Plattdeutsche Nachrichten Plattdüütsche Narichten vun'n 28. März 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 28. März 2023

  • Koalitschoon sitt wedder tohoop
  • Düütsche Panzer in de Ukraine
  • Bremerhaven: Haventunnel warrt dürer
  • Verkehr löppt wedder
  • Bremerhaven: Perzess um dode Fro geiht to Enn
  • Dat Weer
Bild: Radio Bremen

Informationen zum Audio

Koalitschoon sitt wedder tohoop

Berlin: SPD, Gröne un FDP maakt wieder mit jemehr Koalitschoonsdrepen. Snacken wüllt se över en Reeg Knackpunkten, vör allen ok över den Verkehrsutbo un dat kene neen Gas- un Öölheizungen mehr inboot warrn schüllt. Kanzler Scholz meen güstern – dor harrn se al 20 Stünnen lang verhannelt: se weren goot vörankamen.

Düütsche Panzer in de Ukraine

Berlin: Düütschland hett 18 Leopard-2-Panzer an de Ukraine utlevert. Kanzler Scholz hett seggt: Ja, so is dat. Ok de eersten britischen Challanger-Kampfpanzer sünd in de Ukraine ankamen. Se warrt woll insett, wenn de Ukraine Land wedder trüchwinnen will.

Bremerhaven: Haventunnel warrt dürer

Bremerhaven: De Haventunnel in Bremerhaven schall noch mal wedder meist 13 Millionen Euro mehr kösten as se vörher utrekent harrn. Dat Boen is so veel dürer worrn. So steiht dat in en Senatspapeer, dat bi „buten un binnen“ op’n Disch liggt. All tohoop schall de Tunnel nu 272 Millionen Euro kösten. Eerst harrn se 100 Millionen Euro weniger ansett.

Verkehr löppt wedder

Bremen: Güstern sünd överall in Düütschland Warnstreiks lopen – vundaag nu is de Verkehr in Bremen un Neddersassen wedder in Gang kamen: bi de Düütsche Bahn, bi Bus un Bahn dichtbi un an de Flegerhavens. De Fohrplaan warrt meist överall wedder inhollen. De Gewarkschapen verdi un EVG hebbt anseggt: Bet Oostern plaant se kene neen Akschonen.

Bremerhaven: Perzess um dode Fro geiht to Enn

Bremen: De Perzess wegen Ekatarina B. ut Bremerhaven, de to Dood kamen is, löppt op sien Enn to. Hüüt Vörmiddag schüllt an’t Bremer Landgericht de Staatsanwaltschap un de Nevenklagers jümehr Afslussreden hollen. De Anklaag seggt: de Mann harr siene Fro vun 32 Johr dootmaakt.

Dat Weer

Un woans süht dat mit dat Weer umto ut? Opstunns hebbt wi in Kneten 1 Graad, in Bremen sünd dat 2 un in Bremerhaven un Nordholt 3 Graad. Hüüt Vörmiddag mal mehr, mal weniger Wulken, un jümmers mal wedder treckt ok Regen- un Sneeschuer dör. Vun Middag op an dröger mit Sünnschien un lockere Wulken. An’n Namiddag un Avend schuuvt sik vun’t Emsland her mehr dichte Wulkenbargen vör de Sünn. Dat Thermometer krabbelt op 7 bet 9 Graad. De Wind dorto weiht flau oder en beten mehr, he dreiht vun de noordwesten hen na de süden Kant. Tokamen Nacht: De Wulken kruupt gau tohoop, un denn pieselt dat vun’n Westen her, an de See pladdert dat ok en beten mehr. Bi 5 bet 3 Graad. Morgen: En Barg Wulken, un de smiet ok pieseligen Regen op uns daal. Över Dag ok mal för en längeren Stoot dröög, dat warrt heller, un de Süün waagt sik ok mal rut. Dat Ganze bi 10 bet 13 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.

Bremen Eins Livestream & aktuelle Sendung.

Der Nachmittag mit Dirk Böhling

Der Nachmittag

Jetzt läuft:

Eruption I Can't Stand The Rain
  • Jetzt läuft:

    Eruption I Can't Stand The Rain