Plattdeutsche Nachrichten Plattdüütsche Narichten vun'n 27. März 2023

Warnstreiks leggt Nah- un Fernverkehr in Düütschland lahm

Berlin: In heel Düütschland hett üm Middernacht en groden Warnstreik in’n Verkehr anfungen. Dat geiht ünner annern üm Töög in Nah- un Fernverkehr. Ok de Noordwestbahn fohrt hüüt nich. An meist all Flegerhabens blifft de Flegers an’n Bodden, ok in Bremen. In de Stadt fohrt hüüt bavento keen Stratenbahnen un keen öffentliche Bussen. De Gewarkschaft Verdi un de EVG hebbt to den Streik opropen. Se wüllt dormit den Druck op de Arbeitgevers in dat aktuelle Tarifverhanneln hoochsetten. Siet hüüt Vörmiddag treckt de streiken Lüüd in Bremen bi en Demonstratschoon vun de Neestadt to’n Hauptbahnhoff.  

Drüdde Runn vun’t Tarifverhanneln in’n Staatsdeenst

Potsdam: Hüüt an’n Streikdag geiht dat Verhanneln in’n Tarifstriet in’n Staatsdeenst wieter. Opstünns liggt Arbeitgevers un Gewarkschaften bi dat, wat se verlangt, noch wiet utnanner. De Gewarkschaft Verdi will ünner annern 10,5 Perzent mehr Geld. Dat lehnt de Arbeitgevers as unrealistisch af. Se hebbt betto dat Anbören üm üm un bi 5 Perzent in mehrere Stappen anbaden.    

Koalitschoonsutschuss will sik bi Strietthemen enig warrn

Berlin: De Böversten vun de Ampel-Regeern hebbt bi ehr Drapen an’n Avend un in de Nacht versöcht, de Themen to klären, üm de se strieden doot. De Koalitschoonsutschuss hett ünner annern över dat gauere Utboen vun de Verkehrsweeg in Düütschland snackt. Bavento güng dat üm en mööglich Afwrack-Geld för Ööl- un Gasheizungen, de leeg för de Ümwelt sünd. SPD, Gröne un FDP wüllt hüüt vörstellen, wat bi ehr Verhanneln ruutsuert is.    

Klima-Volksentscheed in Berlin is fehlslaan

Berlin: In de Hauptstadt is de Volksentscheed för en strengeren Klimafohrplaan fehlslaan. Twars hett en knappe Mehrheit dorför stimmt, aver de Minnsttall an Ja-Stimmen hett nich langt. Bi dat Afstimmen güng dat dorüm, wat Berlin al in’t Johr 2030 keen wieteren Schaden mehr för’t Klima bringen schall. Betto weer dütt Ziel för dat Johr 2045 ansett.       

Verhanneln över Tokunft vun Galeria Karstadt Kaufhof

Essen: De Geldgevers vun’n wackeligen Koophuuskonzern Galeria Karstadt Kaufhof wüllt vun Middag an över de Tokunft vun’t Ünnernehmen snacken. Thema is vör allen de Insolvenzplaan, den de Geschäftsföhrers vörleggt hebbt. Dorin geiht dat dorüm, datt op Forderungen an den Konzern vun mehr as een Milliarde Euro verzicht ward. Galeria Karstadt Kaufhof will in heel Düütschland meist 50 Koophüüs dichtmaken un mehrere dusend Arbeitssteden afboen.

Dat Weer

Un nu en Blick op dat Weer: In Bremen un Leer 2, in Demorst un Cuxhaben 3, in Brinkum 4, un in Bremerhaben sünd dat opstünns 5 Graad.Hüüt gifft dat Aprilweer: mit enkelte Sneeregen-, Snee- un Grisselgrusselschuers is dat mal so, mal so. Ok korte Gewidder sünd hier un dor mööglich. Dortwüschen schient af un an de Sünn bi 5 bet 7 Graad. In de Nacht treckt vun de Noordsee her wietere Sneeregen-, Snee- oder Grisselgrusselschuers in’t Binnenland. Twüschendör is de Heven ok mal licht wulkig. Hier un dor kann dat ok Glatties geven bi 3 bet -1 Graad. Morgen begööscht sik dat Weer bilütten. Enkelte Sneeregenschuers ward an’n Vörmiddag weniger. An’n Namiddag is dat mal mehr, mal weniger wulkig, un dat blifft för en längere Tiet dröög bi 7 bet 9 Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Marc Gelhart.