Plattdeutsche Nachrichten Plattdüütsche Narichten vun'n 04. April 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 04. April 2024

  • Nato is 75 Johr
  • Dusende Reddungsswümmer un Baadmester fehlen
  • Versekerung wahrschaut vör jümmer gröttst Containerfrachtern
  • In Bremen fehlen wiederhen Schoolmester
  • Langemarckstraat in Bremen schall en nee´en Namen kriegen
  • Dat Weer
Bild: Radio Bremen

Informationen zum Audio

Nato is 75 Johr

Brüssel: Vör 75 Johr is de NATO grünnt wurrn, dat fiert hüüt dat Bündnis för Verdeffenderen. De Liddmaten hebbt en Kranz daalleggt, üm an de sturven Nato-Suldaten, trüchtodenken. To´n eersten Mal warrt dat Originalpapeer vun den Noordatlantik-Verdrag in dat Brüsseler Hauptquateer utstellt. De USA un ölven wiedere Länner hebbt damals dat Afkamen an den 4. April 1949 in Washington ünnertekent. Se hebbt sik so gegensiedig Bistand gegen de Sowjetunion tosekert.

Dusende Reddungsswümmer un Baadmester fehlen

Berlin: In dat Berliner Strandbad Wannsee gung dat swimmen al los, dorgegen duert dat in Bremen noch, bet de Freebadtiet losgeiht. Veel Städer söökt just na Reddungsswümmer un Baadmeesters. Meist fehlen twuschen 2.000 un 3.500 Swimmmeester in Düütschland. Meent sünd Fachlüüd, de sik blangenbi dat Oppassen in en Bad ok üm de Technik un de Waterweerten kümmern. Wenn nich noog Personaal funnen warrt, drauht dat een or annere Bad dicht to maken.

Versekerung wahrschaut vör jümmer gröttst Containerfrachtern

Unterföhring: Achterna Enn März en Brüch in Baltimore, vunwegen en Containerfrachter tosamenbraken is, wohrschaut de Allianz-Versekerung vör dat Risiko vun jümmer gröttst Containerfrachtern. De Tahl vun Schippsmalören sünd verleden Johren twars weniger wurrn, man Twüschenfäll mit groten Containerfrachters un Wagentransporter lösen grötter Schadens ut. En Ratingagentur hett den Schaden in Baltimore op rund twee bet veer Milliarden Dollar schätzt, dormit is dat de gröttst Seeversekerungsschaden in de Geschicht.

In Bremen fehlen wiederhen Schoolmester

Bremen: Liekers de Gebortentahlen rünner gahn sünd, bruukt Bremen un Bremerhoben bet Enn vun düt Johrteihnt extra Grundschoollehrkräft, dat is bi en Utsicht vun dat Billungsressort rutsuert. Twars warrn weniger Kinner boren as fröher, man dör Towannern un flüchten Minschen stiggt de Tahl an Versorgen un Schoolplätz in dat Land Bremen. Dat Billungsressort rekent dormit, dat de Tahl vun Grundschöölers eerst 2028 toröchgeiht.

Langemarckstraat in Bremen schall en nee´en Namen kriegen

Bremen: De Langemarckstraat in de Bremer Neestadt schall en annern Namen kriegen. Georg-Elser-Allee schall se in Tokunft heeten. An Namiddag schall dat de tostännige Baudeputatschoon fastleggen. Dor achter stickt, dat Langemarck en Oort in Belgien is, wo in de Nöögde bööse Kämp in den eersten Weltkrieg stattfunnen hebbt. De Nazis hebbt düsse Slachten later as „Mythos vun Langemarck“ hochleven laten. Man Georg Elser is gegen dat natschonaalsozialistsche Regiem angahn.

Dat Weer

Un nu kiekt wi op dat Weer: In Emm hebbt wi 9 Graad, in Bremen, Bremerhoben un Cuxhoben sünd dat opstunns 10 Graad. Hüüt vörmiddag breeden sik dicke Wulken un Regen vun dat Emsland bet na de Elv ut. Övern Namiddag pladdert dat örntlich, an Avend warrn de Schuers weniger un man süht ok mal blau mang de Wulken, .un dat bi 11 bet 12 Graad op de Eilannen un 13n bet 14 Graad in Bremen un umto. In de Nacht mal mehr mal weniger Wulken, Schuers sünd ok af un an dorbi. Na Middernacht blifft dat eerst överall dröög, an fröhen Morgen kann dat in Ostfreesland Schuers geven. Dat Thermometer wiest us 9 bet 7 Graad. Morgen hangt de Heven wedder vull Wulken. An Vörmiddag lockern de aver twuschen dat Ollenborger Münsterland un de Aller ok mal op. Af un an kann dat regnen. Övern Namiddag pladdert dat ok kräftig, ehrder dat vun Westen her to´n deel oplockert. Dat Thermometer kladdert licht na baven mit 16 bet 19 Graad in´t Binnenland un 13 bet 15 Graad op de Eilannen.

Dat weren de Plattdüütschen Narichten. Tohoopstellt vun Sven Weingärtner. Op Platt trechtmaakt un vörleest vun Martina Brünjes.

Bremen Eins Livestream & aktuelle Sendung.

Der Nachmittag mit Dirk Böhling

Der Nachmittag

Jetzt läuft:

Bangles Walk Like An Egyptian
  • Jetzt läuft:

    Bangles Walk Like An Egyptian