Plattdeutsche Nachrichten Plattdüütsche Narichten vun'n 17. Mai 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 17. Mai 2023

  • Perzess geiht los gegen Terrorkoppel, de Düütschland op’n Kopp stellen wull
  • Europaraat-Top-Drepen in Reykjavik geiht to Enn
  • De Böversten vun de Bremer Grönen wüllt nich wedder ran
  • Verdi röppt Mitarbeiders in Ladengeschäften in Neddersassen un Bremen to Warnstreik op
  • To Himmelfohrt: ADAC rekent mit Staus
  • Dat Weer
Bild: Radio Bremen

Informationen zum Audio

Na Kritik: Wirtschapsstaatssekretär Graichen geiht ut sien Amt

Berlin: Veel weer um Wirtschapsstaatsekretär Patrick Graichen hen un her snackt worrn – nu geiht he ut sien Amt. De Mitarbeider vun Bunnswirtschapsminister Habeck weer vörsmeten worrn, he harr veel för en Fründ doon. Dat güng um de Posten vun den Baas bi de Düütsche Energie-Agentur. Graichen warrt eerstmal op Rente schickt.

Perzess geiht los gegen Terrorkoppel, de Düütschland op’n Kopp stellen wull

Koblenz: Vör dat Oberlannsgericht Koblenz is jüst de Perzess losgahn gegen fief Lüüd, vun de seggt warrt: se höört to en Terrorkoppel mit to. Se hebbt woll vör hatt, den politschen Opbo in Düütschland umtosmieten. In de Anklaag steiht: Veer Mannslüüd un en Fro sünd dor op daal ween, dat dat in Düütschland togeiht as in’n Börgerkrieg, se wullen Bunnsgesundheitsminister Lauterbach verslepen un de Regerung afsetten.

Europaraat-Top-Drepen in Reykjavik geiht to Enn

Reykjavik: Op Island geiht dat Europaraat-Top-Drepen to Enn. In düsse Oort weer dat dat eerste Drepen siet 2005. Snackt hebbt se vör allen över den Krieg in de Ukraine. De Europaraat hett en Schadensregister inricht, dor schall oplist warrn, wat Russen in de Ukraine an Verbreken anricht un wat se allens twei maakt hebbt. Frankrieks Präsident Macron hett güstern Avend seggt: All de Europaraat-Länner schullen bi düt Register mitmaken.

De Böversten vun de Bremer Grönen wüllt nich wedder ran

Bremen: Wo de Grönen bi de Börgerschapswahl so vele Stimmen weniger kregen hebbt, wöllt sik de Böversten vun de Partei in’n Harvst nich mehr opstellen laten. Se meen, dat weer richtig, dat Teken to geven, dat se sik na ne’e Lüüd umkieken doot, sä de Mit-Vörsittersch Werwarth. Wo se nu aver mit de SPD snacken un womööglich över en Koalitschoon verhanneln mööt, blievt de Böversten eerstmal an Boord.

Verdi röppt Mitarbeiders in Ladengeschäften in Neddersassen un Bremen to Warnstreik op

Bremen: De Gewarkschap Verdi hett de Mitarbeiders vun Ladengeschäften un den Groothannel in Neddersassen un Bremen to Warnstreiks opropen. Dor achter stickt de Tarifstriet, de opstunns löppt. Op den Bremer Marktplatz kaamt se jüst to en Versammlung tohoop. Verdi seggt: Nich allens warrt rund lopen in Geschäften för Kledaasch, Eten un Drinken, Möbelmang un Elektronik.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Cloppenborg un Weyerbarg överall 9 Graad. Vundaag: Mal Sünnschien, mal opstiegen Wulken. Meisttiets blifft dat aver dröög. Dat Thermometer krabbelt op köhlige 9 bet 13 Graad. De Wind dorto weiht flau oder en beten mehr, an de See ok frisch, vun de noordwesten Kant. In’t Binnenland mit deegte Böen, de an de See mit noch mehr Wums tokehr gaht. Tokamen Nacht: De Steerns kriegt wi süüdlich un ööstlich vun Bremen to sehn, in de anner Gegenden mehr Wulken. Vun Holland un vun de Noordsee treckt dat denn mehr un mehr dicht, man dat blifft dröög. Bi 7 bet 2 Graad. Hier un dor kann dat an de Eer Frost geven. Morgen: Eerst vele Wulken. Över Dag kriggt de Sünn aver pö a pö de Bavenhand, vör allen twüschen Werser un Elv. Dat blifft överall dröög bi 11 bet 16 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.

Bremen Eins Livestream & aktuelle Sendung.

Der Morgen

Jetzt läuft:

Nancy Sinatra These Boots Are Made For Walkin'
  • Jetzt läuft:

    Nancy Sinatra These Boots Are Made For Walkin'