Plattdeutsche Nachrichten Plattdüütsche Narichten vun'n 28. November 2023

Toschüss vun’n Bund för Bremer Waterstuffvörhebben woll seker

Bremen – Dat Bremer Waterstuff-Vörhebben is woll seker, obschoons dat Urdeel vun’n Bunnesverfatengericht to’n Huusholt. Darvun geiht Bremens Wertschuppssenatorsche Vogt na dat Drepen mit de Wertschupps- un Energieminister ut. Blangen dat Stahlwark geiht dat ok üm den Plaan vun Airbus to’n Insetten vun Waterstuff in de Luftfohrt. Alleen bi dat Bremer Stahlwark hannelt sik dat üm Geld babenop in Höögde vun eene Milliarde Euro. 300 Millionen Euro will Bremen in de Hand nehmen, de Rest schall vun’n Bund kamen.

Huusdoktors foddert, dat dat krank schrieven över’t Telefon wedder inföhrt ward

Berlin – Wiel jümmer mehr Minschen krank sünd, foddert de Verband vun de Huusdoktors, dat dat krank schrieven över’t Telefon wedder inföhrt ward. Verbandsbaas Beier sä, de Praxen vun de Huusdoktors mööt Luft kregen. De ole Regel darto is in‘n April utlopen. In’n Sommer hett de Bunnesdag besluten, dat dat krank schrieven över’t Telefon op Duer mööglich sien schall. Nu liggt de Saak bi’n gemeensam Bunnesutschuss vun Doktors un Krankenkassen, de bit to’n Enn vun’n Januar wat darto utarbeiden will.

Dütschlandticket för Studenten kummt

Berlin – Bund un Länner hebbt sik op een Dütschlandticket för Studenten eenigt, dat nich so veel kost. Dat hett dat Bunnesverkehrsministerium vermellt. Anstatt vun 49 Euro ward denn blots noch 29,40 Euro fällig. Mit de Koort schall dat to’n Sommersemester 2024 losgahn. De Utschüss vun de Studenten mööt vördem aver noch de Verdräge darto mit de Verkehrsünnernehmen afsluten.

CDU Bremen hett nee’en Lannesbaas

Bremen - Heiko Strohmann is nee’er Lannesbaas vun de CDU Bremen. Een Sünnerparteidag hett em an’n Abend to’n nee’en Lannesvörsitter wählt. De 55-Jöhrige hett 127 Stimmen vun de 168 Afordneten kregen. He weer de eenzig Kandidat, de to Wahl stunn. De Neewahl is nödig worrn, nadenn de bitnu Vörsitter Meyer-Heder vör twee Maand wat to een mööglich Tohooparbeiden mit de AfD seggt hett.

Bremer Stratenlateerns lücht faken mit LEDs

Bremen – Twee Drüttel vun de Stratenlateerns in Bremen lücht middewiel mit LED-Lampen. Tohoopnahmen gifft dat darmit 38-dusend LED-Stratenlatüchten in Bremen. Darmit ward elkeen Johr etwa twee Millionen Kilogramm CO2 inspaart, vermellt dat Ümweltressort un de Energieversorger SWB. De nee’en Lampen bruukt fief Millionen Kilowattstunnen Strom weniger. Darmit holt de Stadt de Kosten för dat Ümrüsten binnen fief Johren wedder rin.

Dat Weer

Un nu een Blick op dat Weer: in Bremerhaben minus 1, in Bremen, Deefholt un op Wangerooge sünd dat opstunns 1 Graad. Bit to’n Middag klingt Sneeschuers meist af un vun de Nordsee her kiekt ok mal de Sünn rut. To’n Namiddag deelt sik Sünn un Wulken den Heben un an’n Abend kummt nee’er Sneefall op, bi minus 1 bit plus 2 Graad. Tokamen Nacht ward de Wulken dicker un vun Ems un Nordsee kummt Snee op. In’t Binnenland kann dat bit to twee bit fief Zentimeter Neesnee geven. Direktemang an de Küst geiht de Snee denn in Regen över. De Nacht ward köhler as loletzt. Dat Thermometer sackt op 1 Graad Frost bit to 5 Graad Frost. Morrn treckt de Snee an’n Morrn un Vörmiddag af, darachter gifft dat wieter faken dicke Wulken, de ok mal oplockert un de Sünn kiekt rut. Verenkelt kann dat noch Schuers geven, an de Küst mehr as Regen, in’t Binnenland as Snee or Sneeregen, bi minus 1 bit plus 1 Graad. Dat weern de Narichten op Platt. Gabriele Intemann hett se tohoopstellt. Op platt trechtmaakt un vörleest hett se Heidi Jürgens.