Plattdeutsche Nachrichten Plattdüütsche Narichten vun'n 17. Mai 2024

Ampelkoalitschon mutt mehr för dat Klima doon

Berlin. De Bunnsregerung mutt ehr Programm för dat Klima noch wat beter maken. Dat hett dat Böverst Verwaltensgericht Berlin-Brandborg fastleggt un dormit twee Klagen vun de Düütschen Ümwelthülp bewilligt. De Bunnsregerung hett man al en poor Akschonen ümsett, as to´n Bispill dat Düütschlandticket or de CO twee-afhangig LKW-Maut. Man ut de Sicht vun de Richters langt dat Programm nich ut, üm de Tele vun den Klimaschutz bit 2045 kloor to kriegen.

Noch en AfD-Politiker verleert Unantastborkeit

Berlin. Na den AfD-Afornten Petr Bystron hett güstern Avend ok den sien Frakschoonskolleeg Hannes Gnauk de Unantastborkeit verloren. De Bunnstag stimmte en Andrag dorför to. Na ARD-Informatschonen geiht dat dorbi üm en Disziplinor-Klaag gegen Gnauk ut sien Tiet bi de Bunnswehr. He schall gegen Asylbewarver un Utlänner hisst hebben.

Binnendeputatschoon stimmt för Waffenverbottzoon in´t Viddel vun Bremen

Bremen. De plante Waffenverbottzoon in dat Viddel vun Bremen kann to´n Enn vun düssen Maand vun de Stadtbörgerschaft afnickt weern. De Fachpolitikers vun de Binnen-Deputatschoon stimmten de Vörschrifft güstern mit den mehrsten Stimmen to. In en poor Straten vun´t Steendoor un Osterdoor is dat af Anfang Juni verbaden in de Nacht Messen, Pistolen, Reizgas or anner gefährlich Saken bi sick to hebben.

Bremen verlangt vun den Bund wieder Geld för Kitas

Berlin. Bi dat Bunnsratdrapen vundag ünnerstütt Bremen dat Verlangen, mehr Geld vun den Bund för Kinnergoorn to kriegen. Berlin schall Kitas dorna över dat Johrsenn rut wat toscheten. Dat Land Bremen kriegt dör dat Kita-Gesetz rund 20 Millionen Euro vun den Bund. De Toschüss schüllt aver an´t Enn vun dat Johr utlopen.

Lauterbach stellt „Klinik-Atlas“ vör

Berlin. Gesundheitsminister Karl Lauterbach stellt an´n Middag den „Bunns-Klinik-Atlas“, as de nöömd warrt, vör. Patschenten könen över dat Portal de Leistens un Behannelnsqualität vun de Krankehüüs in ehr Neegde afropen. De List schall över dat Angebott an bunnswiet 1.700 Kliniksteden Utkunft geven.

Dat Weer

Un nu noch en Blick op dat Weer: In Deefholt 18, in Bremen-Mitt 19, in Bremerhaben 18 un in Meppen sünd dat opstunns 17 Graad. Vundag is dat vun Oostfreesland över de Ünnerweser bit to de Elv hell und kloor mit Sünnschien. Dat blifft dröög. In´n Süüden stellt sick en Wessel ut Sünnschien un opstiegen Wulken in. Viellicht sünd in Richt Graafschop Bentheim enkelte Schuer möglich. De Wind weiht af un an in Maten vun de oosten Kant. Dat Thermometer wiest 19 bit 22 Graad an de Küst. In´t Binnenland 23 bit 26 Graad. In de Nacht sünd lockere Wulken an´n Heven. Mennigmal sünd de Sterns to sehn. Dat blifft dröög bi elven bit 15 Graad. Morn fangt dat fründlich un dröög an. Man denn kriegen de Wulken de böverste Hand un an´n Namiddag un Avend sünd enkelte Schuer mit Blitz un Donnerschlag möglich. In de Twüschentiet kann aver de Sünn ok nochmal vörbi kieken. 18 bit 23 Graad stahn denn op dat Thermometer. Pingstsünndag: En Wessel ut Sünnschien un Wulken mit optrecken Gewidder mit orrig Regen bi 16 bit 21 Graad.

Dat weern de Narichten op platt. Tohoopstellt hett se Justus Wilke. Op Platt trechtmaakt un vörleest vun Markus Weise.