Plattdeutsche Nachrichten Plattdüütsche Narichten vun'n 22. November 2023

Israel un Hamas enigen sik op Freelaaten vun Gieseln

Tel Aviv: Israel un de radikal-islamischen Hamas hebbt sik över en Füerpaus un dorop dat Gieseln free kamen, eenigt. Dat hett de israelsche Ministerpräsident Netanjahu achterna en Kabinetts-Sitten seggt. Dorna lett de Hamas um un bi 50 Froen un Kinner ünner achteihn ut jümehr Gewalt free. Dorför maakt Israel för veer Daag keen Angrepen. De Hamas maakt künnig, dat ok 150 palästinensische Froens un junge Lüüd ut dat israelsche Kaschoot freelaten warrn.

Verdi röppt all Arbeiters de bi dat Land anstell sünd in Bremen, Hamburg un Berlin to Warnstreiks op

Bremen: In den Tarifstriet vun den öffentenlichen Deenst vun de Länner röppt de Gewarkschop Verdi all Mitarbeiters in Bremen, Hamburg un Berlin to en „Stadtstaaten-Streik“, as se dat nöömt, op. In Berlin un Hamburg wüllt totiets mehrere dusend Arbeitsers demonstreern, mit dorbi ok 400 Mitarbeiters vun den öffentlichen Deenst ut Bremen. Verdi un de Beamtenbund verlangt 10,5 Perzent mehr Geld, Bavento geiht dat üm en Tolaag in den dree Stadtstaaten vun 300 Euro, wiel de Landesarbeitnehmer hier ok kommunale Opgaven övernehmen.

In den Nedderlannen warrt en nee´et Parlament wählt

Den Haag: De Nedderlannenschen Börgerslüüd wählt siet hüüt morgen en nee´et Parlament. De Koalitschon, de betto ünner den rechtsliberalen Regeerungsbaas Rutte langjohrig föhrt wurr, weer verleden Sommer in Striet över de Inwanderungspolitik tweigahn. Nu strieden sik bi en vörtrocken Wahl 26 Parteien üm de 150 Paralmentssitten. Mehr as een Partei hett bi en Ümfraag de Nees vörn. To´n eersten Mal künnt de Rechtspopulist Wilders mit sien Partei stevigst Kraft warrn.

Stüer op Drünk wo Zucker binnen is würr na en Studie bet to 16 Millarden Euro insporen

München: En Zuckerstüer op Drünk, to´n Bispill Cola, würr in Düütschland mehrere Millarden Euro bringen un veele Krankheiten vermieden. Dat is bi en Studie vun de technischen Universität München un de Universität Liverpool rutsuert . De Stüer würr dorna dorto föhren, dat de Verbruuk vun Zucker per Dag un Minsch daal gaht. Binnen de tokamen twee Johrteinten künnt dordör bet to 16 Millarden Euro spoort warrn – ünner annern dör dat Verlichtern vun dat Gesundheitssystem.

Lüttkind warrt na Sturz ut en Wahnhuus in Bremen swoor an Liev versehrt

Bremen: In den Bremer Stadtdeel Blumenthal is güstern Namiddag en Lüttkind bi en Fall ut een Wahnhuus sworr an Liev versehrt wurrn. De twee-johrige Jung is rund teihn Meters na ünnen stört. He wurr vun en Nootdokter versoorgt un keem in en Krankenhuus. Woso dat passert is, is noch nich kloor.

Dat Weer

Un nu kiekt wi op dat Weer: In Möppen hebbt wi minus 2 Graad, in Bremen hebbt wi 0 Graad un in Bremerhaben un Emm sünd dat opstunns plus 2 Graad.

Hüüt gifft dat na kolen mörgenstünn af un an Sünnenschien un en poor Wulken. An Namiddag trecken vun noordwesten dicke Wulken op de in de Hauptsaak an de Küst un in Ostfreesland Regen bringen. Övern Avend pladdert dat ok in süüdliche Binnenland. Dat Thermometer wiest us 3 bet 7 Graad. In de Nacht hangt de Heven full Wulken un dat regent hier un dor un dat eerst bi 7 bet 1 Graad. Över Nacht kladdern de Temperaturen na un na an, op 8 bet 10 Graad. Morgen meist Wulken af un an schafft de Sünn dat mal, in de Hauptsaak an de Küst. Morgens drüppelt dat eerst en beten, över Namiddag vun de Nordsee her warrn de Druppen duller. Un dat denn bi 11 bet 13 Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.