Plattdeutsche Nachrichten Plattdüütsche Narichten vun'n 9. Februar 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 9. Februar 2024

  • Wedder Protesten vun Buern ok in Bremen
  • Scholz warvt in de USA för Ukraine-Militärhölp
  • Russland un Ukraine tuschen gefangene Lüüd vun´n Krieg ut
  • Verkehrsader in Bremerhaben schall enger weern
  • Stadtparlament vun Bremerhaben will Sucht-Hölp woanners opmaken
  • Dat Weer
Bild: Radio Bremen

Informationen zum Audio

Wedder Protesten vun de Buern ok in Bremen

Bremen. Wiel dat wedder Protesten vun Buern gifft, mutt in de Binnenstadt vun Bremen vundag mit Maleschen bi den Verkehr reken weern. Wedder gahn Buern gegen de Landwirtschop-Politik vun de Bunnsregerung op de Straten. An´n Namiddag wüllt se mit rund eenhunnert Treckers ut de Stadtdelen vun Bremen un vun Bremen umto in de Binnenstadt fohren. Dat vermellt de Polizei. Ünner annern wüllt se Bunnspräsident Steinmeier en Naricht geven. De Staats-Böverste is Gast bi dat gode ole Schaffermahl vunavend.

Scholz warvt in de USA för Ukraine-Militärhölp

Washington. Bunnskanzler Olaf Scholz hett sick bi en poor US-Senaters üm Militärhölp för de Ukraine insett. In de düütschen Baadschop in Washington hett Scholz Kongressafornte vun Demokraten un Republikanern drapen. De Senat harr den Plan güstern tostimmt, aver dat is nich seker, of dat Repräsentantenhuus, de tweete Kamer vun den Kongress, den Plan tostimmt. Dor hebbt de Republikaner de mehrsten Stimmen. An´n Avend, na de düütschen Tiet, is en Drapen twüschen Scholz un US-Präsident Biden plant.

Russland un Ukraine tuschen gefangene Lüüd vun´n Krieg ut

Kiew. De Ukraine un Russland hebbt to´n tweeten Mal binnen en poor Dag gefangene Lüüd vun´n den Krieg uttuuscht. Russland leet eenhunnert ukrainisch Suldaten, Grenzoppasser un Mitarbeiters vun den Geheemdeenst free. Dat vermellt de ukrainisch Präsident Wolodymyr Selenskyj. Dorför sünd eenhunnert russ´sch Suldaten ut de Gefangenschop trüchkamen. De Vereenigten Arabisch Emirate harrn dorbi vermiddelt.

Verkehrsadder in Bremerhaben schall enger weern

Bremerhaben. De Ümbo vun de Columbusstraat in de Binnenstadt vun Bremerhaben is besloten. In de Stadtverorntenversammeln stimmten güstern Avend SPD, CDU un FDP dorför, dat de Tall vun de Fohrbahnen vun söss op veer na ünnen sett warrt. Dordör schall dat Holt-Stopp twüschen de Binnenstadt vun Bremerhaben un dat Touristenlandstück Havenwelten lütter weern. Nu geiht dat mit dat Planen los. Wannehr dat Vörhebben fardig warrt, is noch nich aftosehn.

Stadtparlament vun Bremerhaben will Sucht-Hölp wohanners henschuven

Bremerhaben. De Utgaavsteed för den Heroin-Behölpstoff Methadon in Bremerhaben schall ut de Binnenstadt. De Stadtverorntenversammeln harr an´n Avend besloten to pröven, de Steed woanners hentoboen. Ursaak sünd Klagen vun Geschäftslüüd över dat Benehmen vun suchtkranken Minschen an de Utgaavsteed. Se verschrecken Kunnen un Touristen, dat bekriddeln Afornte vun de Partei „Bündnis Düütschland“. Se stimmten dorför, de Steed woanners optomaken, jüst so as de AfD un dree enkelte Afornte. Gröne, Linke un noch twee Afornte hebbt sick torüchhollen.

Dat Weer

Un nu noch en Blick op dat Weer: In Noordholt een, in Bremen-Mitt un in Bremerhaben twee un op Borkum sünd dat opstunns dree Graad. Hüüt is de Heven vull vun Wulken un dat kaamt jümmer wedder Natt vun baven. De Wind weiht in Maten, an de Küst frische bit starke Wind vun de Oosten Kant. Dat Thermometer wiest vundag fief bit twölf Graad. In de Nacht sünd wedder vele dichte Wulken an´n Heven. Twüschendör wiesen sick aver ok af un an de Sterns. Dat blifft dröög. An de Nordsee kann dat aver natt weern. Veer bit söven Graad stahn denn op dat Thermometer. Morn gifft dat eerstmal an de Nordsee enkelte Schuer, de aver aftrecken. Denn is dat mehrsttiets dröög un neven Wulken schient ok mal de Sünn. An´n Namiddag weern de Wulken mehr un to´n Avend fangt dat wedder an to pladdern. Op dat Thermometer stahn denn acht bit darthein Graad. Sünndag: Dichte Wulken un af un an Regen bi söven bit thein Graad.

Dat weern de Narichten op platt. Tohoopstellt hett se Gerrit Busch. Op Platt trechtmaakt un vörleest vun Markus Weise.

Bremen Eins Livestream & aktuelle Sendung.

Die Nacht

Die Nacht
Die Nacht
  • Die Nacht