Plattdeutsche Nachrichten Plattdüütsche Narichten vun'n 19. Februar 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 19. Februar 2024

  • Bremer Linke will de Schullenbrems strieken
  • Verdi-Streiks bi de Lufthansa ward bekrittelt
  • Busse un Bahnen in Neddersassen staht still
  • Trüchdenken an Anslag vun Hanau
  • Streik vun Arbeiders för Bremer Krankenhüüs
  • Dat Weer
Bild: Radio Bremen

Informationen zum Audio

Bremer Linke will de Schullenbrems strieken

Bremen – De Linke will sik darför stark maken, dat de Schullenbrems ut de Lannesverfaten striekt ward. Dat hett se op een Parteidag an’n Wekenenn besluten. För den Schreed is een Ännern vun de Verfaten nödig – darför will de Bremer Linke een Volksafstimmen dörföhrn laten.

Verdi-Streiks bi de Lufthansa ward bekrittelt

Frankfurt – De Lufthansa hett den ankünnigten Streik to’n Wahrschaun vun’t Boddenpersonal bekrittelt. As dat Ünnernehmen vermellt, ward darvun 100-dusend Passageere bedrapen sien. As de Gewarkschupp Verdi vermellt, schall de Streik to’n Wahrschaun morrn fröh anfangen un bit Middeweken morrn duern – ok de Hamborger Flegerhaben is bedrapen.

Busse un Bahnen in Neddersassen staht still

Hannober – In Neddersassen fallt in een paar Oorten Busse un Bahnen ut. Darachter stickt een Streik to’n Wahrschaun bi de Arbeiters vun de Verkehrsünnernehmen vun de Gemeenden. Dat geiht ünner annern üm Ossenbrügg, Hannober un Bruunswiek. De Gewarkschupp Verdi foddert ünner annern mehr Urlaub un längere Tieden to’n sik verhalen. Anners as bi‘n letzten Oproop to’n Streik sünd düttmal Bremen un Wilhelmshaben nich bedrapen.

Trüchdenken an Anslag vun Hanau

Hanau – Veer Johr na den Anslag vun Hanau ward hüüt an de Doden trüchdenkt. Op den Haupt-Karkhoff vun de Stadt gifft dat een still Trüchdenken, Reden ward dat nich geven. Ok in Berlin un Bremen-Walle sünd Mahnwachten un een Gedenkfier plaant. In Hanau harr vör veer Johren een Neonazi negen Minschen mit utlännschen Wuddeln daatschaten, achternah hett he sien Mudder un sik sülfst ümbröcht.

Streik vun Arbeiders för Bremer Krankenhüüs

Bremen – Wegen een Streik to’n Wahrschaun in de Krankenhüüs vun de städtisch Kliniksellschupp „Gesundheit Nord“ kann dat sien, dat nich allens glatt loopt. De Gewarkschupp Verdi hett Arbeiders vun de GeNO-Dochter GND to’n Streik opropen. Bedrapen sünd vör allens de Reinigung vun Operatschonsälen un Laboren or to’n Bispill de Wäscheree. Medizinisch Nootfälle ward aver behannelt, vermellt Verdi.

Dat Weer

Un nu een Blick op dat Weer: op Wangerooge 7, in Bremen, Bremerhaben un in Deefholt sünd dat opstunns 8 Graad. Hüüt sünd meist dicke Wulken an’n Heben, dat lockert blots selten op. Darto fallt af un an een beten Regen, an’n Abend ward dat fakener natt – bi 7 bit 10 Graad. Tokamen Nacht regent dat erst jümmer wedder een beten, na Middernacht treckt de Wulken af un dat lockert op. Dat Thermometer sackt op 7 bit 5 Graad. Morrn gifft dat meist vele Wulken, de Sünn kiekt blots af un an mal rut. Darbi regent dat meist nich, ehrdat an’n Namiddag un Abend vun Nordsee un Emsland her een paar Schuers optrecken – bi 8 bit 11 Graad. Middeweken vele Wulken, blots een beten Sünn un af un an Regen bi 9 bit 12 Graad. Dat weern de Narichten op Platt. Sven Kuhnen hett se tohoopstellt. Op platt trechtmaakt un vörleest hett se Heidi Jürgens.

Bremen Eins Livestream & aktuelle Sendung.

Die Nacht

Die Nacht

Jetzt läuft:

Silbermond Irgendwas Bleibt
  • Jetzt läuft:

    Silbermond Irgendwas Bleibt