Plattdeutsche Nachrichten Plattdüütsche Narichten vun'n 20. Februar 2024

Lufthansa: Mitarbeiders an’n Grund streikt

Frankfort: Bi de Lufthansa is en Warnstreik vun de Mitarbeiders an’n Grund losgahn. Een Dag schall de duern. Hunnerte Maschinen warrt woll nich flegen könen. Ok in Bremen fallt en Reeg Törns ut, vör allen vun un na Frankfort un München. De Gewarkschap Verdi verlangt 12 en half Perzent mehr Geld. Un dat wüllt se op düsse Oort dörsetten.

Selensky: Lege Laag ok wegen to wenig Munitschoon

Kiew: De ukrainsche Präsident Selenskyi hett Suldaten in de Gegend um Lupjansk besöcht. Achteran meen he in en Videonaricht: De Laag an de Front weer afsunnerlich leeg. Selenskyi sä: Dat speelt Russland in de Hand, dat to wenig Munitschoon na de Ukraine kummt.

Blots Linke wüllt Volksentscheed to de Schuldenbrems

Bremen: In’t Lannsparlament wüllt blots de Linken en Volksentscheed to de Schuldenbrems. All de annern Frakschonen sünd dorgegen. Dat hett buten und binnen to weten kregen. Een vun de Grönen sä: Wenn de Schuldenbrems weg weer, wurr een de Schulden blots op de beiden Städte Bremen un Bremerhaven nee opdelen.

Streik ok bi de Bussen in Bremerhaven

Bremerhaven: Siet fröh an’n Morgen fohrt in Bremerhaven keen Bus. Ok de Kunnencenters blievt den Dag över dicht. Wat dor achter stickt: De Gewarkschap Verdi hett bi „Bremerhaven Bus“ en Warnstreik op de Been stellt, de 24 Stunnen lopen schall. Ok in en Reeg Städte in Neddersassen löppt en Streik bi Bus un Bahn. Verdi will längere Pausentieden dörsetten un mehr Urlaubsgeld.

Football-Weltmeister Andy Brehme is doot

Berlin: Football-Weltmeister Andreas Brehme is dootbleven. He is 63 Johr oolt worrn. Storven is he woll an’n Hartslag. 1990 harr Brehme in dat WM-Endspeel gegen Argentinien mit sien Ölven-Meter dat 1:0 schaten. So weer Düütschland Weltmeister worrn.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven un Ollenborg 6 Graad, op Börkum sünd dat 8 Graad. Vundaag: Vele Wulken, man af un an kriegt wi ok de Sunn mal to sehn. Eerst noch dröög, aver an’n Namiddag un Avend treckt vun de Noordsee her doch wedder Schuer rin. Dat Thermometer krabbelt op 8 bet 11 Graad. De Wind dorto weiht flau oder en beten mehr vun de westen Kant. Dat kann ok düchtig opbriesen. Tokamen Nacht: Vun de Noordsee schuuvt sik dichte Wulken mit Regen rin. Gegen Morgen treckt de denn aver över de Veerner Heid af. Achteran: Mal mehr, mal weniger Wulken. Bi 9 bet 7 Graad. Morgen: Vele Wulken, wenig Sunnschien. Dat blifft meisttiets dröög. An’n Avend kummt vun Westen her mehr Regen. Dat Ganze bi 9 bet 12 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Sven Kuhnen.