Plattdeutsche Nachrichten Plattdüütsche Narichten vun'n 23. Mai 2024

Grundgesett warrt 75

Berlin: Mit en Fierstünn fiert de Böversten vun Staat un Sellschop vundaag den 75. Johrsdag vun dat Grundgesett un dormit de Gründung vun de Bunnsrepublik Düütschland. Bi den Staatsakt twuschen Rieksdag un Kanzleramt warrt Bunnspräsident Steinmeier an´n Middag en Reed holen. De Böversten vun de fief Verfatensorganen nehmt an düsse Fierstünn deel. Achterna fangt in dat Regerungsveertel en Demokratiefest för Börger statt, wat bet Sünndag anduert.

Israel will woll wedder över Geiseln verhanneln

Tel Aviv: Israel will woll wedder över dat Freelaten vun Geiseln verhanneln, de vun de Hamas in den Gazastriepen versleept wurrn. Na de Israelschen Medien hett dat Kriegskabinett dat Verhandlungsteam anwiest, sik wieder Möh to geven. De israelsche Regerung un de Hamas snackt nich direktemang miteenanner. Ägypten, Katar un de USA hebbt dat Leid bi socke Drepen. Opstunns drauht Ägypten dormit, sik torüchtotrecken ut dat Verhandlungsteam.

Jugend- un Familienminister seten vundaag tohoop

Bremen: Vun Middag af an seten de Jugend- un Familienminister vun Bund un Länner in dat Bremer Parkhotel tohoop. Bremens tostännige Senatorsche Claudia Schilling un Sascha Aulepp reken mit belangrieke Teken för mehr Schangsen vun Kinner un junge Lüüd. Op dat Programm steiht ünner annern en Positschoons-Poppier för Deelhebben un Inkluschoon, wat tohoop ünnertekent warrn schall.

Wedder Streik in dat Bogewarv

Bremen: Siet hüüt Vörmiddag streiken de Arbeiders vun den Bo wedder. De Bo-Gewarkschop hett de Bremer Arbeiders to en Protestaktschoon an dat Roland Center opropen. Dor schall de Bosteed för den Utbo vun de Straatenbahn 1 dicht maakt warrn. Dor achter staht fehlslaan Slichtungsdrepen. De Bo-Gewarkschop drauht de Arbeitgevers mit Streiks, wo dat Enn nich vun aftosehn is, wenn sik bi de tokamen Tarifrunn nix röögt.

Fischtown Pinguins speelt in Championsleague ünner annern gegen den Winner vun´t letzt Mol ut Genf

Prag: An Avend wurrn de Champions League-Gegner vun de Fischtown Pinguiuns utloost. In de Hauptrunn dröppt de Bremerhobener Ishockey-Kru buten ünner annern op Sparta Prag. Tohuus speelen se gegen den Winner vun´t letzte Mol Servette Genf un ok gegen de Manschaft ut Lausanne un Rouen. De Champions League fangt an 5. September an.

Dat Weer

Un nu kiekt wi op dat Weer: In Möppen sünd dat 14 Graad, in Emm hebbt wi 15 Graad un in Bremen un Bremerhoben sünd dat opstunns 16 Graad. Hüüt lacht meist de Sünn, en poor lütte Wulken sünd ünnerwegens un dat blifft dröög, man blots in Ostfreesland kann dat mal en lütt beten Regen geven. Dat Thermometer wiest us 19 bet 23 Graad in´t Binnenland un 18 Graad op de Eilannen. In de Nacht sünd blots en poor lütte Wulken ünnerwegens un wi köönt de Steerns funkeln sehen. An Morgen kann dat en beten daakig warrn. Un dat bi 13 Graad op de Eilannen un in Bremerhoben, 10 bet 9 Graad in´t Binnenland. Morgen eerst en beten dakig un diesig, denn lacht wedder de Sünn. Över Middag warrn de Wulken mehr, süüden vun Bremen sünd opstiegen Wulken ünnerwegens de denn ok Gewidder un Schuers bringen. Dat Thermometer wiest us 18 Graad op de Eilannen un 22 bet 24 Graad in´t Binnenland.

Dat weren de Plattdüütschen Narichten. Tohoopstellt vun Gabriele Intemann. Op Platt trechtmaakt un vörleest vun Martina Brünjes.