Plattdeutsche Nachrichten Plattdüütsche Narichten vun'n 16. Februar 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 16. Februar 2024

  • 60. Müncher Sekerheitskonferenz fangt an
  • Selenskyj to Gast in Berlin
  • Greeksch Parlament besluut Homo-Eh
  • Perzess gegen twee womöögliche Hisbollah-Liddmaten fangt an
  • Autofohrer levert sick Verfolgensjagd mit de Polizei
  • Dat Weer
Bild: Radio Bremen

Informationen zum Audio

60. Müncher Sekerheitskonferenz fangt an

München. An´n Nadmiddag fangt de sösstigste Sekerheitskonferenz vun München an. To´n Optakt snackt de UN-Generalsekretär António Guterres. To dat Drapen warrt mit rund fofftig Staats- un Regerungsböverste ut de ganzen Welt rekend. De groden Themen sünd de Kriege in de Ukraine un in den Oosten Blangenbi.

Selenskyj to Gast in Berlin

Berlin. De ukrainisch Präsident Wolodymyr Selenskyj kaamt to´n tweeten Mal siet den russ´sch Angreep op sien Land to en amtlich Besöök na Düütschland. In Berlin drapt he Bunnskanzler Olaf Scholz. Plant weer, dat beide en Afkamen mit  Sekerheitstolagen op lange Sicht vun Düütschland an de Ukraine ünnerschrieven. Achteran reist Selenskyj wieder na Paris, üm mit Frankriek ok so en Verdrag to maken.

Greeksch Parlament besluut Homo-Eh

Athen. Homosexuelle Ehporen hebbt in Grekenland in Tokunft desülvigen Rechten un Plichten as heterosexuelle Poren. Dat greeksch Parlament hett mit den allermeisten Stimmen de Eh för Poren mit dat glieke Geslecht besloten. Se könen ok Kinner adopteren. Grekenland is dat eerste christilich-orthodoxe Land, dat dat möglich makt.

Perzess gegen twee womöögliche Hisbollah-Liddmaten fangt an

Hamborg. To´n eersten Mal stahn twee Liddmaten vun de libanes´sch Hisbollah in Düütschland in de Anklaag. De beiden Anklagten, vun de se meent, de dat daan hebben schüllt, weern in´n Mai vun dat verleden Johr in den Landkreisen Auerk un Cuxhaben fastnahmen wurren. De Bunnsavkaatschaft smiet den beiden Anklagten vör, dat se Liddmaten in en terroristisch Verenigung in en anner Land sünd.

Autofohrer levert sick Verfolgensjagd mit de Polizei

Ollenborg. En Autofohrer hett sick güstern op de Autobahn 28 en Verfolgensjagd mit de Polzei levert. De Autobahnpolizei wull den Fohrer an´n Avend kontrolleren. De geev aver Gas un haude över Westerstäe bit na Rhauderfehn af. De Polizei fohr achter em ran un kunn em eerst na rund een Stünn mit en Nagelbrett stoppen. De 39 Johr old Keerl harr kien Föhrerschien un hett Drogen nohmen. Gegen em legen bavento Haftbefehle vör.

Dat Weer

Un nu noch en Blick op dat Weer: In Ollenborg un Bremen-Mitt elven, in Bremerhaben twölf un in Brinken sünd dat opstunns thein Graad. Hüüt sünd al an´n Anfang vun´n Dag vele Wulken an´n Heven. Dat is aver eerstmal dröög. In´n Verloop sünd korte Schuer in´t Emsland un in Oostfreesland möglich. An´n Namiddag un Avend hebbt de Wulken de böverste Hand un dat kaamt vun West na Oost Natt vun baven. De Wind weiht en beten. Vun de süüd över de süüdwesten Kant dreiht de Wind af un an frisch bit stark op. Dat Thermometer wiest elven bit foffthein Graad. In de Nacht gifft dat vele Wulken un enkelte Schuer. Dat blifft meist dröög bi söss bit negen Graad. Morn steiht en Wessel ut dichten Wulken un Sünnschien op dat Weer-Programm. Dat blifft dröög bi acht bit thein Graad. Sünndag: Dichte Wulken un Regen bi acht bit elven Graad. Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Markus Weise.

Bremen Eins Livestream & aktuelle Sendung.

Die Nacht

Die Nacht

Jetzt läuft:

Alphaville Big In Japan
  • Jetzt läuft:

    Alphaville Big In Japan