Plattdeutsche Nachrichten Plattdüütsche Narichten vun'n 25. März 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 25. März 2024

  • Gericht in Moskau schickt vermoden Terroristen achter de Trallen
  • Butenministersche Baerbock reist in’n Oosten Blangenbi
  • Frist to’n Tahlen för Trump löppt af
  • Perzess gegen Klimaaktivisten fangt an
  • Fischtown Pinguins sünd ünner de letzten Veer
  • Dat Weer
Bild: Radio Bremen

Informationen zum Audio

Gericht in Moskau schickt vermoden Terroristen achter de Trallen

Moskau – Na de Terrorattack in een Kunzerthall hett een Gericht güstern Abend veer Lüüd, vun de se vermoden sünd, dat se dat daan hebbt, achter de Trallen bröcht. Se mööt toerst för twee Maand in Ünnersökenshaft. Dree vun de Mannslüüd hebbt sik schüllig bekannt, vermellt Russland. De Tadschiken kamen swar versehrt to de Verhandlung. Russische Medien vermellt, dat se woll foltert worrn sünd. Bi den Anslag Freedag sünd tominnst 137 Minschen üm’t Leven kamen un mehr as 180 versehrt worrn. De Terrororganisatschon Islamischer Staat hett seggt: jo, wi stickt darachter.

Butenministersche Baerbock reist in’n Oosten Blangenbi

Kairo – Bunnesbutenministersche Baerbock is wedder in den Oosten Blangenbi reist. An’n Vörmiddag dreept se sik erst mit den ägyptischen Butenminister Schukri. Later reist Baerbock na Israel un in de Palästinenserrebeete wieter, wo se ünner annern Israels Butenminister Malki un Palästinenserpräsident Abbas drepen ward. Vörweg harr Baerbock een Füerpaus för de Minschen foddert, batz op de Stäe.

Frist to’n Tahlen för Trump löppt af

Nee York – För den ehemalig US-Präsidenten Donald Trump löppt vundaag de Frist to’n Betahlen af. He is wegen Bedregeree verurdeelt un mutt 454 Millionen Dollar vörleggen – in bar or in Form vun een Börgschaft. De gröttste Deel vun Trumps Geld un Goot stickt aver in Hüüs un Boten. Wenn he hüüt nich tahlt, kann de tostännige Generalstaatsanwältin sien Konten fastsetten un Hüüs as Pand nehmen.

Perzess gegen Klimaaktivisten fangt an

Bremen – Vör dat Amtsgericht hett an’n Morrn een Perzess gegen een paar Littmaten vun de „Letzte Generatschon“ anfungen. Darbi geiht dat üm twee Aktschonen, bi de sik de Beschülligten op de Straat sett un to’n Deel ok fastbackt hebben schüllt. De Blockaden hebbt bit to twee Stünnen duert, wat to Staus föhrt hett. De anklaagten Manns- un Froonslüüd mööt sik darüm wegen Nötigung verantwurten.

Fischtown Pinguins sünd ünner de letzten Veer

Bremerhaben – In de Dütsche Ieshockey-Liga sünd de Fischtown Pinguins to’n ersten Mal in de Geschicht vun ehrn Club ünner de letzten Veer kamen. De Bremerhabener hebbt an’n Abend ok dat veerte Viddelfinal-Speel bi’n ERC Ingolstadt wunnen un twars mit 3 to 1. De Gegner vun de Pinguins in’t nöchste Speel an’n Ostermondag steiht noch nich fast.

Dat Weer

Un nu een Blick op dat Weer: op Wangerooge 6, in Bremen, Bremerhaben un Deefholt sünd dat opstunns 7 Graad. Vundag sünd erst noch Wulken an’n Heben un dat kummt ok mal een beten natt vun baben. Vun’n Middag un Namiddag an kiekt de Sünn twüschen de dicken Wulken fakener rut. Hier un dar sünd noch verenkelt Schuers ünnerwegens, dat blifft aver ok dröög – bi 8 bit 10 Graad. Tokamen Nacht is dat faken locker wulkig, to’n Deel ok klaar un dröög. Dat Thermometer sackt op 5 bit null Graad. In’t Binnenland kann dat een beten Boddenfrost geven. Morrn wesselt sik Sünn un Wulken af, dat blifft dröög un darbi ward dat milder bi 12 bit 15 Graad. Dat weern de Narichten op Platt. Gabriele Intemann hett se tohoopstellt. Op platt trechtmaakt un vörleest hett se Heidi Jürgens.

Bremen Eins Livestream & aktuelle Sendung.

Grüße und Musik mit Britta Uphoff

Grüße und Musik

Jetzt läuft:

Patrick Hernandez Born To Be Alive
  • Jetzt läuft:

    Patrick Hernandez Born To Be Alive