Plattdeutsche Nachrichten Plattdüütsche Narichten vun'n 24. November 2023

Eerstmal ophören mit Scheten in Gaza

Gaza-Stadt. An´n fröhen Morgen hett dat Scheten in den Gaza-Striepen för veer Dag ophöört. Dat de Füerpaus inholen warrt, kontrolleren Katar, Ägypten un de USA. Vöher is dat besünners in´n Noorden vun den Gaza-Striepen noch to bösen Slachten kamen. An´n Namiddag schüllt de eersten darthein vun fofftig Geiseln freelaten weern. Dat vermellt en Spreker vun de Regerung vun Katar. De Kinner un Froenslüüd schüllt den Roden Krüüz övergeven weern. Israel sett dorför alltohoop 150 palästinensche gefangen Lüüd free.

Grönen-Parteidag will Vörstand nee wählen

Karlsruhe. Op den Grönen Parteidag in Karlsruhe wüllt de Liddmaten an´n Namiddag den Bunnsvörstand nee wählen. Tosamen sünd dat söss Lüüd in Bunnsvörstand. De beiden Vörsitter Lang un Nouripour laat sick wedder as Kanidaten opstellen. Bito schüllt de mehr as 800 Liddmaten de Wahlen för de Plätz op de List to de Europawahl anfangen. För Platz een lett sick de Fraktschonsvörsittersch vun de Grönen in dat EU-Parlament, Terry Reintke, opstellen.

Stahlkocher gahn för Industriestrompries op de Straat

Berlin. De Gewarkshoppen IG Metall un IG BCE gahn in Ogenblick för Verlichtens in de Industrie, de bannig veel Energie brukt, op de Straaten. To de Demonstratschonen in Duisburg un Berlin warrt mit Dusenden Stahlarbeiters rekend. Binah 600 Mitarbeiters vun dat Stahlwark Arcelor Mittal in Bremen gahn ok in Berlin mit op de Straaten. De Gewarkschoppen sünd bang, dat na dat Huusholt-Urdeel vun dat Bunns-Verfatens-Gericht, staatlich Fördergelder wegfallen könen.

Nawass-Forscher ut Bremen winnen Ruumfohrt-Wettstriet

Bremen. Studenten vun de Hochschool Bremen hebbt en lütten Weltruum-Fleger-Wettstriet vun dat Düütsche Zentrum för Luft- un Ruumfohrt wunnen. Dormit köönt se in dat tokamen Johr en egen Weltruum-Fleger in dat Weltall schicken. De Mitfloog op en lütte Dregerrakeet, för den se nix betahlen mööt, weer vun dat Düütsche Zentrum för Luft- un Ruumfohrt as Pries vergeven wurren. Över twintig Studenten an de HSB arbeiten in Ogenblick an dat Projekt. De lütte Weltruum-Fleger ut Bremen schall wohrschienlich an dat Enn vun dat tokamen Johr vun Schottland ut in dat Weltall starten.

Busse in Bremerhaben liedt ünner Krankheids-Well

Bremerhaben. Bi de Bussen in Bremerhaben mööt de Fohrgasten mit düchtig slechten Bedingen reken. Den ganzen Dag över fallen Busverbinnens ut. Ursaak sünd, as de Gesellschop Bremerhaben Bus vermellt, unvermodens hoge Krankheidsfallen. Dat Ünnernehmen beedt Fohrgasten dorüm, sick rund dartig Minuten ehrdat de Fohrt anfangt, över de Wies-Tafel an den Anhoolpunkten or över dat Internet to informeren. Dat is vun de Organisatschoon nich möglich, de Busutfallen vörher antokünnigen.

Dat Weer

Un nu noch en Blick op dat Weer: in Rodenborg (Wümm) dree, in Bremen-Mitt fief, in Bremerhaben söss un in Cuxhaben sünd dat opstunns veer Graad. Hüüt gifft dat düütlich mehr Wulken as Sünnschien un af un an Regenschuer. An de Küst sünd korte Grisselgrussel-Gewidder möglich. An´n Avend pladdert dat reell un Sneeregen is ok möglich. De Wind weiht in Maten bit frisch, an de See to´n Deel düchtig vun de West- bit Noordwesten Kant. Fief bit acht Graad stahn vundag op dat Thermometer. In de Nacht hören de Regenschuer op. In´n Verloop weern de Wulken mehr un mehr un dat kaamt natt vun baven. Dat kann ok Sneeregen ween. Dat Thermometer wiest fief bit Minus een Graad. Morn eerstmal Regen- un Sneeregenschuer. Af Middag schient de Sünn un dat blifft dröög bi fief bit söven Graad. Sünndag: Wulken, en beten Sünnschien, man in´n Westen vun de Weser enkelte Schuer. Twee bit söss Graad schall dat Sünndag weern. Dat weern de Narichten op platt. Tohoopstellt hett se Gerrit Busch. Op Platt trechtmaakt un vörleest vun Markus Weise.