Plattdeutsche Nachrichten Plattdüütsche Narichten vun'n 12. April 2024

Veel vertrackte Arbeit in´t Land

Bremen. Jeedeen sövente Mitarbeiter in dat Land Bremen arbeitet in´n Lüttlohnsekter un verdeent nich so veel Geld. Dorop wiest de Arbeiterkamer in ehrn „Bericht to de Situatschon 2024“ hen. De gode Richtung an´n Arbeitsmarkt hölpt den Minschen mit leeg afsekerte Arbeit nich, so de Kamer. Ok wenn in velen Bedrieven Mitarbeiters fehlen. Na den Bericht verdenen rund 58.000 Arbeiter in Bremen weniger as 13,04 €uro pro Stünn. Besünners vele vun so leeg betahlten Arbeitssteden gift dat bi dat Reinmaken un bi de Krögers un Weertslüüd.

Striet üm Klimafohrplan: Wissing wohrschaut vör Fohrverbott

Berlin. De Reform vun dat Klimaschutzgesetz kann Stappen vun groten Belang för Autofohrers, bet hen dorto dat Fohren to verbeden, bedüden. Dat vermellt de Bunnsverkehrsminister Wissing. Dat steiht in en Schrieven vun Wissing an de Frankschoonsböversten vun de Ampel-Frakschonen SPD, Gröne un FDP. In den Breef steiht, dat neje Gesetz mutt vör den 15. Juli gellen, anners mutt dat Ministerium na dat gellen Gesetz hanneln. Dat Klimaschutzgesetz betto süht man vör, dat in den Verkehrssekter bestimmte Mengen vun Gasen, de leeg för dat Klima sünd, nich över de Weerte ruutgahn dörven.

Bunnsdag will nejet Sülfstbestimmensrecht besluten

Berlin. In Tokunft dörven Minschen ehr amtlich indragen Geslecht un ehrn Vörnamen ännern. De Bunnsdag besluut vundag wohrschienlich dat neje Sülfstbestimmsrecht. Betto mussen bedrapen Lüüd en Schien vun en Doktor vörleggen, wenn se dat amtlich indragen Geslechtännern wüllt.

Hotels in Bremen setten sick vör Verfatensgericht nich dör

Bremen. De Bunnsgerichtshoff hett Klagen vun twee Hotels in Bremen afwiesen. Dat Parkhotel un dat Dorint Hotel an´n Hillmannplatz in de Binnenstadt wullen noch mehr Hölp vun den Staat dörfechten, wiel se wegen de Corona-Pandmie 2020 und 2021 dicht maken mussen. De beiden Hotels weern al vör twee Gerichten in Bremen mit ehr Klagen nich dörkamen. De Bunnsgerichtshoff meent, dat de Infektschonsregeln vun de Stadt Bremen den Ümstenn na richtig weern.

Brennen Auto makt Dubbelhuushälft twei

Wilshusen. En brennen Auto hett in de Nacht in Wilshusen en Huus ansteken un dat is leeg to Schaden kamen. Woso de Wagen gegen Klock dree in de Nacht Füer fung, weet se noch nich. De Flammen grepen eerst op en Carport över, denn op en Dubbelhuus. De Lüüd, de dor wohnt, en Fro mit twee Kinner as ok noch en Familie, kunnen sick unversehrt redden. En vun de beiden Wohnungen wurr meist tonichtmakt. Rund 100 Füerwehrlüüd weern in´n Insatz.

Dat Weer

Un nu noch en Blick op dat Weer: In Achim un in Bremen-Mitt 14, un in Bremerhaben un in Ollenborg sünd dat opstunns 13 Graad. Vundag fangt de Dag mit dichten Wulken an. Af un an kaamt dat en beten Natt vun baven. An´n Namiddag lockern de Wulken op un de Sünn lacht dör de Wulkenlöcker. De Wind weiht in Maten, an de Nordsee faken frische Wind vun de süüdwesten bit westen Kant. Dat Thermometer wiest 14 Graad op de Eilannen. 17 bit 20 Graad an´t Land. In de Nacht wiest de Heven lockere Wulken. Dat blifft dröög bi negen bit twölf Graad. Morn warrt dat woll de warmste Dag vun de Week. Dat blifft dröög. Wulken un Sünn wesseln sick bi 17 bit 22 Graad af. Sünndag wesseln sick Sünn un Wulken bi 12 bit 16 Graad af.

Dat weern de Narichten op platt. Tohoopstellt hett se Gerrit Busch. Op Platt trechtmaakt un vörleest vun Markus Weise.