Plattdeutsche Nachrichten Plattdüütsche Narichten vun'n 27. November 2023

Krisen-Drapen bi Habeck

Berlin: De Ministers för Wirtschap un Energie bi den Bund un de Länner hebbt sik to en Krisen-Drapen tohoopsett. Bavenan steiht de Fraag: Wat kummt na dat Ordeel vun dat Verfatensgericht to den Huusholt. Wo de Bund Milliarden Euro to wenig in sien Putt hett, sünd enige Länner nu bang: Fördergeld, dat al toseggt weer, kunn wegstreken warrn. Noch gifft dat keen kloren Kurs, woans se dat Lock in den Huusholt dichtkriegen wüllt.

Israel un Hamas: Eerstmal nich mehr scheten

Tel Aviv: In’t Gaza-Land schall eerstmal bet morgen nich schaten warrn. Man dat kunn ok noch wiederlopen. De Baas vun de israelsche Regerung Netanjahu hett seggt, he is sowiet dormit inverstahn. Eerst harr he mit US-Präsident Biden telefoneert, achteran sä Netanjahu: Wenn op düsse Oort mehr Geisel freekaamt, denn weer dat goot so. Wenn de Tiet um is, warrt dat israelsche Militär aber mit Scheten wiedermaken, dat se ok dat schafft, wat se sik vörnahmen hebbt. Vun de Hamas weer to hören: Kunn ween, dat de Paus twee bet veer Daag länger löppt.

Top-Drapen to E-Wagen in’t Kanzleramt

Berlin: Woans dat wiedergeiht mit de Elektro-Mobilität, dat is de Fraag bi en Top-Drapen bi Bunnskanzler Scholz. Mit an’n Disch sitt Auto-Boers un -Toleverers, Gewarkschapen un Bedrievsrööt, Umweltverbänn un ok Wetenschaplers. Besnacken wüllt se, woans E-Autos billiger warrn köönt. Un ok, dat de Mööglichkeiten, de Wagen optoladen, wieder utboot warrn schüllt.

Bremer CDU wählt neen Vörsitter

Bremen: De CDU kummt vunavend to en Extra-Parteidag tohoop. Se wüllt en neen Vörsitter wählen. Lanns-Baas Carsten Meyer-Heder harr Enn September dat Stüer ut de Hand leggt; vörher harr he bi Radio Bremen wat to de AfD seggt, wat en Reeg Nafragen utlööst harr. Sien Nafolger as de Böverste vun de Partei warrt woll Heiko Strohmann. Vele Johren lang hett he in de Börgerschap seten. Bet nu is he de eenzigste op de List. Dat sik op den Parteidag noch anner Kandidaten mellt, dor rekent nüms mit.

Leer: Füer in’t Krankenhuus

Leer: Verleden Nacht hett dat in dat Borromäus-Hospital brennt. 39 Patschenten müssen annerwegens unnerbrocht warrn: In anner Afdelungen vun dat Krankenhuus un in en Heim för öllere Lüüd blangenan. Dat Füer weer in en Technikkamer in den Keller losgahn un harr gau veel Rook maakt. Verletzt hett sik nüms. Middewiel sünd de Patschenten wedder trüch in jümehr Kamern. Un ok de Bedriev vun’t Krankenhuus löppt wedder normal, weer vun de Polizei to hören. Woso dat dor brennt hett: Dor weer woll an de Technik wat twei.

Dat Weer

Un woans süht dat mit dat Weer umto ut? Opstunns hebbt wi in Emm 3 Graad, in Bremen, Bremerhaven un Weyerbarg sünd dat 4 Graad. Vundaag: Wulken, de keen Spier Sunnschien dörlaat. Dat regent in een Stremel, an’n Avend in’t Dreeeck twüschen Elv un Werser un na den Middellandkanaal to ok as Sneeregen oder Snee. Dat Thermometer krabbelt op 2 bet 4 Graad. De Wind dorto weiht eerst flau oder en beten mehr vun de süden bet süüdoosten Kant. An’n Namiddag un Avend puust he duller, un dat vun de oosten bet noordoosten Kant. Tokamen Nacht: Eerst Regen oder Sneeregen. Vun de Elv treckt denn Snee ran. An de Küst lockert de Wulken op. Bi 2 Graad över bet 1 Graad ünner 0. Hier un dor kann dat glatt warrn. Morgen: Pö a pö treckt de letzten Sneeschuer na Süüdoosten af. Achteran seht wi lockere Wulken un ok Sunnschien. An’n Namiddag an de See mehr Wulken, man dat blifft woll dröög. Bi 1 Graad ünner bet 2 Graad över 0. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Birgit Sagemann.