Plattdeutsche Nachrichten Plattdüütsche Narichten vun'n 24. März 2023

Gegenwind an Warnstreik-Plan vun de Gewarkschaften

Berlin. De Bunnsregerung maakt sick Sorgen wegen de Warnstreik-Plans vun Busse un Bahnen. Verkehrsminister Wissing reep all Tarifpartners op, sick ehr Plicht kloor to maken un de Folgen för de Minschen so lütt as möglich to hollen. To den Optakt vun de drütte Verhandlungsrunn in´n Staatsdeenst an´n tokamen Mondag mööt Lüüd, de mit Bussen, Bahnen un Flegers reisen willt – ok in Bremen un Neddersassen - mit düchtig Maleschen reken.

Jümmer mehr Protesten in Frankriek gegen Rentenreform

Paris. In Frankriek hett de Protestwell gegen en later Rentenöller noch en hööchsten Punkt anlangt. Mehr as een Million Minschen gungen an´n Avend op de Straten. In´t ganze Land geev dat Streiks un Blockaden. Dorbi keem dat in Paris un in anner Steden ok wedder to Opstänn. De Polizei settde Tranengas un Knüppel in. De Regerung snackt vun 120 Hölpslüüd, de wat afkregen un 80 Lüüd, de se in Arrest nahmen hebbt. Präsident Macron harr de Rentenreform, över de dat mehrere Menen un liekers dat weekenlang Proteste geev, ohn Tostimmen vun dat Parlament dörsett.

Bremen un Bremerhaben willt klimaneutral weern

Bremen. De Steden Bremen un Bremerhaben schöölt bit 2028 klimaneutral weern. Dat hett de Breemsche Börgerschaft mit de Ännerung vun dat Breemsche Klimaschutz- un Energiegesetz fastleggt. Tweeeenhalf Milliarden Euro will Bremen dorför in de Hand nehmen. Henkriegen will man dat mit en Ümstellen op nawassen Energien. Bavento plant Bremen mehr Bööm to planten un Moren wedder natt to maken. Ok de Utbo vun den ÖPNV un Radverkehr hört dorto.

Polizei kriegt möglichen Automatensprenger to faat.

Cloppenborg: De Polizei hett in den Kreis Cloppenborg en Keerl fastnahmen, de wohrschienlich Automaten in de Luft jagt hett. Dorna kann de Mann viellicht to en Koppel tohören, de den Beamten an´n Mondag bi en Verfolgensjagd op de A29 utnaiht weer. De Polizei kann sick vörstellen, dat he to en Bann tohört, de al vele Geldautomaten in de Luft jagt hebben schöölt.

Nagelsmann in Bayern vör dat Ut

München. De Football-Bunnsliga-Vereen Bayern München trennt sick schienbor vun Trainer Nagelsmann. Dat vermellen Medienberichten. As Nafolger snackt se över Thomas Tuchel. De Vereen sülfst hett bither noch nix dorto seggt. De Bayern stahn in Ogenblick op Platz twee in de Bunnsliga-Tabell. Een Punkt achter Borussia Dortmund.

Dat Weer

Un nu noch en Blick op dat Weer: in Emden thein, in’n Bremen-Mitt un in Bremerhaben elven un in Deefholt sünd dat opstunns twölf Graad. Hüüt gifft dat bi dichten Wulken hier un dor un af un an Regenschuer. Later an´n Vörmiddag lockern de Wulken op un de Sünn lacht fakener vun baven. Enkelte Schuer könen an´n Namiddag vun de Nedderlannen opdükern. De Wind weiht vun de Süüdwesten Kant frisch, an de Küst stark mit stiefen un störmschen Böen. Dat Thermometer wiest twölf bit 16 Graad. In de Nacht gifft dat en flotten Wessel ut dichten un lockeren Wulken. De Sterns sünd af un an to sehn. Dorbi trecken ok Schuer vun West na Oost dör. De Temperaturen gahn op söven bit negen Graad trüüch. Morn is de Heven vull mit Wulken. Twüschendör rieten de Wulken ok mit en beten Sünnschien op. Wedder sünd Regenschuer möglich. Hier un dor Blitz un Donnerslag bi thein bit twölf Graad. Sünndag: Wulken, Sünnschien, enkelte Schuer un Temperaturen vun acht bit elven Graad.

Dat weern de Narichten op platt. Tohoopstellt hett Katrin Martens. Op Platt trechtmaakt un vörleest vun Markus Weise.