Plattdeutsche Nachrichten Plattdüütsche Narichten vun'n 6. Mai 2024
Standdatum: 6. Mai 2024.
Informationen zum Audio
- Verfügbar bis: 6. Mai 2025 Informationen zur Verweildauer
Israel maakt sik woll för Militärinsatt in Gaza praat
Gaza – De Armee vun Israel raat de Bewahners, den Oosten vun de Stadt Rafah in’n Gazastriepen to verlaten. Dat Militär maakt sik dar woll för een Insatt praat, darmit ward rekent. Bewahner schüllt in een Lager gahn, dat een paar Kilometer in’n Norden liggt. Israel is vermoden, dat noch mehr Hamas-Kämpfer in Rafah sünd un will gegen de gegenan gahn. Se denkt ok, dat Geiseln in de Stadt sünd.
Faeser will Lüüd in’n Wahlkampf beter Schuul geven
Berlin – Na dat Angriepen op den SPD-Europaafordneten Ecke hett Bunnesbinnenministersche Faeser een beter Schuul vun Politikern un Hölpslüüd in’n Wahlkampf foddert. De SPD-Politikerin sä to de Rheinische Post, se bruukt noch mehr Polizisten vör Oort, üm Demokraten an Wahlkampfsteden un bi Veranstalten to schützen. Buterdem mutt de Rechtsstaat bi socke Attacken scharper dörgriepen, so Faeser.
CDU wählt de Böversten nee
Berlin – De CDU fangt mit ehrn Bunnesparteidag an, de dree Daag duern ward. Vundaag schüllt de rund eendusend Afordneten de Böversten vun de Partei nee wählen. De Vörsitter Merz stellt sik wedder to Wahl. Morrn ward denn över dat nee’e Grundsatt-Programm diskereert un achterna besluten.
Verdi streikt bi de Telekom
Bremen – In’n Tarifstriet mit de Dütsche Telekom hett de Gewarkschupp Verdi för vundaag un morrn to bunneswieten Streiks to’n Wahrschaun opropen. In Bremen un Neddersassen rekent Verdi darmit, dat goot 1.200 Telekom-Mitarbeiders mitmaakt. Bedrapen sünd ünner annern de Telekom-Ladens, dat Kunnentelefon un de Butendienst.
Nee’e Bremer Wall-Passaag ward open maakt
Bremen – In de Binnenstadt ward an’n Namiddag de nee’e Wallpassaag open maakt. De Dörgang dör dat Bürohuus Wallkontor schall een Weg sien twüschen de Straat „Am Wall“ un den Binnenstadtkern. Vör negen Johren weer dar bi den damalig Modeladen „Harms am Wall“ een Füer utbroken. Se weet bit vundaag nich, woso.
Dat Weer
Un nu een Blick op dat Weer: op Wangerooge 11, in Bremerhaben 13, in Deefholt 14 un in Bremen sünd dat opstunns 16 Graad. Hüüt is dat erst fründlich, denn treckt aver Wulken op, de sik vör de Sünn schuuvt. Regen fallt aver gar nich un to’n Abend ward de Wulken wedder weniger – bi 16 bit 19 Graad in’t Binnenland un 13 bit 15 Graad op de Eilanden. Tokamen Nacht is de Heben erst noch licht wulkig or klaar, man gau ward dat wedder wulkiger un an de Küst kann ok Nevel opkamen. Dat blifft aver dröög. Dat Thermometer sackt op 10 bit 6 Graad. Morrn fangt de Dag mit mehr oder weniger Wulken an un vun’n Vörmiddag an treckt verenkelt lichte Schuers op. Namiddags lockert de Wulken vun de See her mehr un mehr op – in’t Binnenland blifft dat aver bit to’n Abend dick wulkig, Regen fallt man meist nich – bi 14 Graad op de Eilanden un bit to 18 Graad in’t Binnenland. Dat weern de Narichten op Platt. Sven Kuhnen hett se tohoopstellt. Op platt trechtmaakt un vörleest hett se Heidi Jürgens.