Plattdeutsche Nachrichten Plattdüütsche Narichten vun'n 23. November 2023

Rechtspopulist Wilders winnt woll Wahlen in de Nedderlannen

Den Haag: De Nedderlannen staht na de vörtrucken Parlamentswahl vör en Ruck na rechts. Na dat, wat se bet nu utrekent hebbt, kriggt de Partei vun den Rechtspopulisten Wilders meist 35 vun de all tohoop 150 Sitzen. Dat sünd mehr as dubbelt so veel Mandate as bi de verleden Wahl in’t Johr 2021. Bet nu steiht aver noch nich fast, wecke Regerungskoalitschoon na de Wahlen billdt ward.  

Geiseln ut Gazastriepen ward nich vör morgen freelaten

Jerusalem: Wietere israeelsche Geiseln, de dör de radikaal islamistsche Hamas versleppt worrn sünd, ward woll nich vör morgen freelaten. Egentlich hebbt se hüüt al dormit rekent. Dat Verhanneln duert an, as de natschonale Sekerheitsberader an’n Avend vermellt hett. De Hamas un de israeelsche Regeern harrn sik op en Paus bi’t Scheten in’n Gazastriepen vun tominnst veer Daag un dat Uttuuschen vun 50 Geiseln gegen gefangen Palästinenser enigt.

Razzia in Wahnungen vun Hamas-Anhängers

Berlin: In veer Bunnslänner, ünner annern ok in Neddersassen, sünd an’n Morgen Wahnungen un Büros vun Lüüd vun de Hamas un Samidoun dörsöcht worrn. Mit de Razzia, de de Staatsanwaltschaft Berlin in Opdrag geven hett, wüllt se de verbaden Strukturen vun düsse Gruppen wieter opklaren. Dat hett dat Binnenministerium vermellt. Dat Ministerium hett Aktivitäten vun de Hamas un vun dat Stütt- un Stöhnnettwark Samidoun in Düütschland Anfang November verbaden.

Düütsche Bahn un Gewarkschaft GDL gaht in twete Tarifrunn

Berlin: De Tarifverhanneln twüschen de Gewarkschaft Düütsche Lokomotivföhrers GDL un de Düütschen Bahn gaht glieks in de twete Runn. En Enn vun dat Verhanneln is noch lang nich in Sicht. De GDL hett in de verleden Week mit eerste Warnstreiks den Bahnverkehr lahmleggt. De Gewarkschaft drauht mit wietere Streiks. Bavento löppt en Urafstimmen ünner de GDL-Liddmaten över Streiks, bi de dat Enn nich aftosehn is.

Hunteklappbrüch blifft wegen Warnstreiks dicht

Ollenborg: Wokeen hüüt ut de Wersermarsch na Bremen oder Demorst will, mutt mit grode Ümweeg reken. De Hunteklappbrüch vun de B212 bi Huntebrück blifft den heelen Dag bet Middernacht dicht. Dat liggt an de Warnstreiks vun’n Staatsdeenst, bi de ok de Wärters vun de Brüch mitmaakt. Utnahmen gifft dat blots för Notfall- un Polizeiautos.

Dat Weer

Un nu en Blick op dat Weer: In Achim un Nienborg 10, in Bremen, Bremerhaben un Leer 11, un in Brinkum sünd dat opstünns 12 Graad. Hüüt is dat meisttiets wulkig. De Sünn kummt hööchstens an de Küst mal dör. Af un an fallt’n beten Regen, to’n Avend hen vun de Noordsee her ok fakener. De Temperaturen stiggt na en lauen Start wieter an op 11 bet 13 Graad. In de Nacht treckt vun Noorden her Regenschuers dör. Achteran lockert dat af un an op, aver dor kummt ok noch wedder Schuers na. Dat Thermometer sackt daal op 6 bet 4 Graad. Morgen gifft dat mehr Wulken as Sünn, un af un an Regen oder Schuers. An de Küst is ok Gewidder mit Grisselgrussel mööglich. To’n Avend hen kann dat ok Sneeregen geven. Dorto Temperaturen vun 6 bet 8 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.