Plattdeutsche Nachrichten Plattdüütsche Narichten vun'n 8. April 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 8. April 2024

  • Klima-Lüüd blockeert Autotog in Bremen
  • Fischtown Pinguins winnt noch een Speel
  • Tohoopstahn na Füeranslag op Synagog
  • Se kummt woll vöran bi’n Verhanneln to Wapenroh in’n Gazastriepen
  • Dütsche Suldaten reist na Litauen
  • Dat Weer
Bild: Radio Bremen

Informationen zum Audio

Klima-Lüüd blockeert Autotog in Bremen

Bremen – An’n Morrn hebbt sik een paar Minschen in Hemeln an een Bahngleis fastmaakt un darmit een Autotog vun’n Autoboer Mercedes Benz stoppt. De Polizei weer siet kort vör half söben in’n Insatt, üm de Lüüd, de dat woll för dat Klima daan hebbt, vun de Gleise wegtokriegen. Dat weer an een Toleverer-Streek to’n Mercedes Wark. De öffentlich Bahnverkehr weer kort mal behinnert, sä de Polizei, man middewiel löppt wedder allens.  

Fischtown Pinguins winnt noch een Speel

München – In de Dütsche Ieshockey-Liga stüert de Fischtown Pinguins op dat Finale to: de Bremerhabener hebbt güstern Abend bi’n EHC München mit 3 to 2 wunnen. Darmit harrn se to‘n drütten Mal in de Runn vun de letzten Veer de Nääs vörn un darmit mööt se in de Playoffs blots noch een Speel winnen un se kummt in’t Endspeel. Wieter geiht dat morrn Abend in Bremerhaben.

Tohoopstahn na Füeranslag op Synagog

Ollenborg – Na den Füeranslag op de Synagog an’n Freedag söökt de Polizei wieter na de Minschen, de dat daan hebbt. To de glieke Tied staht vele Lüüd an de Siet vun de Jödsche Gemeend. Bi een Tohoopkamen to’n Stütt geven sünd güstern rund 500 Minschen in de Ollenborger Binnenstadt op de Straat gahn.

Se kummt woll vöran bi’n Verhanneln to Wapenroh in’n Gazastriepen

Kairo – Dar geiht woll wat vöran bi dat Verhanneln över een Wapenroh in’n Gazastriepen un dat Freelaten vun Hamas-Geiseln. Bi dat Snacken daröver in Kairo schüllt de Littmaten woll bi striedig Punkten orrig wieter kamen sien. Dat vermellt een ägyptisch Fernsehsender, de den Staat nah steiht. He weet dat woll vun een ranghogen Vertreder vun Ägypten.

Dütsche Suldaten reist na Litauen

Berlin – De Bunnesregeern will op Duer bit to 5-dusend dütsche Suldaten na Litauen verleggen un een Bidrag to’n Afschrecken leisten. Een erstet Kommando reist hüüt af. An’n Vörmiddag ward Verdeffenderen-Minister Pistorius rund 20 Suldaten in den Opdrag verafscheden. An’n Enn vun’t Johr schüllt denn tohoopnahmen 150 Bunneswehrsuldatinnen un Suldaten in Litauen sien.

Dat Weer

Un nu een Blick op dat Weer: op Wangerooge 11, in Bremen, Bremerhaben un Deefholt sünd dat opstunns 14 Graad. Vundag wesselt sik Sünn un Wulken af un dat blifft erst meist dröög. An’n Namiddag kummt vun’t Ensland her verenkelt nee’e Schuers op – bi 17 bit 21 Graad in’t Binnenland un 14 bit 15 Graad op de Eilanden. Tokamen Nacht treckt de Schuers gau över de Nordsee un Richt Elv af un darachter lockert dat op. Man later in de Nacht ward de Wulken dicker un to’n Morrn hen kummt dat wedder natt vun baben. Hier un dar ok mit Blitz un Donner. Dat Thermometer sackt op milde 13 bit 11 Graad. Morrn sünd meist dicke Wulken an’n Heben, de Sünn kiekt blots af un an mal rut un jümmer wedder treckt Regenschuers över’t Land. Üm de Middagstied rüm treckt de Regen af un dat blifft den Rest vun’n Dag meist dröög – bi 14 Graad op de Eilanden un bit to 18 Graad in’t Binnenland. Dat weern de Narichten op Platt. Justus Wilke hett se tohoopstellt. Op platt trechtmaakt un vörleest hett se Heidi Jürgens.

Bremen Eins Livestream & aktuelle Sendung.

Der Nachmittag mit Dirk Böhling

Der Nachmittag

Jetzt läuft:

Sophie B. Hawkins Right Beside You
  • Jetzt läuft:

    Sophie B. Hawkins Right Beside You