Plattdeutsche Nachrichten Plattdüütsche Narichten vun'n 5. April 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 5. April 2024

  • Israel lett mehr Hölp to
  • Mehr Düütsche sünd bang för en Krieg
  • Autos anmellen – Nich in´t Internet
  • Nejet Heevammenzentrum in Fegebüdel
  • Marineschipp kaamt na Wilhelmshaven torüch
  • Dat Weer
Bild: Radio Bremen

Informationen zum Audio

Israel lett mehr Hölp to

Tel Aviv. Israel hett mehr Hölp för de Minschen in Noot för den Gaza-Striepen toseggt. Eerstmal warrt de Haven vun Aschod as ok de Grenzövergang Erez open makt. So kann lichter Hölp in den Noorden vun den Gaza-Striepen kamen. Israel harr dat na en Telefonat twüschen US-Präsident Biden un Ministerpräsident Netanjahu ankünnigt. De US-Regerung harr toletzt ehrn Druck op de israelisch Regerung starker makt, mehr gegen dat groot Malöör in de Noot bi de Minschen in den Gaza-Striepen to doon.

Mehr Düütsche sünd bang för en Krieg

Berlin. De Kriegsangst vun de Düütschen is na den Inmarsch vun Russland in de Ukraine düütlich mehr un mehr wurrn. In den ARD-Düütschlandtrend sehn 67 Perzent de Sekerheit un den Freden in Europa stark or bannig stark bedrauht. Dat sünd binah dartig Perzent mehr as för fief Johr. 21 Perzent vun de Lüüd, de se fragt hebbt, sehn in den Ukraine-Krieg en Probleem vun Bedüden. Dat is en Anstieg vun twölf Perzent siet verleden September.

Autos anmellen – Nich in´t Internet

Bremen. In Bremen könen Autos in Ogenblick nich in dat Internet tolaten weern. Buten-un-binnen hett to weten kriegen, dat de Binnenbehöörd dat Internet-Angebott, wo dat geiht, al to´n Enn vun dat verleden Johr afstellt hett. Grund is en mööglich Sekerheitslock. Solang dat Probleem noch dor is, verbeedt dat Kraftfohrtbunnsamt Bremen un anner Kommunen, dat Internetportal to bedrieven. Dat Angebott för dat Online-Tolaten vun Autos weer blots veer Maand freegeven.

Nejet Heevammenzentrum in Fegebüdel

Bremen. In den Bremer Stadtdeel Fegebüdel warrt an´n Vörmiddag en nejet Heevammenzentrum open makt. Dat is dat drütte Angebott vun düsse Oort: Noch twee Heevammenzentren gifft dat in Oosterholt un Gröpeln. Dor könen sick Familien över Schwangertiet, Geboort un de Pleeg dorna Raatslääg hollen. Se wurren extra in den Stadtdelen inricht, wo dat nich so vele Mudders Griepersch gifft.

Marineschipp kaamt na Wilhelmshaben torüch

Wilhelmshoben. Binah dree Maand weer dat düütsche Marineschipp „Bonn“ op en Nato-Mischoon. An´n Vörmiddag warrt dormit rekend, dat dat Schipp torüch na Wilhelmshoben kaamt. De Insatzkoppelverorger mit 183 Suldaatschen un Suldaten an Bord weer in de Noord- un Oostsee as ok in den Noordatlantik ünnerwegens.

Dat Weer

Un nu noch en Blick op dat Weer: In Cloppenborg, in Bremen-Mitt un in Bremerhaben elven un in Leer sünd dat opstunns twölf Graad. Vundag sünd de Wulken meist dicht. Eerstmal regent dat hier un dor. Af Middag denn överall. In´n Verloop vun den Namiddag sünd ok deegte Regenschuer or Blitz un Donnerschlag dorbi. An´n Avend lockert dat en beten op un de Sünn kann viellicht kort dör de Wulken kieken. De Wind weiht in Maten bit frisch, an de See af un an stark vun de Süüden Kant. Dat Thermometer wiest 13 bit 15 Graad op de Eilannen. 16 bit 18 Graad an´t Land. In de Nacht sünd nich so vele Wulken an´n Heven. Hier un dor kann man de Sterns sehen und at blifft dröög. In de tweten Nachthälft trecken mehr un mehr Wulken op. Thein bit twölf Graad stahn denn op dat Thermometer. Morn fangt de Dag faken mit dichten Wulken an. An´n Morgen gifft dat hier un dor Spütterregen. To´n Namiddag lockern de Wulken op un de Sünn schient bi 22 bit 26 Graad. Sünndag: En Mischmasch ut dichten Wulken un Sünnschien. Af un an en beten Regen bi 16 bit 22 Graad.

Dat weern de Narichten op platt. Tohoopstellt hett se Gerrit Busch. Op Platt trechtmaakt un vörleest vun Markus Weise.

Bremen Eins Livestream & aktuelle Sendung.

Der Nachmittag mit Dirk Böhling

Der Nachmittag

Jetzt läuft:

Milow Howling At The Moon
  • Jetzt läuft:

    Milow Howling At The Moon