Plattdeutsche Nachrichten Plattdüütsche Narichten vun'n 8. Februar 2024

Dat eerste Mal: een Johr lang mehr as 1,5 Graad warmer op de Eer

Bonn: Dat eerste Mal weer dat op de Eer dat ganze Johr lang mehr as annerthalf Graad warmer. Dat hett de EU-Klimadeenst Copernicus anseggt. In de verleden 12 Maand is dat op de ganze Welt in’n Snitt 1,52 Graad warmer ween as de Utgangsweert in’t 19. Johrhunnert. Un ok dat is rutkamen: De Januar weer mit 13 Graad de warmste överhaupt, solang as se de Temperaturen opschrievt.

Fregatt Hessen nimmt Kurs op dat Rode Meer

Willemshaven: De Bunnswehr-Fregatt „Hessen“ hett Kurs nahmen op dat Rode Meer. Dat Verteidigungsministerium hett vermellt: Dat Schipp mit 240 Suldatinnen un Suldaten an Boord is eerst mal op den Weg na dat Middelmeer. De EU un ok de Bunnsdag mööt eerst noch ja seggen to en internatschonale Marine-Akschoon, um Hannelsscheep in’t Rode Meer aftosekern. Huthi-Rebellen ut den Jemen griept dor mal um mal Hannelsscheep an.

Medizin-Fachpersonal schall een Dag lang streiken

Bremen: Patschenten mööt sik bi’n Dokter vundaag dor op instellen, dat se wat länger töven mööt. Dor achter stickt en Warnstreik vun dat medizinsche Fachpersonal, Arzthölpslüüd un Azubis. So will de Verband vun medizinsche Profeschonen Druck maken bi dat Uthanneln vun de Tarifen. In Bremen hett de Verband sowat 3000 Angestellte to en Warnstreik opropen – in Neddersassen sünd dat 34000.

Klinikum Mitt in Bremerhaven: Bedrievsraat un Gewarkschap wüllt weten, woneem dat hengeiht

Bremerhaven: Wo de Ameos-Kunzern anseggt hett, dat Klinikum Mitt warrt dichtmaakt, löppt dor an’n Middag en Bedrievsversammeln. De Bedrievsraat un de Gewarkschapen wüllt de Lüüd, de dor arbeiden doot, vertellen, wat de Kunzern vörhett. Kort vörher kaamt se tohoop mit de, de bi de Klinik dat Leit hebbt. Noch is nich rut, wokeen vun de 300 Mitarbeiders sien Job verleert. Al in‘n Mai will de Kunzern dat Klinikum dichtmaken. Se seggt: De Bedriev is to düer.

Huus brennt in Jaad: Een Mann doot

Jaad: Verleden Nacht hett dat in en Huus för mehrere Parteien in den Landkreis Wersermasch brennt. Een Minsch is dorbi to Dode kamen. En Naversch harr bi de Füerwehr anropen. De böverste Etaasch is daalbrennt, un dor hett de Füerwehr en Doden funnen. Wat dat de Mann vun 58 Johr is, de in de Wahnung leevt hett, is noch nich kloor.

Dat Weer

Un woans süht dat mit dat Weer umto ut? Opstunns hebbt wi in Bremen un Kneten 0 Graad, in Bremerhaven is dat 1 un in Cuxhaven sünd dat 3 Graad över 0. Vundaag treckt sik de Wulken mehr un mehr tohoop, un an’n Namiddag kaamt vun Westen her Regen oder Sneeregen rin. Hier un dor kann ok natten Snee daalkamen. An de See blifft dat aver bet an’n Avend eerst noch dröög. Dat Thermometer krabbelt op 3 bet 5 Graad. De Wind dorto weiht flau, he dreiht över Dag vun de süüdwesten op de oosten Kant. An’n Avend briest he düchtig op. Tokamen Nacht: An de Küst eeerst noch dröög. Duert aver nich lang, denn pladdert dat överall in’t Bremen-Een-Land. Bi Sneeregen oder Snee kann dat ok glatt warrn. Bi 0 bet 2 Graad. Morgen: Wulken, un de smiet Regen op us daal. An’n Namiddag kann dat vun’t Ollenborger Mönsterland her ok kort mal oplockern. Dat Ganze bi 4 bet 11 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.