Jetzt läuft:

Black Everything's Coming Up Roses
  • Als nächstes läuft:

  • Um 12:37 Uhr läuft: Fleetwood Mac Little Lies
  • Jetzt läuft:

    Black Everything's Coming Up Roses
  • Davor lief:

  • Um> 12:28 Uhr lief: Crash Test Dummies Mmm Mmm Mmm Mmm
  • Um> 12:24 Uhr lief: Electric Light Orchestra Turn To Stone
  • Um> 12:20 Uhr lief: Tina Turner Typical Male
  • Um> 12:13 Uhr lief: Hozier Take Me To Church
  • Um> 12:11 Uhr lief: The Beatles She Loves You
  • Um> 12:07 Uhr lief: Herbert Grönemeyer Flugzeuge Im Bauch
  • Um> 12:04 Uhr lief: Gloria Gaynor Never Can Say Goodbye
  • Um> 11:56 Uhr lief: Europe The Final Countdown
  • Um> 11:53 Uhr lief: Van McCoy The Hustle

Das Wochenende aus Bremerhaven mit Ansgar Langhorst

Plattdeutsche Nachrichten Plattdüütsche Narichten vun'n 28. September 2022

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 28. September 2022

De Böversten vun de Länner snackt över hoge Energiepriesen +++ Leckaschen an Nordstream-Rohren: Dor hett woll een siene Finger in’t Speel +++ Archäologen finnt mehr Minschenknaken op den fröhern „Russenkarkhoff“ in Bremen +++ Palliativ-Mediziners kaamt in Bremen tohoop +++ Bremerhaven mit weniger Licht to Wiehnachten +++ Dat Weer

Bild: Radio Bremen

Informationen zum Audio

De Böversten vun de Länner snackt över hoge Energiepriesen

Berlin: De Böversten vun de Länner snackt vundaag över dat, wat de Bund plant, um gegen de hogen Energiepriesen antogahn. Dor geiht dat ok um de Fraag, woans se dat Geld för dat drüdde Paket för weniger Lasten twüschen den Bund un de Länner opdelen wüllt. Enige Länner bekriddelt, dat de Bund to veel Geld ut jümehr Kass halen will. Egens stünn för vundaag en Bund-Länner-Drepen an. Kanzler Scholz harr aver afseggt. He hett Corona.

Leckaschen an Nordstream-Rohren: Dor hett woll een siene Finger in’t Speel

Bornholm: Wo de Gas-Rohren vun Nordstream leckslaan sünd, meent de Staaten dor in de Neegde: Dor hett woll een siene Finger in’t Speel hatt. Ministerpräsidentin Frederiksen vun Däänmark sä, dorför, dat dat en Tofall ween is, dorför weren de Löcker to groot. Ok harrn Meet-Statschonen optekent, dat dor wat explodeert weer. Ok Bunnswirtschaftminister Habeck meen, de Rohren weren attackeert worrn. De „Spegel“ hett Bericht geven: De US-Geheemdeenst CIA harr de Bunnsregerung in’n Sommer al wohrschaut: Mit Anslääg op de Gas-Rohren müss rekent warrn.

Archäologen finnt mehr Minschenknaken op den fröhern „Russenkarkhoff“ in Bremen

Bremen: Archäologen hebbt op den „Russenkarkhoff“ in Gröpeln bet nu de Knaken vun 62 sowjetsche Kriegsgefangene funnen. Dat hett de Bremer Lanns-Archäologin Halle in de Kulturdeputatschoon seggt. Dat sünd dreemal so veel as wat se noch vör en poor Weken weten hebbt. Enn August harrn se 18 Dode tellt. Woans dat nu op den Streek dor wiedergeiht, weet se noch nich. Egentlich wüllt se op dat Stück Land en Bahn-Warksteed boen. En Börgerintitiativ verlangt nu: Dor schall en Gedenksteed inricht warrn.

Palliativ-Mediziners kaamt in Bremen tohoop

Bremen: In de Stadt löppt vun hüüt op an en Fachkongress to Palliativ-Medizin. Bet Sünnavend versammelt sik sowat dusend Experten, um un bi 300 wüllt sik online dortoschalten. Snacken wüllt se doröver, woans een vör Sülvstmoord en P setten kann. Ok geiht dat um den Umgang mit Dood un Truer in de Öffentlichkeit – un dat in Vördrääg, Filme un Snack-Runnen.

Bremerhaven mit weniger Licht to Wiehnachten

Bremerhaven: To Wiehnachten schall dat weniger Licht geven. So will de Stadt Stroom insporen. Tourismus-Baas Meyer hett seggt: Se wüllt dat Licht op den Markt avends fröher utschalten – Klock halvig teihn un nich eerst Klock 11. Morgens schall dat Licht gor nich mehr angahn. So kunnen se een Drüddel an Stroom insporen. Wat in de Oort harr Bremen al vör Weken fastleggt.

Dat Weer

Un woans süht dat mit dat Weer umto ut? Opstunns hebbt wi in Weyerbarg 5 Graad, in Bremerhaven sünd dat 6, in Bremen 7 un in Cloppenborg 8 Graad. Vundaag: Eerst vele Wulken, man meist överall blifft dat dröög. Hier oder dor kann dat wat länger duern, betdat sik de Daak oder hoge Daak oplööst hett. An’n Namiddag kann dat süüdlich vun Bremen un ok an de See kort mal pladdern. Dat Thermometer krabbelt op 12 bet 13 Graad. De Wind dorto weiht flau vun de süüdwesten Kant, an de See kann he an’n Namiddag op Noordwest dreihen. Tokamen Nacht: Mal mehr, mal weniger Wulken. An de Küst pladdert dat noch, anners blifft dat dröög. Daak kann opkamen. Bi 10 Graad op de Inseln, anners bi 6 bet 3 Graad. Morgen: Eerst diesig gries. Över Dag denn en beten Sünnschien, man schuern kann dat ok. Dat Ganze bi 13 bet 14 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.