Plattdeutsche Nachrichten Plattdüütsche Narichten vun'n 3. April 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 3. April 2024

  • Dode Hölpslüüd in Gaza: Israels Armee snackt vun bösen Fehler
  • Vör de Küst vun Taiwan: de Eer hett bevert
  • Lindner will Börgergeld nee opstellen
  • Nich mehr ganz so vele Kegelrubben an de Küsten in Neddersassen
  • DFB-Pokal: Kaiserslautern is in’t Endspeel
  • Dat Weer
Bild: Radio Bremen

Informationen zum Audio

Dode Hölpslüüd in Gaza: Israels Armee snackt vun bösen Fehler

Tel Aviv: Söven internatschonale Hölpslüüd weren bi en Luftattack to Dode kamen. Nu snackt de israelsche Armee vun en bösen Fehler. In de Nacht harrn se den Konvoi nich richtig rutkennt. Dat harr nich vörkamen schullt. En Spreker vun de Armee sä: En Steed vun buten warrt de Saak ünnersöken. Wat dorbi rutkummt, geevt se in de tokamen Daag bekannt. De Hölpsorganisatschoon will in de Gegend dor nich wiederarbeiden.

Vör de Küst vun Taiwan: de Eer hett bevert

Taipeh: Op de Insel Taiwan hett de Eer böös bevert. So dull hett de Grund dor siet 25 Johr nich mehr grullt. De Behörden seggt: Tominnst söven Minschen sünd to Dode kamen, Hunnerte sünd verletzt un teihndusende Wahnungen hebbt keen Stroom. Na dat Bevern harrn se wohrschaut: In Japan un op de Philippinen kunn en Tsunami opkamen. Man dat gellt middewiel nich mehr.

Lindner will Börgergeld nee opstellen

Berlin: Bunnsfinanzminister Lindner will dat Börgergeld nee opstellen. In de Rheinische Post sä de FDP-Mann: Bi all de Sozialleistungen fehlt dat an Drift, en Arbeit antonehmen. Un de meisten Minschen meent, dat weer nich gerecht. Na Lindner mööt Minschen, de arbeiden köönt, mehr Stütt kriegen, dat se ok wohrhaftig arbeiden doot. Dat dat Börgergeld to hooch is, harr vörher ok de Union seggt.

Nich mehr ganz so vele Kegelrubben an de Küsten in Neddersassen

Willemshaven: Meist 360 Kegelrubben sünd verleden Winter an Neddersassens Noordseeküst op de Welt kamen. Dat hebbt se in den Natschonaalpark Neddersassens Wattenmeer tellt. Dat weren enige junge Rubben weniger as een Johr vörher. De Lüüd in de Verwaltung seggt aver: Dat is normal, mit mal mehr, mal weniger. De jungen Rubben kaamt twüschen November un Januar op de Welt. Vun de negentiger Johren op an warrt se vun Flegers ut tellt.

DFB-Pokal: Kaiserslautern is in’t Endspeel

Saarbrücken: De Football-Tweetliga-Vereen 1. FC Kaiserslautern steiht in‘t Endspeel um den DFB-Pokal. Güstern Avend hebbt se mit 2:0 de Bavenhand hatt gegen Saarbrücken ut de drüdde Liga. Vunavend speelt Bayer Leverkusen un Fortuna Düsseldörp den Gegner ut. Dat Endspeel löppt Enn Mai.

Dat Weer

Un woans süht dat mit dat Weer umto ut? Opstunns hebbt wi in Bremerhaven 6 Graad, in Rotenborg sünd 8 un in Bremen un Deefholt 9 Graad. Vundaag: Eerst kaamt vun’t Emsland dichte Wulken rin. Achteran treckt vun Süüdwesten Regen rin, de ok wat länger anhöllt. Gegen Middag kummt he an de Noordsee un de Elv an. Dat pladdert wieder bet na’n Avend hen. Dat Thermometer krabbelt op 10 bet 13 Graad. De Wind dorto weiht flau oder en beten mehr vun de süden bet süüdoosten Kant. Tokamen Nacht: Mal dichte Wulken, mal wiest sik de Steerns, un pladdern kann dat ok. Vör Dag un Dau länger dröög. Man de neechste Wulkenfracht kummt al wedder vun’t Emsland rin. Bi 9 bet 7 Graad. Morgen: De Regenwulken loopt gau vun’t Emsland bet na de Elv hen. An’n Namiddag pladdert dat jümmers noch, eerst an’n Avend lockert dat wat op. Dat Ganze bi 11 bet 14 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.

Bremen Eins Livestream & aktuelle Sendung.

Der Nachmittag mit Dirk Böhling

Der Nachmittag

Jetzt läuft:

Westernhagen Es Geht Mir Gut
  • Jetzt läuft:

    Westernhagen Es Geht Mir Gut