Plattdeutsche Nachrichten Plattdüütsche Narichten vun'n 28. März 2024

Ampel un Union wüllt Bunnsverfatensgericht beter afsekern

Berlin: De Ampel-Regerung un de Union hebbt sik op en Gesetzplaan enigt, de dat Bunnsverfatensgericht beter afsekern schall. Dat hett de Rheinische Post vermellt. Se wüllt dor en P vörsetten, dat sik womööglich de Politik inmischt oder Macht vun dat Gericht wegnimmt. Denn schall in‘t Grundgesetz stahn: Dat nüms dat Gericht wat vörschrifft, wo vele Richters dat gifft un wo lang de in’t Amt sünd. De dat Gesetz denn afännern will, bruukt dorför twee Drüddel vun de Stimmen in’t Parlament.

Lufthansa: Streik vun’n Disch

Köln: In den Tarifstriet um mehr Geld för de Lufthansa-Lüüd, de nich mit en Fleger ünnerwegens sünd, hebbt sik de Arbeitgevers un Gewarkschaften enigt. Enkelte Punkten wüllt se över Dag bekannt maken. Eerstmal gifft dat also kene Streiks mehr bi de Lufthansa. Dat Ünnernehmen meen: Dat is en gode Naricht för de Passageren. An’n Grund arbeit för de Lufthansa sowat 25.000 Lüüd in Düütschland.

Post: Keen Breefverschicken mehr mit den Fleger

Bonn: 62 Johr lang harr de Post Breven in Düütschland mit Flegers wegbrocht. Dat is nu vörbi. De letzte Fleger is vunmorgen losgahn. De Post seggt: Dat kost weniger, un beter för dat Klima is dat ok. Wenn de Breven över Land verschickt warrt, blaast se 80 Perzent weniger Afgas in de Luft.

Dat ne’e Cannabis-Gesetz: Meist nix ännert sik för Strafen, de al utspraken sünd

Bremen: De Umgang mit Cannabis warrt vun den 1. April op an to’n Deel nich mehr bestraaft. Man dor kummt meist nix vun na för Strafen, de al utspraken sünd. Dat is rutkamen, as de Bremer Justizbehöörd hunnerte vun Straafsaken dörkeken hett. Mehr as 400 mal gellt de Straaf wieder, to’n Bispeel wenn se een mit en groten Bulten Cannabis faatkregen hebbt. 63 mal aver warrt de Straaf ophaven. Bewährung gellt denn nich mehr oder en Geldstraaf mutt nich mehr betahlt warrn.

Bremen: Priesen för Hüüs sünd wiet na ünnen sackt

Bremen: In de Stadt sünd de Priesen för Hüüs un Wahnungen in de verleden Maanden wiet na unnern sackt. Dat hett Geo-Information rutkregen. Vun Mitt 2022 bet 2023 müss een to’n Bispeel för en Wahnung, de een sülvst tohöört, över 12 Perzent weniger betahlen. Fachlüüd seggt: De Tinsen sünd anstegen, un dorvun sünd ok de Krediten dürer worrn. Un dorum söökt ok weniger Lüüd en egen Huus oder Wahnung.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven un Frieseythe 7 Graad, in Delmorst sünd dat 8 Graad. Vundaag: De letzte Regen treckt an’n Vörmiddag na Noordoosten över de Elv af. Achteran waagt sik de Sünn blots af un an mal rut. Un denn kummt vun’t Emsland frischen Regen rin, ok mit Blitz un Dunnerslag. Dat Thermometer krabbelt op 9 bet 12 Graad. De Wind dorto weiht eerst flau, över Dag briest he op, un he dreiht vun Süüd op Süüdwest. Wo dat schuert, blaast ok störmsche Böen. Tokamen Nacht: De Wulken treckt över de Elv af. Man de neechste Wulkenfracht kummt an’n Morgen wedder vun’t Emsland rin. Dat blifft aver meist överall dröög. Bi 8 bet 5 Graad. Morgen: Eerst Wulken, aver dröög. Denn aver treckt vun Westen her wedder Regen ran. An’n Namiddag kann’t en beten pladdern, man de Sünn lacht us ok mal. 11 bet 14 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.