Plattdeutsche Nachrichten Plattdüütsche Narichten vun'n 20. März 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 20. März 2024

  • Bunnskabinett snackt över Natschonale Habenstrategie
  • Groder Bomarkt in Varel hett Füer fungen
  • Bilanz vun Bremer Soziaalprogramm för Kinners vörstellt
  • Töll op ukrainsche Woren vun’n Buernhoff ward wedder inföhrt
  • Fischtown Pinguins speelt in Ingolstadt
  • Dat Weer
Bild: Radio Bremen

Informationen zum Audio

Bunnskabinett snackt över Natschonale Habenstrategie

Berlin: Dat Bunnskabinett will hüüt de Natschonale Habenstrategie vun Bunnsverkehrsminister Volker Wissing op’n Weg bringen. In dat Papeer ward to’n eersten Mal fastleggt, datt de Habenümslag en natschonale Opgaav is. De noorddüütschen Länner kritiseert aver, datt de Bunnsregeern woll keen würklich Toseggen bi Fördergeller maken will.

Groder Bomarkt in Varel hett Füer fungen

Varel: In’n Landkreis Friesland hett an’n fröhen Morgen en groden Bomarkt Füer fungen. As de Polizei vermellt, fung dat üm kort na Klock dree an to brennen. Mehr as 100 Füerwehrlüüd ut de heelen Region weern in’n Insatz. Dat 4.000 Quadraatmeter grode Huus weer aver woll nich mehr to redden. Woso dat brannt hett, is betto noch nich klaar.

Bilanz vun Bremer Soziaalprogramm för Kinners vörstellt

Bremen: De Senaters för Soziales, Bildung un Gesundheit hebbt en Bilanz för dat Programm „Stark in’n Soziaalruum“ vörleggt. Mit dat Programm schall bi Kinners un Familien in’t Land Bremen dat, wat de Corona-Pandemie mit sik bröcht hett, afwennt warrn. De Nafraag na de Projektgeller weer hooch, denn mit meist 5 Millionen Euro is mehr Geld beandragt worrn as praat stünn.

Töll op ukrainsche Woren vun’n Buernhoff ward wedder inföhrt

Brüssel: De EU will wedder de Töll op veele bestimmte Woren vun Buernhööv ut de Ukraine inföhren. Dat hebbt Ünnerhändlers vun de EU-Staaten un vun dat Europaparlament afmaakt. Nipp un nau geiht dat ünner annern üm Mais, Haver un Zucker, aver ok üm Eier un Fedderveeh. För düsse Woren schall en Kuntingent gellen, dat tollfree in de EU verköfft warrn draff. Bi allens, wat över düsse Mengde rutgeiht, sünd denn Gebühren fällig.

Fischtown Pinguins speelt in Ingolstadt

Ingolstadt: För de Fischtown Pinguins steiht hüüt Avend dat twete Playoff-Speel ünner de letzten acht bi de Düütschen Ieshockey-Meisterschaft an. De Bremerhabener speelt hüüt in Ingolstadt. Na dat 6 to 4 bi dat Optaktspeel köönt de Bremerhabener hüüt den tweten Schritt mit Kurs op dat Halvfinaal maken.

Dat Weer

Un nu en Blick op dat Weer: In Deefholt un Bremführ 10, un in Bremen, Bremerhaben un Leer sünd dat opstünns 11 Graad. Hüüt blifft dat wieter wulkig. In’n Süüden vun Bremen kann dat ok mal oplockern mit’n beten Sünnschien. Besünners in’n Noorden vun Bremen fallt an’n Namiddag af un an’n beten Regen. An de Noordsee kann dat an’n ehesten Regen geven. An de Küst wiest dat Thermometer 11 bet 13 Graad, in’t Binnenland 14 bet 18  Graad. In de Nacht breedt sik bi dichte Wulken vör allen na Middernacht Regen vun de Noordsee ut. To’n Morgen hen blifft dat na Oostfreesland un dat Emsland hen wedder fakener dröög. Dat blifft lau bi 9 bet 7 Graad. Morgen treckt hier un dor noch Regen över de Wümm un de Aller na Süüdoosten af. Darna is dat mal mehr, mal weniger wulkig, un dat blifft dröög mit’n beten Sünnschien bi 9 bet 14 Graad.

Dat weern de Narichten op platt. Tohoopstellt hett se Justus Wilke. Op Platt trechtmaakt un vörleest vun Marc Gelhart.

Bremen Eins Livestream & aktuelle Sendung.

Der Nachmittag mit Dirk Böhling

Der Nachmittag
Der Nachmittag
  • Der Nachmittag