat gifft Bedenken vunwegen de Utrüstung gegen Füer.

Schützenvereen Löningen geiht kunsequent gegen utländerfeindliche Wöör för

Löningen: Na dat utländerfeindliche Singen op dat Schützenfest in Löningen in´t Kreis Kloppenborg geiht de Schützenvereen kunsequent vör. An´t Avend hett de Vörstand sik besnackt. De Lüüd, de rassistische Wöör grölt hebbt, sünd nu ut den Vereen rut. Dorbi hannelt sik dat üm 5 bit 6 Personen, de deels ok noch minnerjöhrig sünd. Se staht  eng in`t  Uttuusch mit de Polizei.

Dat Weer

Un nu een Blick op dat Weer: in Bremen, in Ollenborg un in Dörverrn 12 un in Bremerhaben sünd dat opstünns 14 Graad. Hütt treckt de Regen bit to´n middag hen över de Nordsee un Elb af. Denn kummt af un an ok mal de Sünn rut. Man an de Küst mööt wi wieter mit Schuers , ok mit Blitz un Dunnerslag, reken. De Temperaturen liggt bi 16 bit 19 Graad. Tokamen Nacht hebbt wie erst noch lockere Wulken und dat kann hier un dor Schuers geven. Denn warrt de Wulken vun´t Emsland un Oostfeesland her dichter, un dor kummt denn mehr Natt vun baven rünner, bi 14 bit 13 Graad. Morrn treckt de dicken Wulkenfelleröver de Elb af. Denn gifft dat eenen Mix ut Sünn un Wulken. Dat kann ok mal onnig pladdern un Gewidder geven, bi 17 bit 20 Graad. Dunnersdag wedder vele Wulken mit Regen un Gewiddern, bi 17 bit 20 Graad. Dat weren de Narichten op Platt. Tohoopstellt hett se Anja Guse. Trechtmaakt un vörleest vun Antje Kruppa.