Plattdeutsche Nachrichten Plattdüütsche Narichten vun'n 10. April 2024

EU-Parlament stimmt af över ne’e Regelungen för Asyl

Brüssel: Dat EU-Parlament stimmt vundaag af över ne’e Regelungen för Asyl. So wüllt se Lüüd, de na Europa rin wüllt, en kloreren Kurs geven un ok weniger Lüüd rinlaten. De wenig Schangs op Asyl hebbt, schüllt noch an de EU-Butengrenzen afschaven warrn. EU-Staaten, de kene Flüchtlinge opnehmen wüllt, schüllt Geld betahlen.

Mehr Hölpsworen kaamt na Gaza

Tel Aviv: Na de Minschen in Noot in’t Gaza-Land kaamt nu woll mehr Hölpsworen. De israelsche Armee vermellt: Güstern hebbt se sowat 470 Lastwagen in dat Kriegsgebiet rinlaten. US-Verteidigungsminister Austin meen, dat weer en Antwoort op Druck ut de USA.

Köper vun Galerie stellt sik vör

Essen: In de Hauptverwaltung vun de Koophuus-Keed Galeria Karstadt Kaufhof warrt an’n Middag de ne’e Geldgever vörstellt. Medien hebbt to weten kregen: de US-amerikaansche Investment-Firma NRDC un de düütsche Geschäftsmann Beetz wüllt de Keed tohoop övernehmen. To Galeria höört opstunns 92 Koophüüs in Düütschland to. De Süüddüütsche Zeitung schrifft: 70 dorvun schüllt woll wiederlopen. Galeria harr Anfang Januar dat drüdde Mal en Andrag op Insolvenz stellt.

Bremen: Meist jede twete Schoolanfänger bruukt Stütt bi de Spraak

Bremen: In’t Land Bremen köönt noch mehr Schoolanfänger nich richtig Düütsch. Nu bruukt 43,5 Perzent vun de Kinner in de eerste Klass Stütt bi de Spraak. So steiht dat in en Bericht vun de Bildungs-Deputatschoon binnen. Veel Hölp bruukt de Lütten in Gröpeln un Osterholt, man ok in Bremerhaven.

Bösen Unfall op de A 1 bi Brinkum

Brinkum: Op de A 1 bi Bremen-Brinkum hett dat vunmorgen en bösen Unfall geven. De Autobahnpolizei Ahlhorn seggt: Bi en Swoortransport weer en Reifen basst, un denn weer he in en LKW ut Polen rinknallt. Düsse LKW is in de Middelplank rinfohrt. Dat Föhrerhuus is afreten worrn un weer denn to’n Deel op de anner Stratensiet. Wo veel de LKW-Fohrer afkregen hett, is noch nich kloor. De Autobahn twüschen Bremen-Oorsten un dat Dree-Eck Stuhr weer över Stunnen afsparrt.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Cuxhaven un Nienborg överall 10 Graad. Vundaag: Wenn de Regenwulken na de Lümborger Heid aftrocken sünd, warrt dat hell un dröög mit mal Sunnschien, mal mehr, mal weniger Wulken. Dat Thermometer krabbelt op 11 bet 16 Graad. De Wind dorto weiht in Maten bet frisch vun de süüdwesten bet westen Kant. Vör allen an de See ok mit deegte Böen. Tokamen Nacht: Eerst blots en poor Wulken oder kloor. Na Middernacht kaamt vun de Noordsee her mehr Wulken rin, un dor kann dat denn ok mal druppeln. Bi 10 bet 7 Graad. Morgen: Vele Wulken, an de See kann ok Regen daalkamen. Över Dag löppt de Regen pö a pö na’t Binnenland rin. Eerst an’n Namiddag warrt de Regen vun de See weniger, un denn lacht uns ok noch de Sunn. Dat Ganze bi 13 bet 17 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.