Plattdeutsche Nachrichten Plattdüütsche Narichten vun'n 30. November 2023

Weltklimakonferenz in Dubai geiht los

Dubai: In Dubai fangt de Weltklimakonferenz vun de Vereenten Natschoon an. Twee Weken lang snacken rund 200 Staaten över de Indämmung vun de Klimakries. Mit rund 70.000 Verhandlers, Journalisten, Aktivisten un Facklüüd warrt rekent – un dormit is düt Drapen de gröttste Klimakonferenz, de dat betnu geven hett. De gröttste Strietpunkt is, of an dat Enn en Utstieg ut Köhl, Ööl un Gas afmaakt warrt. Mit den Klimaschuulplaans de in dat Johr 2015 in Paris afsnackt wurrn, is dat Ziel, de Eerdopwarmen op 1,5 Graad to limiteren, nicht to schaffen.

Wapenroh twuschen Israel un Gazastriepen löppt wieder

Gaza: De Fuerpaus twuschen Israel un de Militant-islaamschen Hamas löppt een Dag länger, dat hebbt all beid Sieten künnig maakt. Dormit gellt düsse Paus söven Daag achter´nanner. Na dat israelsche Militär schall de Wapenroh anhollen, wieldess sik de Middelslüüd wiederhen Möh geven de Gieseln free to kriegen. Güstern hett de Hamas wiedere 16 Minschen an dat Rode Krüüz övergeven – dree dorvun hebbt een düütschen Pass.

Kinner- un Jugendinrichten in Bremen kriegen mehr Geld

Bremen: För Kinner- un Jugendinrichten in Bremen gifft dat tokamen Johr 160.000 Euro mehr. Dat hett de Jugenddeputatschoon fastleggt. Dormit fallt de Towass minner ut, as de Inrichten verlangt hebbt. Jugendsenatorsche Schilling see, se süht twaars de Noot in de Arbeit mit jungen Minschen, man in den tokamen twee Johren geev dat woll keen finantschellen Spillruum, üm dat Anbott grötter to maken.

Stadtverordnetenversammeln befaat sik mit Sitt för Bündnis Düütschland in dat Wahlprövensgericht

Bremerhoben: De Stadtverordnetenversammeln in Bremerhoben befaat sik hüüt Namiddag dormit, of dat Bündnis Düütschland doch een Sitt in dat Wahlprövensgericht kriggt. Betnu wurr dat bi twee Wahlgäng afwehrt. Dat bekriddelt de Bremer Lannswahlböverste Andreas Cors. Dat is gang un geev, dat dat Wahlprövensgericht dat Kräftverhoolt de Parteien wedderspeegelt.

Bremer Börgerparktombola sammelt mehr Geld för Bremer Parks

Bremen: De Bremer Börgerpark-Tombola hett düt Johr mehr as
340.000 Euro Överschuss kregen. Dat sünd binah teihn Perzent mehr as verleden Johr. Börgermeister Bovenschulte graleert to dat gode Resultat. Dat Geld kriggt nich blots de Börgerpark, man ok de Park Links vun de Werser, de Rhododendronpark un Knoops Park.

Dat Weer

Un nu kiekt wi op dat Weer: In Bremerhoben sünd dat köhlige minus 4 Graad, in Bremen un Rottenborg minus 3 Graad un in Möppen hebbt wi opstunns 0 Graad. Hüüt sünd meist dicke Wulken un Sneeschuer in Bremen un umto ünnerwegens, an de Küst kann dat ok Sneeregen geven. Richten süüden wesseln sik Sünn un Wulken af un dat is meist dröög. Dat is den ganzen Dag koolt bi minus 2 bet 0 Grad in´t Binnenland un plus 2 Graad op de Eilannen. In de Nacht hangt de Heven vull Wulken, mal mehr mal weniger. Över Nacht warrt dat daakig, meist blifft dat dröög. An de Küst kann dat hier un dor verenkelte Sneeschuer geven. Op de Eilannen bi 0 bet minus 1 Graad, in´t Binnenland blifft dat koolt bi minus 2 bet minus 6 Graad. Freedag fangt daakig an, meist sünd wedder dicke Wulken an Heven, man hier un dor sett sik mal de Sünn mal Snee dör, meist is dat dröög. De Sünn lacht in de Hauptsaak an de Küst un in Ostfreesland. Dat Thermometer schafft dat morgen op minus 2 bet 0 Graad in´t Binnenland un plus 2 Graad op de Eilannen.

Dat weren de Plattdüütschen Narichten. Tohoopstellt vun Irene Lottes. Op Platt trechtmaakt un vörleest vun Martina Brünjes.