Plattdeutsche Nachrichten Plattdüütsche Narichten vun'n 15. Februar 2024

Bi Super-Bowl-Paraad in Kansas is schaten worrn

Kansas City: Bi de groden Paraad för de Kansas City Chiefs wegen dat Winnen vun’n Super-Bowl is an’n Avend schaten worrn. As de Polizei vermellt, is dorbi een Minsch doodbleven un tominnst 21 Minschen versehrt worrn. To’n Deel geiht dat ok üm Leven un Dood. Ok ölben Kinner sünd dorbi. Dree Lüüd, vun de se glöövt datt se schaten hebbt, sünd fastnahmen worrn. Wat dorachter stickt, is betto noch nich klaar.

Pistorius lehnt europääsche Atoomwaffen-Debatt af

Brüssel: Bunnsminister för’t Verdeffendeern Pistorius hett de Debatt över EU-Atoomwaffen kritiseert. Dat gifft opstünns keen Grund dorför, över den nuklearen Schutzschirm to diskuteern, säe de SPD-Politiker an’n Avend in de ARD. He wünscht sik dor mehr Bedachtsamkeit. Dat gellt ok för de letzten Utseggens vun den fröheren US-Präsident Trump. De Mehrsten vun de Tostännigen in de USA weet bannig goot, wat se an ehr Nato-Partners in Europa hebbt, säe Pistorius.

Nato-Minister för’t Verdeffendeern snackt över Ukraine-Hölp

Brüssel: De Ministers för’t Verdeffendeern vun de Nato-Staaten sitt opstünns wieter in Brüssel tosamen. Dorbi geiht dat besünners üm Stütt mit Geld för de Ukraine. Bavento will Nato-Generaalsekretäär Stoltenberg bi dat Drapen doröver informeern, wat sik bi de Utgaven för’t Verdeffendeern vun de Lidmaten daan hett. Na letzten Angaven sünd düsse Utgaven in 2023 besünners hooch anstegen. Meist een Drüttel vun de Staaten ward aver woll ok in dütt Johr dat Twee-Perzent-Ziel vun de Nato nich schaffen.    

Weltruumrakeet vun US-Firma ünnerwegens to’n Maand

Cape Canaveral: In Cape Canaveral is an’n Morgen en wietere Weltruumrakeet to’n Maand hen losflagen. En Firma ut Texas haapt, datt de Sonde op de Space-X-Rakeet in een Week op den Maand ankummt. De Sonde schall dat Landen sülbens filmen. De Start weer al för güstern plaant, aver dat geev technische Maleschen. Betto sünd mehrere Versöken vun en kommerziellen Maandlanden fehlslaan.

Brüssel nickt Fördergeld för Bremer Stahlwark af

Bremen: Dat Millionen-Fördergeld för dat Bremer Stahlwark is vun de Europääschen Union formaal afnickt worrn. Dat hett de Wirtschaftssenatersche Vogt in de Bremschen Börgerschaft bekanntgeven. Dormit kriggt dat Stahlwark staatlich Geld in Hööchde vun 840 Millionen Euro, dormit dat klimafründlich umboet ward. 250 Millionen Euro kaamt vun de Bremer Landsregeern.

Dat Weer

Un nu en Blick op dat Weer: In Bremerhaben un Deefholt 11, un in Bremen, Leer un Cloppenborg sünd dat opstünns 12 Graad. Hüüt ist dat dicht wulkig, un hier un dor regent dat eerst’n beten. Vun de Nedderlannen un de Ems her breedt sik denn aver Regen in Maten na Oosten hen ut. An’n Namiddag ward de Regen vun Westen her wedder weniger, un twüschen Oostfreesland un dat Münsterland kann dat kort oplockern. Dat ward noch lauer as toletzt mit 10 bet 14 Graad. In de Nacht hollt sik veele Wulken, dortwüschen lockert dat ok mal op. Hier un dor kann dat lichte Schuers geven, meisttiets blifft dat aver dröög un lau bi 11 bet 9 Graad. Morgen is dat eerst mal mehr, mal weniger wulkig, meisttiets blifft dat dröög, un’n beten Sünnschien gifft dat ok. Över Dag kaamt vun Westen her jümmer mehr dichte Wulken mit Regenschuers op. Tovör ward dat bannig lau bi 12 bet 16 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.