Plattdeutsche Nachrichten Plattdüütsche Narichten vun'n 11. April 2024

Lüüd bi de Lufthansa, de in de Kabinen arbeidt, kriggt mehr Geld

Frankfurt am Main: De Striet üm eenen nee`en Tarifverdrag, för de Lüüd bi de Lufthansa, de in de Kabinen arbeidt, is to Enn. Dat Ünnernehmen is mit de Gewarkschaft UFO, na verhanneln över Maanden, övereens kamen. Dorna gaht de Gehalten in de kamen dree Johren all tosamen üm 17,4 Perzent hoch. Buterdem kriegt   de Anstellten eene Inflationsutglieksprämie vun 3000 Euro.

Bundesregerung is inverstahn mit ne`e EU- Asylregelung

Berlin: Bunnskanzler Olaf Scholz seggt ja to de Reform vun dat europäsche Asylsystem. He seggt, dat dat een historische Schritt is, wo man nich op verzichten kann. Binnenministersche Nancy Faeser seggt, dat man över de deepe Spaltung vun Europa överweg is. De nee`en Regeln seht ok flinkere Aflöpe an de Butengrenzen un flinkeret Afschuven vör.

Biden denkt över freelaten vun Assange na

Washington: De USA will nu nipp un nau ankieken, dat wat se Julian Assange vunwegen Spionaage naseggt, fallen laten künnt. Dat hett Präsident Joe Biden kund geven. Grund dorför is, dat Australien dorüm beden hett dat Verbrekerssöken vun den Wikileaks-Grünner intostellen, un em torüch in siene Heimat to laten. Assange sitt siet 5 Johren in een britt`schet Gefängnis un wehrt sik gegen sien Utlevern an de USA.

Bremen kriggt wiedere Waffenverbottzone

Bremen: De Binnenbehörd will eene Wapenverbottzone in`t Viertel inrichten. De Regelung will man, na Infomationen vun buten un binnen, in de kamen Maanden ümsetten. Man draff denn to´n Bispeel keene Taschenmetzen or Rasierklingen mehr dorbi hebben. An´t Hauptbahnhoff gellt düsse Regel all länger.

Verhanneln um de Tarife bi Bremerhaben-Bus gaht wieter

Bremerhaben: An´t Middag geiht dat Verhanneln üm de Tarife bi Bremerhaben-Bus un de Gewarkschaft verdi wieder. Dat geiht dorbi meist üm de Grundlagen un Rahmen för de Arbeit vun de rund 300 Mitarbeiders. Verdi verlangt ok mehr Dage Urlaub un mehr upslaan op den Lohn an Wekenenn un Fierdagen.

Dat Weer

Un nu een Blick op dat Weer: in Nenborg 10, in Bremerhaben un in Bremen 11 un in Emm sünd dat opstünns 12 Graad. Hütt Vomdag hebbt wi vele dichte Wulken an`t Heben de Regen mit sik bringt. An´t Nomdag geiht de Regen denn in  Sprütterregen över. Later lockert dat op un de Sünn kummt mal dör, bi 13 bit 17 Graad. Tokamen Nacht hebbt wi jümmers wedder vele dichte Wulkenfeller, de hier un dor Sprütterregen mit sik bringt. Man meist blifft dat dröge, bi 12 bit 10 Graad. Morrn geiht dat mit dichte Wulkenfeller los, de hier un dor Regen mit sik bringt. An´t Nomdag lockert de Wulken op, un de Sünn kummt mal rut. De Temperaturen liggt bi 14 bit 20 Graad. Sünnavend mal Sünn, mal Wulken man meist dröge, bi 15 bit 22Graad. Dat weren de Narichten op Platt. Tohoopstellt hett se Caudine Bimmermann. Trechtmaakt un vörleest vun Antje Kruppa.