Plattdeutsche Nachrichten Plattdüütsche Narichten vun'n 7. Februar 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 7. Februar 2024

  • Lufthansa: Hunnerte Flegers köönt nich flegen
  • Nedderlannen: Keen Koalitschoon in Sicht
  • Landdag in Hannover: Nadrag to den Huusholt för Hoochwater-Geld
  • Buern op Treckers fohrt na Demo in Hannover
  • Wellbrock: Dat twete Rennen bi de WM
  • Dat Weer
Bild: Radio Bremen

Informationen zum Audio

Lufthansa: Hunnerte Flegers köönt nich flegen

Frankfort an’n Main: Wo de Lufthansa-Mitarbeiders an’n Grund vundaag in Warnstreik sünd, fallt vele Flegers ut oder se sünd to laat. Mehr as 100 000 reisen Lüüd hebbt dor Last vun. Vun de 1000 Touren hett de Lufthansa 80 bet 90 Perzent wegstreken. Ok an den Bremer Flegerhaven warrt vundaag keen Lufthansa-Fleger starten oder lannen.

Nedderlannen: Keen Koalitschoon in Sicht

Den Haag: Sowat teihn Weken na de Parlamentswahlen in de Nedderlannen is bi dat Verhanneln um en Koalitschoon nix bi rutsuert. De Mitt-Rechts-Partei NSC will nich mehr mitsnacken, wenn dat dorum geiht, en Regerung op de Been to stellen. Wat dor achter stickt: Över de Staatskassen köönt se sik nich enig warrn. De Rechtspopulist Wilders harr bi de Wahl de meisten Stimmen kregen, man nu kann he keen Regerung mehr opstellen.

Landdag in Hannover: Nadrag to den Huusholt för Hoochwater-Geld

Hannover: De Landdag in Hannover will an’n Middag fastleggen: För Hoochwater-Geld gifft dat en Nadrag to den Huusholt. Dat Finanzministerium seggt: Dat geiht um 110 Millionen Euro. Mit dat Geld wüllt se den Schaden betahlen, to’n Bispeel an Straten, Kabeln oder Rohren. Ok warrt Geld inplaant, dat de Minschen beter vör Hoochwater schützt warrt.

Buern op Treckers fohrt na Demo in Hannover

Hannover: Hunnerte Treckers hebbt sik ut vele Gegenden in Neddersassen op den Weg na Hannover maakt. Dor wüllt sik de Buern vör den Landdag versammeln. Opropen hebbt de Koppels „Land schafft Verbindung“ un „Fre’e Buern“. De Polizei Hannover seggt: För de Demo sünd 2000 Lüüd anmellt.

Wellbrock: Dat twete Rennen bi de WM

Doha: Wo dat eerste Wettswümmen nich goot lopen is, mutt Freewater-Olympiasieger Florian Wellbrock bi de Weltmeisterschaften in Katar nu dat twete Mal ran. De Mann, de in Bremen op de Welt kamen is, weer an’n Sünndag över 10 Kilometer blots as Nummer 29 ankamen. Nu will he över 5 Kilometer Weltmeister blieven.

Dat Weer

Un woans süht dat mit dat Weer umto ut? Opstunns hebbt wi in Bremen un Möppen 3 Graad, in Weyerbarg sünd dat 4 un in Bremerhaven 5 Graad. Vundaag: Wo de letzte Regen na Süden aftrocken is, sünd eerst Wulken vun de Noordsee rinkamen. Över Dag mööt wi uns op mal mehr, mal weniger Wulken mit en lütt beten Sunnschien inrichten. Dat Thermometer krabbelt op 5 bet 7 Graad. De Wind dorto weiht in’t Binnenland flau oder en beten mehr vun de westen bet noordwesten Kant, an de See ok mit deegte Böen. Tokamen Nacht: Mal vele Wulken, mal weniger. Dat blifft woll dröög. Blots an de Küst kann hier un dor en beten Sneeregen oder Snee daalkamen. Bi 2 Graad över 0 op de Inseln bet 2 Graad unner 0. Morgen: Eerst dröög, an‘n Middag un Namiddag schuuvt sik Wulken rin, de veel Regen- un Sneeregen mitbringt. De Snee kann ok liggenblieven. Dat Ganze bi 2 bet 4 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.

Bremen Eins Livestream & aktuelle Sendung.

Die Nacht

Die Nacht

Jetzt läuft:

Coldplay Clocks
  • Jetzt läuft:

    Coldplay Clocks