Plattdeutsche Nachrichten Plattdüütsche Narichten vun'n 13. Februar 2024

Scholz gegen Drauhen vun Trump

Berlin: Bunnskanzler Scholz hett dat Drauhen vun den fröheren US-Präsident Trump gegen europääsche Nato-Partners kritiseert. Elkeen Trüchnehmen vun de Bistandsgarantie is nich to verantworden un blots in Russlands Sinn, säe Scholz. Trump hett güstern andüdt, datt he, wenn he wedder as US-Präsident wählt ward, de Nato-Staaten nich mehr verdeffendeern will, wenn de nich noog Geld in dat Nato-Bündnis inbetahlt.

Düchtige Attacken vun Russland gegen Ukraine

Kiew: De ukrainsche Luftwaff vermellt Drohnen- un Raketeninslääg in de Grootstadt Dnipro. Ok Inrichtungen vun de zivilen Infrastruktur hebbt woll wat afkregen. Na Utkunft vun de Medien sünd in’n poor Stadtdelen Stroom un Water utfullen. De Attacken vun Russland gegen de Ukraine sünd toletzt düütlich stärker worrn.

Bussen in Bremerhaben fohrt to’n Deel nich

Bremerhaben: De Gewarkschaft Verdi hett de Mitarbeiders vun Bremerhaben Bus to en Streik opfordert. Dorachter stickt dat Tarifverhanneln för den Verkehr vun dichtbi in de Gemeenden. De Lawai för Wohrschau schall 24 Stünnen anduern. Bremerhaben Bus geiht dorvun ut, datt blots wenige Fohrten utfallt. De Fohrgäst schüllt sik aver liekers in’t Internet oder in de App informeern.

Akten-Kuddelmuddel is Thema in de Bremschen Stadtbörgerschaft

Bremen: In’t Bremer Soziaalzentrum 5 sünd över Johren Bargen vun Akten op’n Disch liggenbleven. Bavento sünd Gelder nich korrekt infordert oder utbetahlt worrn. För de Stadt Bremen is dorbi na Angaven vun’n Senaat en Schaden vun meist twee Millionen Euro tosamenkamen. De FDP will en parlamentaarschen Ünnersökensutschuss, aver dat lehnt de CDU as de anner Oppositschoonspartei af.

Füer in’n Landkreis Wersermarsch mit een Doden

Stadland: Bi en Füer vun en Reetdackhuus bi Stadland is een Minsch doodbleven. Wo dat to dat Füer op den Buernhoff kamen is, is betto noch nich klaar. Üm un bi hunnert Füerwehrlüüd weern in’n Insatz. De Hoff liggt wietaf, un so mossen de Hölpslüüd en Löschwaterleitung över twee Kilometer Längde verleggen.  

Dat Weer

Un nu en Blick op dat Weer: In Möppen 3, in Bremen un Ollenborg 4, un in Bremerhaben un Emmen sünd dat opstünns 5 Graad. Hüüt treckt to’n Deel dichtere Wulkenfeller vörbi. Dortwüschen kummt de Sünn af un an rut. Toeerst kann dat an de Küst’n beten Regen geven, to’n Namiddag hen sünd ok in’t Binnenland enkelte Schuers mööglich. Bet dorhen blifft dat aver dröög bi 7 bet 9 Graad. In de Nacht treckt överall dichte Wulken ut’n Westen op, blots bi de Lünborger Heid un an de Aller kann dat eerst noch oplockern. Twüschen Werser- un Elvmündung fallt’n poor Druppen. Vun Middernacht an treckt vun’t Emsland Regen op, de sik bet to’n Morgen bet to de Elv utbreedt bi 6 bet 4 Graad. Morgen treckt de Regen över de Elv af. Denn gifft dat en Wessel vun dichte Wulken mit enkelte Schuers un korten Sünnschien. An’n Namiddag ward de Wulken noch dichter, un vun dat Emsland kummt noch mehr Regen na bi 8 bet 12 Graad.

Dat weern de Narichten op platt. Tohoopstellt hett se Ralph Stölting. Op Platt trechtmaakt un vörleest vun Marc Gelhart.