Plattdeutsche Nachrichten Plattdüütsche Narichten vun'n 26. März 2024

Instörrten vun Brügg in Baltimore na Tohoopkrachen mit een Schipp

Baltimore – In de Stadt in’n US-Bunnesstaat Maryland hett een Frachtschipp in de Nacht een Brügg mit veer Sporen rammt. Dat Boowark is darophen to grotten Delen instörrt. Op Videos is to sehn, dat mehrere Autos in de Deepde störrt. Dar sünd woll Minschen in dat Water fullen, sä een Polizeispreker to den Sender NBC. De Brügg is mehr as twee-eenhalf Kilometer lang un föhrt över den Haben vun de Stadt in’n Nordosten vun de USA.

Bahn un GDL sünd sik eenig

Berlin – De Lokföhrergewarkschupp GDL un de Dütsche Bahn sünd na ehrn Tarifstriet, de maandelang duert hett, op een Brett kamen. Dat gifft nu keen Streiks mehr, is an’n Abend vermellt worrn. Wat se nipp un nau besluten hebbt, wüllt Bahn un GDL an’n Vörmiddag jeder för sik vörstellen. De Bahn hett jüst vermellt, dat de 35-Stünnen-Week bit 2029 ümsett warrn schall. Buterdem gifft dat 420 Euro mehr Lohn in twee Schreden.

Faeser will Grenzkuntrullen to de Football-EM

Berlin – Bunnesbinnenministersche Faeser hett to de Football-Europameisterschupp in’n Sommer Kuntrullen an allen dütschen Grenzen ankünnigt. Op düsse Oort schüllt Lüüd, de villicht Krawall un Arger maken wüllt, nich in’t Land rinkamen, sä de SPD-Politikerin to de „Rheinische Post“. Dat geiht üm den Schutz vör Islamisten un annern Extremisten, vör Hooligans un annern Hauern as ok de Sekerheit vun de Netten vör Angrepen vun Internet-Verbrekern. De Football-EM geiht an’n 14. Juni loos.

Neddersassen gifft Wulf to’n Afscheten free

Hannober – Neddersassen sett as erstet Bunnesland dat so nöömte Gau-Afscheten-Verfohren för Wülv üm. In dat Flach Hannober draff vun’n Abend an een Wulf afscheten warrn, de an’n Wekenenn een Rind reten hebben schall. Ümweltminister Meyer verklaart, to’n Schutz vun de Grasland-Deerten mööt se gau hanneln. De Ümweltminister vun Bund un Lännern harrn sik in’n Dezember darop eenigt, dat se för dat Afscheten vun vigeliensch Wülv, anners as bitnu, nich mehr op een Gen-Ünnersöken töven mööt.

Köhlenkraftwark Bremen-Faarg is fröher afschalt worrn as plaant

Bremen – Dat Köhlenkraftwark in Bremen-Faarg is all siet knapp een Maand nich mehr an’t Nett. Dat hett butenunbinnen op Nafraag bi’n Bedrever Onyx to weten kregen. Vun Amts wegen wullen se dat Kraftwark erst an’n Sünndag afschalten. Wegen een Schaden an’n Kedel weer dat Kraftwark aver all an’n Enn vun’n Februar rünnerfohrn worrn, vermellt een Sprekersche vun dat Ünnernehmen.

Dat Weer

Un nu een Blick op dat Weer: op Wangerooge 6, in Bremerhaben 7 un in Bremen un Deefholt sünd dat opstunns 8 Graad. Hüüt is de Dag dröög, dat gifft Sünnschien un een paar Wulkenfellers, de vör allens an’n Namiddag ok mal dicker sien köönt. Villicht ok wegen Saharastuff. Dat ward milder as toletzt bi 12 bit 15 Graad. Tokamen Nacht is dat faken locker wulkig, hier un dar ok mal klaar un dröög. Dat blifft milder as verleden Nacht, dat Thermometer sackt op 7 bit 4 Graad. Morrn treckt na een fründlich Vörmiddag mit een beten Sünnschien an’n Namiddag dickere Wulken mit een beten Regen op – bi 11 bit 15 Graad. Donnerdag jümmer wedder mal Regen, mal een beten Sünn, bi 11 bit 14 Graad. Dat weern de Narichten op Platt. Anja Guse hett se tohoopstellt. Op platt trechtmaakt un vörleest hett se Heidi Jürgens.