Plattdeutsche Nachrichten Plattdüütsche Narichten vun'n 23. Februar 2024

Eerste kommertschelle Landung op den Maand hett klappt

Housten. To´n eersten Mal in de Geschicht vun de Ruumfohrt hett en kommertschelle Landung op den Maand klappt. De Weltruumfleger „Odysseus“ vun en US-amerikanisch Ünnernehmen is in de Nacht op den Bodden vun den Maand ankamen. Dat vermellt de Nasa. Minschen weern nich an Boord. Dat weer de eerste Landung op den Maand vun de USA siet mehr as fofftig Johren. In wat för en Tostand „Odysseus“ is, is noch nich klor, denn dat Kuntrollzentrum het betto schienbor blots swacke Signale kregen.

EU-Zentraal gegen Geldwäsch kaamt na Frankfurt

Brüssel. De neje Anti-Geldwäsch-Behöörd vun de Europäisch Union kaamt na Frankfurt an´n Main. Dat hebbt Vertreder vun de EU-Staaten un vun dat Europaparlament besloten. De düütsche Bewarven sett sick dormit gegen acht europäisch Steden dör. Dorünner weern ok Rom, Wien, Madrid un Paris. De Behöörd schall ingriepen könen, wenn natschonal Behöörden ehr Opsichtsplicht nich henkriegen.

Bunnsdag will Cannabis tolaten

Berlin. De Bunnsdag stimmt an´n Namiddag över dat deelwies rechtliche Tolaten vun Cannabis af. Dormit schall de Anbo un Besitt vun bestimmten Mengden vun de Droog för grote Lüüd tolaten weern. Af de Mitt vun dat Johr schüllt den ok Cannabis-Clubs tolaten weern. Jüstso schall de Schutz för junge Lüüd beter makt weern. De Ampel-Koalitschon will dormit en Wenn in de Drogenpolitik in Gang bringen.

Bremen bekriddelt Bunnsregerung wegen Autobahn-Schaden

Bremen. De Wirtschaftssenatoorsche Vogt süht de Schuld an de Autobahn 27 bi den Bund. De Streek twüschen Bremen un Bremerhaben muss för en kotte Tiet bi Hagen dicht makt weern, wiel de Bahn ünnerspölt weer. Vogt see, de Bunnsregerung hett de Infrastruktur „kaputtsport“. För den Containerverkehr bringt dat kumplette Dichtmaken lege Maleschen: De Ünnernehmen sünd bang, dat sick dat orrig hentreckt. Pro Week sünd tominnst 20.000 Containerfohrten bedrapen, see Vogt.

Stormnacht: Enigermaten dorvun wegkamen

Bremen. Stormdeep „Wencke“ hett in de Nacht blots minne Schadens anricht. Op de Autobahn 28 bi Westerstäe sünd en poor Autos mit ümstörten Bööm tosamenstööt. Minschen sünd dorbi aver nich to Schaden kamen. In den Landkreis Ollenborg un in Oostfreesland feeg de Storm Dackpannen vun en poor Däcker. Op Bosteden wurr Styropor un anner Saken mitreten. An den Bremer Flegerhaben sünd an´n Morgen dree Flöög utfullen. All tohoop sünd wi in de Stormnacht energiermaten dorvun wegkamen. Dat vermellt de Polizei un de Füerwehr.

Dat Weer

Un nu noch en Blick op dat Weer: In Weiherbarg, in Bremen-Mitt un in Bremerhaben söss un in Emden sünd dat opstunns fief Graad. Hüüt Vörmiddag lockern de Wulken op. Eerstmal trecken blots enkelte Regen- un Grisselgrussel-Schuer dör. Af den Middag kaamt dat fakener Natt vun baven. De Wind weiht nich mehr so dull as verleden Nacht. En poor stiefe Böen sünd aver möglich. Dat Thermometer wiest söven bit thein Graad. In de Nacht sünd blots noch en poor Wulken an´n Heven un man kann af un an de Sterns sehen. Mennigmal aver ok dichte Wulken. Hier un dor is en Regenschuer dorbi. Een bit veer Graad stahn denn op dat Thermometer. Morn schient neven mal lockeren, mal dichten Wulken, af un an de Sünn. Af den Middag fangt dat wedder an to pladdern. Hier un dor is ok Blitz un Donnerslag möglich. De Temperaturen liggen bi söven bit thein Graad. Sünndag: Sünnschien, dichte Wulken un enkelte Regen- un Grisselgrusselschuer bi söss bit negen Graad. Dat weern de Narichten op platt. Tohoopstellt hett se Gerrit Busch. Op Platt trechtmaakt un vörleest vun Markus Weise.