Jetzt läuft:

Bon Jovi You Give Love A Bad Name
  • Jetzt läuft:

    Bon Jovi You Give Love A Bad Name
  • Davor lief:

  • Um> 13:49 Uhr lief: Ozzy Osbourne Dreamer
  • Um> 13:47 Uhr lief: Shannon Let The Music Play
  • Um> 13:45 Uhr lief: Herman's Hermits No Milk Today
  • Um> 13:42 Uhr lief: The Last Goodnight Pictures Of You
  • Um> 13:38 Uhr lief: Gloria Gaynor I Am What I Am
  • Um> 13:35 Uhr lief: Steve Miller Band Abracadabra
  • Um> 13:27 Uhr lief: Dire Straits So Far Away
  • Um> 13:23 Uhr lief: Elaiza Is It Right
  • Um> 13:20 Uhr lief: David Dundas Jeans On

Der Mittag mit Ansgar Langhorst

Plattdeutsche Nachrichten Plattdüütsche Narichten vun'n 16. September 2022

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 16. September 2022

Bunnsregeern stellt Raffineree-Bedriever Rosneft ünner Trohandverwalten +++ Wedder en Massengraff in de Ukraine funnen +++ IG Metall fangt mit Tarifrunn an

Bild: Radio Bremen

Informationen zum Audio

Veele Düütsche sünd bang vör Maleschen bi Energiereken

Berlin: Wegen de Energiepriesen, de düchtig in de Hööchde gahn sünd, reken veele Bunnsbörger mit Maleschen bi’t Betahlen. Dat wiest de aktuelle ARD-Düütschlandtrend. Darna glöövt 39 Perzent vun de fraagten Lüüd, datt se in’n tokamen Winter ehr Energiereken gor nich oder blots mit grode Maleschen betahlen köönt. 83 Perzent sünd bavento bang, datt wegen de hogen Energiepriesen Arbeitssteden wegfallt.    

Bunnsregeern stellt Raffineree-Bedriever Rosneft ünner Trohandverwalten

Berlin: De Bunnsregeern hett den russ’schen Mehrheitseegner vun de oostdüütschen Ölraffineree in Schwedt, Rosneft, ünner de Trohandverwalten vun de Bunnsnettagentur stellt. Na Utkunft vun dat Bunns-Wirtschaftsministerium schall dormit de Energieversorgung vun de Steden Schwedt, Karlsroh un Vohborg in Bayern afsekert warrn. Betto hangt de Raffineree in Schwedt vun de Ölversorgung mit en Pipeline ut Russland af. Nu wüllt se anner Mööglichkeiten utklamüstern.  

Wedder en Massengraff in de Ukraine funnen

Kiew: Dat ukrainsche Militäär hett woll in de Stadt Isjum, de se trüchwunnen hebbt, en Massengraff funnen. Dat hett Präsident Selenskyj in sien Videonaricht an’n Avend vermellt. De Steed ward opstünns al ünnersöcht. Enkelte Saken wüllt se later an’n Dag vermellen. In Medienberichten is vun mehr as 440 Doden de Reed. Betto kann düsse Utkunft aver nich unafhängig pröövt warrn.      

IG Metall fangt mit Tarifrunn an

Bremen: In Bremen geiht hüüt Vörmiddag de Tarifrunn för de 130.000 Mitarbeiders in de noorddüütschen Metall- un Elektroindustrie los. För den Anfang vun dat Verhanneln hett de IG Metall to en Demonstratschoon opropen. De IG Metall verlangt wegen de Inflatschoon un de hogen Energiepriesen 8 Perzent mehr Lohn. De Arbeitsgevers hebbt dat trüchwiest.   

Football-Bunnsligist Freeborg maakt Punkte gegen Piräus

Piräus: In de Football-Europa-League hett de SC Freeborg op’n Weg to de „K.O.-Phase“ en groden Schritt maakt. De Mannschaft hett bi den greekschen Rekordmeister Olympiakos Piräus mit 3 to 0 wunnen. Union Berlin dorgegen hett bi Sporting Braga in Portugal mit 0 to 1 verloren. In de Conference League hett de 1. FC Köln gegen den tschech’schen Pokaalsieger FC Slovácko mit 4 to 2 wunnen.

Dat Weer

Un nu en Blick op dat Weer: In Möppen 11, in Deefholt 12, in Bremen un Bremerhaben 13, in Cuxhaben 14, un in Emmen sünd dat opstünns 15 Graad. Hüüt Vörmiddag wiest sik de Sünn besünners in’t süüdliche Binnenland noch fakener twüschen de opstiegen Wulken. An’n Namiddag kummt se meist gor nich mehr dör. Ok de Regenschuers ward mehr un degter, to’n Deel ok mit Gewidder, besünners an de Küst. Dat Thermometer stiggt an’n Namiddag blots op 14 bet 17 Graad. In de Nacht ännert sik nich veel. De Wulken sünd mal mehr, mal weniger dicht. Degte Regenschuers treckt wieterhen vun de Noordsee över Neddersassen un Bremen henweg. Af un an klaart dat op bi 13 bet 9 Graad. Ok morgen gifft dat veele Schuers. Twüschendör kummt de Sünn mal dör – an de Küst fakener as in’n Süden bi 14 bet 15 Graad. An‘n Sünndag gifft dat jümmers noch veele Regenschuers un wenig Sünn, dorbi ward dat stöörmsch bi 13 bet 15 Graad.

Dat weern de Narichten op platt. Tohoopstellt hett se Ralph Stölting. Op Platt trechtmaakt un vörleest vun Marc Gelhart.