Plattdeutsche Nachrichten Plattdüütsche Narichten vun'n 22. Mai 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 22. Mai 2024

  • Bunnsregeern will medizinsche Versorgen beter maaken
  • Truerfier för Irans Präsident Raisi
  • Wohrschaustreik in dat Bogewarv
  • Röwekamp warvt för Laschet as CDU-Bunnesvörsitter
  • Neddersassen tekent Schoolen för plattdüütsch un saterfreesch Spraak ut
  • Dat Weer
Bild: Radio Bremen

Informationen zum Audio

Bunnsregeern will medizinsche Versorgen beter maaken

Berlin: Dat Bunnskabinett snackt hüüt över en Gesettvörlaag vun Gesundheitsminister Karl Lauterbach, wo man de medizinsche Versorgen verbetern kann. Betnu geev dat en baverste Grenz bi dat Afreken vun Leisten, in dat Papeer steiht dat Huusdokters ehr Arbeit in Tokunft kumplett afreken dörvt. Dorto schall dat mehr Psychotherapeuten för junge Lüüd geven un för Gemeenden warrt dat eenfacher, medizinsche Versorgenszentren to grünnen.

Truerfier för Irans Präsident Raisi

Teheran: Teihndusende Minschen sünd för de Truerfier för Präsident Ebrahim Raisi in de iranschen Hauptstadt tohoopkamen. Morgen schall he in sien Heimatstadt Maschad in den noordoosten Irans bisett warrn. De ultrakonservative Raisi weer siet 2024 Präsident. In de Tiet mutt he graadstahn för brutale Ünnerdrücken vun Demokratiebewegen, butendem för dusende Henrechten politsch gefangen Lüüd in dat Johr 1988.

Wohrschaustreik in dat Bogewarv

Bremen: In den Bo-Tarifstriet hebbt de Gewarkschoppen to´n Streik opropen. Op de Börgerwischen sünd na de Gewarkschoppen dusende Minschen tohoopkamen, üm laater dör de Binnenstadt to lopen. Dor achter staht de fehlslaan Slichtungsdrepen. Vörslaan wurrn mehr Lohn vun 250 Euro un högersetten vun den Tarif in en poor Mand vun goot veer Perzent. Blangenbi den Bunnsvörsitter vun de IG Bo Robert Feiger snackt bi de Demo vundaag de Bremer DGB-Baas Ernesto Harder un Weertschopssenatorsche Kristina Vogt.

Bremer Lock warrt leddig maakt

Bremen: De Wilhelm-Kaisen-Börgerhölp maakt hüüt dat Bremer Lock leddig. Mit de Spennengeller warrt utwählte Projekte vun Wollfahrtsverbänn traditschonell Stütt geven. Verleden Johr weer dorbi en Rekordbedrag vun 24.000 Euro för de Bremer Bahnhoffsmischoon tohoopkamen. Dat Bremer Lock is en Gullideckel wat mit en Klööv in de Midde to en Spennenbox wurr un vör de Bremer Börgerschop to finnen is. Wenn man en Geldstück dor rinsmitt, bedanken sik ümschichts de Bremer Stadtmuuskanten Esel, Hund, Katt or Hahn.

Neddersassen tekent Schoolen för plattdüütsch un saterfreesch Spraak ut

Lingen: Fief Schoolen in Neddersassen warrn hüüt för ehren Insatz för de plattdüütsche un saterfreesche Spraak uttekent. Mit dorbi sünd de Grundschool Middelgrootefehn un de Böverschool Uplengen in Ostfreesland, man ok de Böverschool Wiefelsteed bi Ollenborg. Kultusministersch Julia Willie Hamburg see in´t Vörfeld, dat is grootardig dat de Tahl vun Schoolen de düsse Spraaken plegen jümmer mehr warrn.

Dat Weer

Un nu kiekt wi op dat Weer: In Bremen un Möppen hebbt wi 15 Graad, in Bremerhoben un Emm sünd dat opstunns 16 Graad. Hüüt hangt de Heven vull Wulken, dat pladdert jümmer mal wedder, vun Middag af an ok mit Blitz un Donnerslag, hier un dor denn ok mit starken Regen. Westen de Werser sünd Gewidder nich wohrschienlich. Avends lockern de Wulken taaghaftig op un ok de Regen un Gewidder warrt weniger. Op de Eilannen sünd dat negenteihn Graad un in´t Binnenland 20 bet 21 Graad. In de Nacht trecken de Schuers in Richten Elv af, man in de tweeten Nachthälv kann man ok mal de Steerns funkeln sehn un dat bi veerteihn bet ölven Graad. Dunnersdag wesseln sik en poor Wulken un lachen Sünnenschien af, meist is dat dröög un dat bi 15 bet 23 Graad in´t Binnenland un achteihn Graad op de Eilannen.

Dat weren de Plattdüütschen Narichten. Tohoopstellt vun Gabriele Intemann. Op Platt trechtmaakt un vörleest vun Martina Brünjes.

Bremen Eins Livestream & aktuelle Sendung.

Der Morgen mit Britta Uphoff

Der Morgen
Der Morgen
  • Der Morgen