Plattdeutsche Nachrichten Plattdüütsche Narichten vun'n 22. März 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 22. März 2024

  • Bunnsrat stimmt över Cannabis-Gesetz af
  • EU-Staaten verlangen en Füerpaus in Gaza
  • Hoochwater hett Millionenschaden an de Straten in Neddersassen anricht
  • In Bremen fangt de Oosterwiese an
  • Werder wiest Spekulatschonen över Ut vun Vereenspräsident Hess-Grunewald torüch
  • Dat Weer
Bild: Radio Bremen

Informationen zum Audio

Bunnsrat stimmt över Cannabis-Gesetz af

Berlin. In den Bunnsrat geiht dat vundag üm dat rechtliche Afsekern vun Cannabis. Dat Gesetz dorför hett de Bunnsdag al besloten. Nu sünd de Länner fraagt. De könen de nejen Regeln man nich heel un deen opholen, aver den Utschuss för Vermiddeln anropen. Wenn dat passeert, is nich dormit to reken, dat dat Gesetz to´n planten Termin an´n eersten April gellt. Af denn schall de Besitt un de Anbo vun de Droog för sick sülfst för grote Lüüd verlööft ween. För junge Lüüd is en Opkläär-Programm plant.

EU-Staaten verlangen en Füerpaus in Gaza

Brüssel. De EU-Staats- un Regerungsböversten hebbt to en stantepee Füerpaus in den Gazastriepen opropen. Op ehr Drapen in Brüssel hebbt se tosamen en Positschoons-Poppier dorför op den Disch leggt. Dor binnen steiht, de Paus schall to en Füerpaus op lange Sicht föhren. De Hamas warrt dorto opropen, all Geiseln free to laten, ohn wiedere Bedingen to stellen. Bavento repen de EU-Politiker Israel dorto op, vun de planten Angrepen an´n Bodden in Rafah Afstand to nehmen.

Hoochwater hett Millionenschaden an de Straten in Neddersassen anricht

Hannover. Dat Hoochwater in´n Winter hett den Straten in Neddersassen bannig tosett. As de Hannoversche Allgemene Zeitung vermellt, sünd bet nu Schadens vun 32 Millionen Euro an Lannsstraaten op de List. De Zeitung weet dat vun dat Verkehrsministerium. An´t Enn kann viellicht de Bedrag noch höger ween, wiel betto blots de bit Enn Februar faststellden Schadens inrekend wurren.

In Bremen fangt de Oosterwiese an

Bremen. Mit de Oosterwiese fang op de Börgerweid vundag een vun de gröttsten Fröhjohr-Festen in Düütschland an. Mehr as 180 Schausteller-Bedrieven sünd bit to´n söventen April mit dorbi. För de Sekerheit vun de Besökers warrt de Polizei mit normalen Schandarms un Schandarms in Uniform vör Oort ween. De Togäng weern dör en Sekerheitsdeenst kuntrullert.

Werder wiest Spekulatschonen över Ut vun Vereenspräsident Hess-Grunewald torüch

Bremen. Football - Bunnsligist Werder Bremen hett Spekulatschonen över en Krittelee in den Vereen un en mööglich Ut vun Vereenspräsident Hubertus Hess-Grunewald scharp torüchwiesen. De Gremien stahn tohoop achter Hess-Grunewald. So steiht dat in en Poppeer för de Press. De Deichstube, de en mööglichen Striet bi de Vereens-Böversten vermellt hett, smiet dat Präsidium, de Geschäftsböversten, de Opsichtsrat un de Ehrenrat vun Werder vör, dat de Deichstube journalistisch Grundsatzen verletzten.

Dat Weer

Un nu noch en Blick op dat Weer: In Emden thein, in Bremen-Mitt elven, in Bremerhaben thein un in Hude sünd dat opstunns elven Graad. Vundag meist dichte Wulken. De Sünn schafft dat nich dör to kieken. Vun de Nordsee fangt dat an to pladdern. Hier un dor blifft de Regen ok en beten länger. An´n Avend warrt dat wedder dröög. De Wind weiht in Maten. An de See to´n Deel frische Wind vun de süüdwesten bit westen Kant. Op de Eilannen wiest dat Thermometer negen bit thein Graad. Elven bit darthein Graad an´t Land. In de Nacht trecken de Regenwulken af un man kann de Sterns sehen. Man to´n Morgen kann dat hier un dor wedder Natt vun baven kamen. Dree bit söss Graad wiest dat Thermometer. Morn blifft dat eerstmal noch dröög. Denn trecken Wind un Regen op. Hier un dor ok Blitz un Donnerslag mit Grisselgrussel. En klass´sch Aprilweer mit korten Regenpausen bi Sünnschien. Acht bit thein Graad stahn op dat Thermometer. Sünndag: Jümmer wedder mal en Wessel ut dichten Wulken un en beten Sünnschien. Dorto ok noch Regenschuer bi söven bit thein Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.

Bremen Eins Livestream & aktuelle Sendung.

Der Nachmittag mit Dirk Böhling

Der Nachmittag

Jetzt läuft:

Glenn Frey Part Of Me, Part Of You
  • Jetzt läuft:

    Glenn Frey Part Of Me, Part Of You