Plattdeutsche Nachrichten Plattdüütsche Narichten vun'n 12. Februar 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 12. Februar 2024

  • CDU un AfD leggt bi Wahl in Berlin een beten to
  • Israel mellt: twee Geiseln sünd free
  • Rheinmetall fangt mit Boo vun Munitschoonsfabrik an
  • Perzess gegen Drogenhöker in Bremen hett anfungen
  • Hoochwaterlaag in Bremen-Borgfeld is noch ruhig
  • Dat Weer
Bild: Radio Bremen

Informationen zum Audio

CDU un AfD leggt bi Wahl in Berlin een beten to

Berlin – Bi dat Deel-Wedderholen vun de Bunnesdagswahl in Berlin hebbt de Ampelparteien Stimmen verloorn . As de Lanneswahlleitung vermellt, blifft de SPD man wieter vörn, achter se de Grönen. De CDU leggt een beten to, de AfD treckt an de FDP vörbi. De Linke kann ehr Ergevnis hollen. Bi de Mehrheiten in’n Bunnesdag verschuuvt sik aver nix. Dat Parlament hett in Tokunft blots een Sitz weniger, wiel bi de FDP een Mandat wegfallt.

Israel mellt: twee Geiseln sünd free

Gaza – De israelsche Armee vermellt, dat se twee Geiseln ut’n Gazastriepen free kregen hett. Dat hannelt sik woll üm twee Mannslüüd in’n Oller vun 60 un 70 Johren. Se sünd woll bi gode Gesundheit. As de Armee vermellt, sünd de beid Geiseln ut Rafah in’n Süden vun’n Gazastriepen ruthalt worrn. In de Nacht harr Israel dat Rebeet ut de Luft angrepen. Darbi sünd mehr as 100 Minschen üm’t Leven kamen, vermellt de palästinensche Siet. Darünner schüllt ok Froons un Kinner sien.

Rheinmetall fangt mit Boo vun Munitschoonsfabrik an

Unnerlüß – De Rüstenkunzern Rheinmetall fangt mit den Boo vun een nee’e Munitschoonsfabrik an sien Steed Unnerlüß in Neddersassen in’n Kreis Celle an. Ok Bunneskanzler Scholz un de Minister för Verdeffenderen, Pistorius, sünd an’n Middag bi‘n symbolisch Spitt in de Eer darbi. Rheinmetall will in Unnerlüß 300 Millionen Euro utgeven un 500 Arbeitssteden schaffen. In’t tokamen Johr schall de Bedreev anfangen. Plaant is de Produktschon vun 200-dusend Granaten elkeen Johr – för de Bunneswehr un de Ukraine.

Perzess gegen Drogenhöker in Bremen hett anfungen

Bremen – An’t Bremer Landgericht hett an’n Vörmiddag de Perzess gegen acht Mannslüüd anfungen, de in Bremerhaben een Oort Leverdeenst för Kokain bedreven hebbt. De Staatsanwaltschupp smiet de Kerls dat Hökern vun Drogen vör un twars as een Bann. Dree vun de Anklaagten weern all in’n Sommer 2022 to deelwies een paar Johren achter de Trallen verurdeelt worrn, wiel se bi een Drogenleverdeenst mitmaakt hebbt.

Hoochwaterlaag in Bremen-Borgfeld is noch ruhig

Bremen – Na de Regenfälle vun de verleden Daag stiegt an een paar Strööm in Bremen un Neddersassen wedder de Gefohr vun Hoochwater. In’n Bremer Stadtdeel Borgfeld rekent se mit‘n höchsten Stand vun’n Wümme-Pegel in de nöchsten Stunnen. Man de Füerwehr glöövt nich, dat dat Water wedder so hooch kladdern ward as to’n Beginn vun’t Johr. Een paar Straten sünd wegen Hoochwater dicht, Schadens sünd aver noch nich mellt worrn.

Dat Weer

Un nu een Blick op dat Weer: op Wangerooge 6, in Bremen, Bremerhaben un in Deefholt sünd dat opstunns 7 Graad. Hüüt wesselt sik dicke Wulken un blots een lütt beten Sünnschien af, darbi sünd ok een paar Schuers ünnerwegens. An’n Namiddag wiest sik de Sünn denn vun de Ems her een beten mehr – bi 7 bit 9 Graad. Tokamen Nacht treckt de letzten Schuers gau to de Lüneborger Heid af. Darachter lockert de Wulken mal mehr, mal weniger op un dat blifft dröög - dat Thermometer sackt op 4 bit 2 Graad. Morrn treckt de denn dicken Wulken wieter na Oosten, man vun de Nordsee kummt nee’e Wulken op. Erst kann dat darüm an de Küst pladdern, later ok in’t Binnenland. Man meist blifft dat dröög bi 7 bit 9 Graad. Dat weern de Narichten op Platt. Anja Guse hett se tohoopstellt. Op platt trechtmaakt un vörleest hett se Heidi Jürgens.

Bremen Eins Livestream & aktuelle Sendung.

Die Nacht

Die Nacht

Jetzt läuft:

Michael Jackson P. Y. T. (Pretty Young Thing)
  • Jetzt läuft:

    Michael Jackson P. Y. T. (Pretty Young Thing)