Jetzt läuft:

James Blunt Bonfire Heart
  • Jetzt läuft:

    James Blunt Bonfire Heart
  • Davor lief:

  • Um> 12:52 Uhr lief: John Waite Missing You
  • Um> 12:49 Uhr lief: Amanda Lear Follow Me
  • Um> 12:45 Uhr lief: Bryan Adams Heaven
  • Um> 12:40 Uhr lief: Purple Disco Machine Feat. Sophie & The Giants Hypnotized
  • Um> 12:37 Uhr lief: Fleetwood Mac Little Lies
  • Um> 12:33 Uhr lief: Black Everything's Coming Up Roses
  • Um> 12:28 Uhr lief: Crash Test Dummies Mmm Mmm Mmm Mmm
  • Um> 12:24 Uhr lief: Electric Light Orchestra Turn To Stone
  • Um> 12:20 Uhr lief: Tina Turner Typical Male
  • Um> 12:13 Uhr lief: Hozier Take Me To Church

Das Wochenende aus Bremerhaven mit Ansgar Langhorst

Plattdeutsche Nachrichten Plattdüütsche Narichten vun'n 29. September 2022

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 29. September 2022

Diskussion üm Energiepriesdeckel +++ Veertet Leck an Gaspipeline +++ Warvelstorm Ian över Florida +++ Footgänger in Bremen vun Stratenbahn faatkregen

Bild: Radio Bremen

Informationen zum Audio

Wirtschaftsinstitute leggt Utsicht vör

Berlin: De föhrenden Wirtschaftsforschungsinstitute reken mit en Rezession un seggt för 2023 vörut, datt dat Bruttoinlandsprodukt üm 0,4 Perzent trüchgeiht. In düt Johr reken se noch mit en lütt Anwassen vun 1,4 Perzent. All tohoop taxeert de Fachlüüd de wirtschaftliche Laag in de nee’en Utsicht düütlich leger as noch in’t Vörjohr. Dat liggt besünners an de Inflatschoon un de veel högeren Energiepriesen.

Diskussion üm Energiepriesdeckel

Berlin: De Düütsche Bund vun Städer un Gemeenden griept de Länner bi dat Verlangen na en Energiepriesdeckel ünner de Arms. Dat kunn de Minschen, de Gemeenden, aver ok de middelständschen Wirtschaft würklich hölpen, säe Hauptgeschäftsföhrer Landesberg to de „Rheinschen Post“. De Ministerpräsidentinnen un –präsidenten hebbt güstern den Bund opropen, gau en Priesdeckel för Stroom, Gas un Warms intoföhren. Wo dat finanzeert warrn schall, is aver noch nich klaar worrn.      

Veertet Leck an Gaspipeline

Stockholm: An de ramponeerten Noord-Stream-Pipelines is op de sweedschen Siet noch en Leck funnen worrn. Dat hett de sweedsche Küstenwacht vermellt. Dormit sünd nu all tohoop veer kaputte Steden an de russ’schen Noord-Stream-Pipelines bekannt - twee op dat däänsche un twee op dat sweedsche Flach. Wat heel genau dorachter stickt, is noch nich klaar. Sekerheitsfachlüüd ut’n Westen gaht vun Sabotage ut.       

Warvelstorm Ian över Florida

Cape Coral: De Warvelstorm Ian hett in’n Bunnsstaat Florida för dat Utfallen vun‘n Stroom un för Hoochwater sorgt. Mit 240 Kilometer per Stünn is de as bannig gefährlich taxeerte Warvelstorm an de Süüdwestküst ankamen. Över Land hett he gau nalaten. Dat US-Hurrikanzentrum hett liekers vör meterhogen Stormfloten, Hoochwater un degten Regen wahrschaut. Meist 2,5 Millionen Minschen sünd opfordert worrn, ehre Hüüs to verlaten.

Footgänger in Bremen vun Stratenbahn faatkregen

Bremen: In de Neestadt hett güstern Avend en Stratenbahn en Footgänger faatkregen. De Mann is swor versehrt worrn. Na Utkunft vun Tügen wull de 39-Johrige över de Straat gahn, ofschoons de Ampel root weer. Dorbi is he vör de Bahn lopen un ünner de vorderen Rööd kamen. De Füerwehr hett em dor ruthalen musst. He is swor versehrt in’t Krankenhuus kamen.

Dat Weer

Un nu en Blick op dat Weer: In Brinkum 5, in Bremerhaben un Möppen 7, in Bremen un Emmen 8, un in Cuxhaben sünd dat opstünns 9 Graad. Hüüt is dat toeerst faken wulkig, deels dakig-gries, aver meisttiets dröög. Later gifft dat blangen’n beten Sünnschien vun de See her af un an Schuers. In’n Süden vun’t Bremer Flach blifft dat gröttstendeels dröög bi 13 bet 15 Graad. In de Nacht gifft dat mal mehr, mal weniger Wulken. Besünners an de Küst sünd enkelte Schuers mööglich. In’t Binnenland ward de Schuers weniger, sodatt dat later dröög blifft. Wo dat tovör regent hett, kann sik Daak billen. Dat Thermometer fallt op 9 bet 3 Graad. Morgen geiht dat deels sünnig, deels wulkig oder dakig-gries in den Dag. An de Küst fallt noch’n poor Druppen. An’n Vörmiddag schient för längere Tiet de Sünn, un meisttiets blifft dat dröög. An’n Middag un Namiddag billt sik hier un dor dickere opstiegen Wulken. Enkelte Schuers kann dat en’n ehesten an de See geven. Dorto ward dat’n beten lauer mit 15 bet 17 Graad.

Dat weern de Narichten op platt. Tohoopstellt hett se Birgit Sagemann. Op Platt trechtmaakt un vörleest vun Marc Gelhart.