Plattdeutsche Nachrichten Plattdüütsche Narichten vun'n 24. Mai 2023

Mit wokeen will de Bremer SPD över en Koalitschoon verhanneln

Bremen: De Bremer SPD will vunavend fastleggen, mit wat för en Partei oder Parteien se över en Koalitschoon verhanneln will. Vun de Tallen her kunnen se mit de Grönen un de Linken wiedermaken. Man se kunnen ok in en grote Koalitschoon mit de CDU gahn. De Sozialdemokraten harrn sik in de verleden Daag mit de annern Parteien an een Disch sett. Bi de Börgerschapswahl vör teihn Daag harr de SPD de meisten Stimmen kregen.

Ampel stritt wegen Heizungsgesetz

Berlin: Dat Hen un Her in de Bunnsregerung wegen dat Heizungsgesetz is nich vun’n Disch. De FDP-Fro Strack-Zimmermann meen, se kunn sik goot vörstellen, dat de Ampel-Koalitschoon noch op een Brett kummt. Se bleev aver op den Kurs vun de Liberalen, dat dorför mehr Tiet nödig weer. Anners as de SPD un de Grönen dat vörhebbt, kunn dat Gesetz vör de Sommerferien nich mehr dör den Bunnsdag lopen, sä Strack-Zimmermann. Se verlangt: Dat müss heel un deel nee opstellt warrn.

Mehr Geld för Dokters an kommunale Kliniken

Berlin: Um un bi 60.000 Dokters an kommunale Krankenhüüs schüllt mehr Geld kriegen. In twee Stappen gifft dat knapp 9 Perzent mehr. Dat hebbt de Dokter-Gewarkschap Marburger Bund un de Arbeitgevers vermellt. Solang as se verhannelt hebbt, weren in de verleden Weken jümmers mal wedder Streiks an kommunale Krankenhüüs opkamen.

Woneem kummt dat Eten un Drinken her: Bunnskabinett will Utkunft

Berlin: Wenn wi in en Supermark Eten un Drinken inkööpt, schüllt wi düütlicher to weten kriegen, woneem de Saken herkaamt. So steiht dat in en Vörschrift, de Ernährungsminister Özdemir vundaag in’t Bunnskabinett vörleggt. Dor steiht wat vun de Plicht, kloor uttowiesen, ut wat för en Land de Saken kaamt. Dat schall ok för Fleesch gellen, dat nich inpackt is.

Krögers un Wirtslüüd in’t Land Bremen hebbt to wenig Lüüd

Bremen: Wirts- un Gasthüüs in Bremen un Bremerhaven finnt jümmers weniger Lüüd, de för jem arbeiden wüllt. De Arbeitnehmerkamer hett rutfunnen: Dat duert normal mehr as fief Maand, dat en Arbeitssteed besett warrn kann. De Kamer seggt: De Grundlagen för düsse Arbeit sünd to leeg. Veel Geld gifft dat nich, faken is de Tiet knapp un fit mutt een ok ween. De Bremer Arbeitnehmerkamer meent: Düsse Job treckt eerst denn mehr Lüüd an, wenn se mehr Geld verdenen köönt.

Dat Weer

Un woans süht dat mit dat Weer umto ut? Opstunns hebbt wi in Bremen un Achem 10 Graad, in Bremerhaven sünd dat 11 un in Bevers 12 Graad. Vundaag: Eerst meist överall dichte Wulken, hier oder dor kann dat ok pladdern, ok mal een, twee Stunnen lang. Över Dag dröögt dat aver mehr dör. An’n Namiddag lockert de Wulken vun de Elv un de Noordsee her pö a pö op, un denn kriggt ok de Sünn mal de Bavenhand. Dat Thermometer krabbelt op 11 bet 17 Graad. De Wind dorto weiht flau oder en beten mehr vun de noordwesten Kant, ok mit frische bet deegte Böen. Tokamen Nacht: Funkeln Steerns. En poor Wulkenfeller treckt vun de Noordsee rin, man dat blifft dröög. Twüschen Hase, Hunte un Aller kann sik fröh an’n Morgen Daak utbillen. Dat Ganze bi 11 bet 6 Graad. Morgen: Eerst vele Wulken, hier un dor ok Daak, man denn ok wedder mit Sünnschien. Dröög. Vun Middag op an lacht uns vun de See her mehr un mehr de Sünn. En lütt beten warmer mit 15 bet 18 Graad, an de See 12 bet 14 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.