Plattdeutsche Nachrichten Plattdüütsche Narichten vun'n 02. April 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 02. April 2024

  • Israeelsche Armee hett woll Mitarbeiders vun Hölpsorganisatschoon in’n Gazastriepen ümbröcht
  • Iraan maakt scharpe Reakschoon na Attack op Baadschop in Syrien künnig
  • Weniger Komasupen bi junge Lüüd
  • Bremer Senaat nickt Huushooltsplaan för 2024 un 2025 af
  • Perzess gegen falsche Polizisten an’t Landgericht Bremen
  • Dat Weer
Bild: Radio Bremen

Informationen zum Audio

Israeelsche Armee hett woll Mitarbeiders vun Hölpsorganisatschoon in’n Gazastriepen ümbröcht

Gaza: De israeelsche Armee hett woll in’n Gazastriepen mehrere Mitarbeiders vun de US-Hölpsorganisatschoon „World Central Kitchen“ umbröcht. De Organisatschoon snackt vun söben Doden. Se kaamt ut Australien, Polen, Grootbritannien, de USA, Kanada un den Gazastriepen. Na Utkunft vun „World Central Kitchen“ is de Konvoi bi en israeelsche Luftattack drapen worrn. Dat israeelsche Militäär snackt vun en tragisch Ereignis un will dat nipp un nau ünnersöken.

Iraan maakt scharpe Reakschoon na Attack op Baadschop in Syrien künnig

Teheran: Na de Luftattack op de iraansche Baadschop in Syrien hett de Iraan en scharpe Reakschoon künnig maakt. Dat Land smiet Israel vör, Schuld an de Attack to ween. Bi de Luftattack in de syrschen Hauptstadt Damaskus sünd güstern mehrere Minschen doodbleven, dorünner Generäle un Liddmaten vun de iraanschen Revolutschoonsgarden.

Weniger Komasupen bi junge Lüüd

Hannover: De Tall vun Fallen, bi de Kinner un junge Lüüd sik duun un bet in’t Koma supen, is so deep as noch nie. Dat is bi en Utwerten vun de Kaufmännschen Krankenkass rutsuert. Darna sünd 2022 meist 11.000 Kinner un junge Lüüd in’t Krankenhuus kamen, nadat se sik mit Alkohol vergift hebbt. Dat is halv soveel as teihn Johr tovör. To de Tiet weer de Tall op en hööchsten Stand kamen.

Bremer Senaat nickt Huushooltsplaan för 2024 un 2025 af

Bremen: De Senaat will hüüt den Plaan för den Huushoolt för dütt un dat tokamen Johr afnicken. He ward denn an de Bremsche Börgerschaft övergeven. Dat Parlament ward den Huushoolt woll noch vör de Sommerpaus besluten. Eerst denn geiht de so nöömte „Tiet ahn Huushoolt“ to Enn. So lang draff de Stadt un dat Land Bremen blots Utgaven maken, to de se verplicht sünd.

Perzess gegen falsche Polizisten an’t Landgericht Bremen

Bremen: Fief Minschen, de se för Bannenliddmaten hollt, staht opstünns för dat Bremer Landgericht. De Staatsanwaltschaft smiet de Anklaagten in’t Öller vun 23 bet 28 Johr verscheden Bedregereen vör. Se hebbt sik woll as Polizisten, Staatsafkaten un Bankmitarbeiders utgeven un anner Lüüd wat vörmaakt, dormit de ehr Geld un Weertsaken rutgeevt. Se kaamt woll för tominnst een Johr achter de Trallen.

Dat Weer

Un nu en Blick op dat Weer: In Brinkum un Leer 8, un in Bremen, Bremerhaben un Emmen sünd dat opstünns 9 Graad. Hüüt gifft dat eerst en dröög Gemengsel ut Wulken un Sünnschien. Vun Middag an kaamt denn vun’t Emsland, dat Ollenborger Münsterland un de Noordsee’n poor Schuers na, un de Sünn wiest sik blots noch af un an. Dorto Temperaturen vun 10 bet 11 Graad op de Oostfrees‘schen Eilannen un 13 bet 14 Graad op dat Fastland. In de Nacht is dat meisttiets dicht wulkig. ‘N poor Schuers sünd noch ünnerwegens, de bilütten över Elv un Lünborger Heid aftreckt. Darna lockert dat vun’t Emsland un dat Ollenborger Münsterland her op, un dat blifft meisttiets dröög bi 7 bet 4 Graad. Morgen fröh treckt vun’t Emsland her dichte Wulken op, de an’n Vörmiddag ok bi de Elv ankaamt. Darna gifft dat Regen ut’n Süüdwesten, de middags in dat Bremer Flach un namiddags ok bi de Elv un de Noordsee ankummt. Mit korte Pausen regent dat bet to’n Avend wieter bi 11 bet 13 Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Marc Gelhart.

Bremen Eins Livestream & aktuelle Sendung.

Grüße und Musik mit Britta Uphoff

Grüße und Musik
Grüße und Musik
  • Grüße und Musik