Plattdeutsche Nachrichten Plattdüütsche Narichten vun'n 14. Februar 2024

Düütschland mellt Rekordsumm an Utgaven för’t Verdeffendeern

Brüssel: Düütschland hett de NATO en Rekordsumm an Utgaven för’t Verdeffendeern mellt. Na Informatschonen vun de Düütschen Presseagentur sünd de to’n eersten Mal siet dree Johrteihnten över de Grenz vun twee Perzent vun de Wirtschaftsleistung ruutgahn. So mellt de Bunnsregeern Utgaven för’t Verdeffendeern vun 73,4 Milliarden Dollar. NATO-Generaalsekretär Stoltenberg will in en halv Stünn de offiziellen Tallen vun de Lidmatenlänner bekanntgeven.

Biden kritiseert Trump-Menen to NATO

Washington: US-Präsident Biden hett dat, wat sien Vörgänger Trump to de NATO seggt hett, böös kritiseert. Biden nöömt dat dösig, schanneerlich un gefährlich. He ward nienich vör en russ’schen Diktator in de Knee gahn, säe Biden. Trump hett bi en Wahlkampf-Optreden an’t Wekenenn seggt, datt he de NATO-Länner bi Attacken vun Russland keen US-Schutz mehr geven will, wenn se nich noog Geld för’t Verdeffendeern utgeevt. Sietdem ward ünner annern in Düütschland daröver diskuteert, wat Europa to’n Afschrecken en gemeensam Atoomwaffenlager bruukt.

Diskuteern över wietere Paus bi’t Scheten in Gaza

Kairo: Bi dat Verhanneln över en Paus bi’t Scheten för den Gazastriepen un dat Freelaten vun israeelschen Geiseln is betto noch keen Enn aftosehn. Hoge Vertreders ut de USA, Israel, Katar un Ägypten sünd sik na Utkunft vun de Medien bi dat Drapen nich enig worrn. In de tokamen dree Daag wüllt se aver wieterverhanneln. Ägypten, Katar un de USA versöökt opstünns dat hentokriegen, datt dat Scheten in’n Krieg twüschen Israel und de Hamas för längere Tiet ophöört.

Ruum för’t Innehmen vun Drogen in Bremen in’t twete halve Johr

Bremen: De plaante Ruum för dat Innehmen vun Drogen in de Bremer Binnenstadt ward woll in dat twete halve Johr fardig. Dat hett Gesundheitssenatersche Bernhard in de Stadtbörgerschaft künnig maakt. Dorto ward en Huus in de Näägde vun’n Hauptbahnhoff in de Friedrich-Rauers-Straat umboet. Blangen den Drogenkonsumruum wüllt se hier wietere hölpen Hannen tosamenfaten. De Mietkuntrakt geiht över 17 Johr. Bernhard geiht vun tohooprekent meist söbenanhalf Millionen Euro an Hüer ut.

Meyer Warft kriggt nee’en Grootopdrag för Krüüzfohrer

Papenborg: De Meyer Warft in Papenborg hett en nee’en Opdrag för en groden Krüüzfohrer kregen. As dat Ünnernehmen vermellt hett, is mit de Carnival Cruise Line en Verdrag över dat Boen vun en Schipp för 6.400 Fohrgäst afmaakt worrn. In dree Johr wüllt se dat utlevern. Dat Schipp schall na Angaven vun de Meyer-Grupp en Andriev mit Nattgas kriegen. De Papenborger Warft süht den Opdrag as Teken dorför, datt sik de Krüüzfohrt-Markt wedder verhaalt hett.

Dat Weer

Un nu en Blick op dat Weer: In Cuxhaben und Nordholt 7, in Bremerhaben 8, in Bremen 9, un in Leer sünd dat opstünns 10 Graad. Hüüt is dat eerst wulkendüüster un dat regent meist överall. Hier un dor kann dat ok degten Regen geven. Bet to’n Middag treckt de Regen över de Elv af, denn blifft ok mal dröög, aver dat gifft ok noch wietere Schuers. De Sünn kriggt wi meist gor nich to sehn bi 9 bet 11 Graad. In de Nacht hollt sik dichte Wulken, de jümmer wedder’n beten Regen bringt. De Temperaturen gaht meist gor nich trüch un liggt bi 11 bet 8 Graad. Morgen geiht dat dicht wulkig un mit Regen wieter. Dorbi ward dat ok ahn Sünnschien mit Wind ut Süüden noch’n beten lauer mit 10 bet 14 Graad.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Marc Gelhart.