Plattdeutsche Nachrichten Plattdüütsche Narichten vun'n 22. Februar 2024

Striet bi so nömten „Wachstumschancengesetz“

Berlin: In den Striet twischen Bund un Länner to een Gesetz, üm de Wirtschaft in Gang to bringen, för Ünnernehmen schient dat nich so dat se övereens koomt. Ok wenn de Utschuss vun´t Bunnsdag un Bunnsrat an´t Avend den Kompromissvörslag besluten hebbt, lehnt de Union den Vörslag wieter af. Bremen hett sik bi de Afstimmung enthollen. Bremens Börgermeester Bovenschulte is bange, dat grote Ünnernehmen dat lever so mitnehmt , as nee Geld uttogeven. An´t 22. März will de Bunnsrat wedder över dat Gesetz, wat bekrittelt warrt, afstimmen.

Kriminalbeamte un Richter wohrschaut vör free geven vun Cannabis

Berlin: De Bunnsdag stimmt morrn över eene Deel- Legalisierung vun Cannabis af. De Bund Düütscher Kriminalbeamte verlangt een Stopp för dat Gesetz. Se hebbt Bange, dat de “Lütt- Hannel” dordör denn rechtlich afsekert is. Drogenhökers künnt bit to 25 Gramm bi sik hebben, man de Polizei kann denn nich ünnerscheden welket Cannabis legal anboet or illegal is. De Düütsche Richterbund wohrschaut, dat dat dör dat nee`e Gesetz to eene Överlastung vun de Justiz kamen kann.

Weniger Minschen ut de Ukraine na Düütschland kamen

Wiesbaden: In´t verleden Johr sind düütlich weniger Minschen ut de Ukraine na Düütschland totrucken as in 2022. Dat Statistische Bunnsamt seggt, dat dat rund 227.000 Minschen sünd, de ut de Ukraine kamen sünd. Man to de glieken Tied sünd ok 156.000 Minschen wedder in de Ukraine torüch trucken. Bi de Meesten de towannert sünd hannelt sik dat üm Froen un Kinner un junge Lüüd.

Stadt Hannover maakt Sluss mit Ümweltzoon

Hannover: De Stadt Hannover maakt heel un deel Sluss mit ehre Ümweltzoon. Vun hütt an bruukt de Autos keene gröne Plakett mehr, wenn se in de Binnenstadt ünnerwegens sünd. De Stadt seggt, dat man de Grenz vun de Schadstoffwerte ok ahn de Ümweltzoon inhollen kann. Dat is bi Prüfungen ruutkamen. De Ümweltzoon hebbt se vör 16 Johren inricht, wiel de Stickstoffdioxid- Werte to hoch wesen sünd.

Autobahn 27 twischen Hagen un Uthlede total sperrt

Hagen: De Autobahn 27 twischen Hagen un Uthlede ist total sperrt. Grund dorför is een rott Sloot ünner de Straat. Dor spöölt dat Water ünnerweg de Fohrbahn, un nu kann se afsacken. Dat is een Gefohr för all de dor längs willt. De Ümweg geiht över de Landstraten. De Polizei geiht dorvun ut, dat dat to Staus kamen kann. Dat dicht maken kann tominnst bit to eene Weeken duern.

Dat Weer

Un nu een Blick op dat Weer: In Bremerhaben un Bremen, in Defhold un in Emm sünd dat opstünns 9 Graad. Hütt Vomdag gifft dat noch veel Regen, de över de Lüneborger Heid na Hannover aftreckt. An´t Nomdag kummt denn vun`t Emsland her wedder dichtere Wulken op un dat fangt wedder an to pieseln, bi 10 bit 13 Graad. Tokamen Nacht kummt dor onnig wat vun baven rünner. Wi mööt ok mit Blitz un Dunnerslag reken. De Wind weiht deels mit Störmsche Böen. An de Nordsee mööt wi ok mit Orkanböen reken, bi 6 bit 4 Graad.  Morrn wesselt sik de Sünn un de Wulken af. De dicken Wulken bringt jümmers wedder Regenschuers un Grisselgrussel mit sik. An de See pustet de Wind noch onnig. De Temperaturen liggt bi 7 bit 10 Graad. Sünnavend gifft dat eenen Mix ut Sünn, Wulken un Schuers. Hier un dor ok Grisselgrusselgewidder. Dat is nich mehr so windig, bi 6 bit 9 Graad. Dat weren de Narichten op Platt. Tohoopstellt hett se Sven Weingärtner. Trechtmaakt un vörleest vun Antje Kruppa.