Plattdeutsche Nachrichten Plattdüütsche Narichten vun'n 10. Mai 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 10. Mai 2023

  • Bund un Länner ringt üm Utgaven för Versörgen vun Minschen de op de Flucht sünd
  • Habeck un Graichen laat sik in´t Utschuss to Personalpolitik ut
  • Trump ward vunwegen sexuellen Dwang to Bröök verurdeelt
  • Bremen will Besitters vun Wapen scharper unner Ogen hollen
  • Börgerschaftswahl: Tiet för Breefwahl- Andrag loppt af
  • Dat Weer
Bild: Radio Bremen

Informationen zum Audio

Bund un Länner ringt üm Utgaven för Versörgen vun Minschen de op de Flucht sünd

Berlin: De Ministerpräsidentinnen un –präsidenten vun de Länner besnackt sik hütt Vomdag över dat Versörgen vun Minschen de op de Flucht sünd, un de Utgaven för ehr Ünnerbringen. An´t Nomdag kummt denn ok Kanzler Scholz dorto. Länner un Kommunen verlangt mehr Geld vun den Bund. De Bundesregerung lehnt dat af, wiel se all Hölp in Milliardenhöchte toseggt hebbt. In de Hauptsaak vun dat Drepen will de Bundesregerung besnacken, dat de Asylverfohren un dat Afschuven in Tokunft an Fohrt opnehmt.

Habeck un Graichen laat sik in´t Utschuss to Personalpolitik ut

Berlin: De Personalpolitik, wo dat mehrere Menen to gifft, in´t Bundeswirtschaftsministerium is glieks Thema in den tostännigen Bundesdags-Utschuss. Minister för Wirtschaft Habeck un sien Staatssekretär Graichen wordt vun de Afordneten utfragt. Beide staht ünner polit`schen Druck vunwegen dat nee`e Besetten un den Chefposten bi de Düütsche Energie-Agentur. Graichen harr dor ok ja to seggt. De Grönen-Politiker, de den Posten kregen hett, is sien Trautüge wesen. Graichen un ok Habeck snackt unnerwiels vun een Fehler.

Trump ward vunwegen sexuellen Dwang to Bröök verurdeelt

New York: Den Ex-US-Präsident Trump hett man vunwegen sexuellen Dwang un Verleumdung vun eene Journalistin verurdeelt. De Sworenen vun´t New Yorker Gericht hebbt 5 Millionen Dollar Utgliek för Schaden un Bröök de Versehrte tospraken. Se seht dat as wiesen an, dat Trump de Fro, in de 90er Johre, sexuell op dat Fell rückt is. Dat Vorsmieten, dat he ehr sexuell Gewalt andoon hett, hebbt se fallen laten. De Anwalt vun Trump will dor gegenan gahn. Trump sülvst seggt, dat dat Oordeel Swinnel un Schann is.

Bremen will Besitters vun Wapen scharper unner Ogen hollen

Bremen: De Binnenbehöörd will Besitters vun legale Wapen in Tokunft scharper unner Ogen hollen. Wenn man Twiefel hett, dat een mit de Wapen richtig umgahn kann, denn schall in Tokunft de Behöörd för Gesundheit mit dorbi wesen, üm denn Fall to beurdelen. Ok schall dat lichter sien Wapen vörlopig intotrecken. Dat steiht in een Erlass vun Bremens Binnensenator Mäurer, de vun hütt an gellt. Achtergrund is de Amokloop bi de Tügen Jehovas, vör twee Maand in Hamburg mit acht Dode, wesen.

Börgerschaftswahl: Tiet för Breefwahl- Andrag loppt af

Bremen: In Bremen un Bremerhaben hebbt all knapp 110.000 Wählerinnen un Wählers de Ünnerlagen för de Börgerschaftswahl per Breef beandraagt. Dat sünd nu all düütlich mehr as bi dat letze Mal. Keen dat noch beandragen will mutt nu flink sien. Dat geiht online blots noch bit hütt Middag Klock 12. Dorna kann man de Ünnerlagen noch persönlich in´t Wahlamt Bremen-Midde or in Bremerhaben in´t Börgerbüro Nord kriegen.

Dat Weer

Un nu een Blick op dat Weer: in Bremen 10, in Emm un in Bremerhaven 12, un in Achim sünd dat opstünns 13 Graad. Hütt gifft dat eerst vele Wulken an´t Heven und dor kummt onnig wat vun baven rünner. De Regen treckt denn an´t Nomdag to de Elb un de Nordsee af. Later kann dat wedder Schuers geven, bi 13 bit 18 Graad. Tokamen Nacht hebbt wi wedder dichte Wulken, un hier un dor kummt Regen vun baven rünner, ok Nevel kann sik billen, bi 10 bit 8 Graad. Morrn fangt de Dag gries un mit Nevel an. Dor sünd wedder vele Wulken to sehn. Hier un dor pieselt dat ok mal. De Temperaturen liggt bi 13 bit 17 Graad. Freedag schient denn endlich mal wedder de Sünn för us un dor sünd blots een paar luckere Wulken to sehn. Dat kann hier un dor mal so´n beten natt sien, bi 18 bit 22 Graad. Dat weren de Narichten op Platt. Tohoopstellt hett se Anja Guse. Trechtmaakt un vörleest hett se Antje Kruppa.

Bremen Eins Livestream & aktuelle Sendung.

Der Mittag mit Janine Horsch

Der Mittag
Der Mittag
  • Der Mittag