Plattdeutsche Nachrichten Plattdüütsche Narichten vun'n 21. März 2024

EU-Staaten draapt sik in Brüssel

Brüssel: Vertreders vun de 27 EU-Staaten kaamt hüüt to en Top-Drapen tosamen. Kanzler Olaf Scholz will sik dorbi för mehr Stütt un Stöhn för de Ukraine insetten. Een Idee is ok, dat infroren Geld vun de Russen in de EU för dat Köpen vun Wapen to bruken.

USA verlangt wieterhen Paus bi’t Scheten in’n Gazastriepen

Tel Aviv: Dat Verhanneln över en Paus bi’t Scheten in’n Gazastriepen twüschen Israel un de Hamas kummt na Utkunft vun US-Butenminister Blinken in Gang. En Enigung kummt jümmer mehr in Sicht, säe Blinken in en Fernseh-Interview in Saudi-Arabien. De USA hebbt den UN-Sekerheitsraat ok en nee’e Resolutschoon dorför vörleggt. Dorin ward ok verlangt, datt de Hamas all Geiseln freelaat.

Natschonale Habenstrategie kriggt Wind vun vörn

Bremen: De vun dat Bunnskabinett afnickte Natschonale Habenstrategie kriggt in Bremen veel Wind vun vörn. Ünner annern finnt de IG Metall un dat Logistik Ünnernehmen BLG twars goot, datt en eenhellig Vörgahn plaant is, aver se kritiseert, datt dat keen Plaan för dat Finanzeern gifft. De Bunnsregeern hett güstern de Habenstrategie vörstellt. Fördergeller hett se aver nich toseggt.

Polizei in Ollenborg nimmt Deefsbande fast

Demhorst: De Polizei in Ollenborg hett en Bande fastnahmen, de woll Autos klaut hett. Bi’t Dörsöken in Bremen, Demhorst, Süüdneddersassen, Magdeborg un Noordrhein-Westfalen sünd in de verleden Week veer klaute Autos un Borgeld sekerstellt worrn. Veer Minschen ut Demhorst un Magdeborg in’t Öller vun 36 bet 42 Johr sünd fastnahmen worrn. De Polizei meent, datt de woll all tohoop 13 Autos in’n Weert vun meist 2 Millionen Euro ut Autohüüs klaut hebbt.    

Fischtown Pinguins winnt in Ingolstadt dat twete Playoff-Speel

Bremerhaben: De Fischtown Pinguins hebbt ok dat twete Playoff-Speel ünner de letzten acht bi de Düütschen Ieshockey Meisterschaft wunnen. In Ingolstadt hebbt sik de Bremerhabener mit 4 to 3 na Extra-Tiet dörsett. Dormit bruukt de Pinguins blots noch twee wunnen Speele, üm ünner de letzten veer to kamen. Dat tokamen Speel finnt morgen in Bremerhaben statt.

Dat Weer

Un nu en Blick op dat Weer: In Bremerhaben, Cuxhaben un Leer 7, un in Bremen, Emmen un Cloppenborg sünd dat opstünns 8 Graad. Hüüt Vörmiddag treckt noch de letzte Regen över de Wümm un de Aller na Süüdoosten af. Darna is dat mal mehr, mal weniger wulkig, un dat blifft dröög mit’n beten Sünnschien bi 9 bet 13 Graad. In de Nacht ward de Wulken vun de Noordsee her dichter. To’n Morgen hen kann dat an de Küst hier un dor’n beten Regen geven. Dat blifft lau bi 9 bet 6 Graad. Morgen sünd veele Wulken ünnerwegens. De Sünn is meist gor nich to sehn. An’n Morgen blifft dat meisttiets eerst noch dröög, later breedt sik vun de Noordsee her Regen in’t Binnenland ut. An’n Avend blifft dat wedder fakener dröög, aver dat lockert meist gor nich op bi 9 bet 14 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.